Pathian hming chu Jehova a ni a, a awmzia chu “A Nihtîr” tihna nia hriat a ni. Jehova chu Pathian engkimtithei a ni a, thil engkim hi ama siam a ni. A duh apiang ti tûrin thiltihtheihna a nei a ni.

Hebrai ṭawngah chuan Pathian hming chu hawrawp palia ziak a ni a. Sâp ṭawngah chuan YHWH, a nih loh leh JHVH tia ziah a ni ṭhîn. A tîra ziak Hebrai Bible-ah chuan Pathian hming chu vawi 7,000 dâwn lai a chuang a. Khawvêl puma mite chuan Jehova hming chu an ṭawng azirin chi hrang hranga lamin, an hmang a ni.

▸ Bung 1, par. 15

Bible hi Pathian thu a ni a; mahse, mihringte a ziahtîr a ni. Chu chu company neituin a hnathawktu hnêna lehkha thawn a ziahtîr ang hi a ni a. Pathian chuan Bible ziaktute chu a ngaihtuahnate ziak chhuak tûrin a thlarau thianghlim hmangin a kaihruai a. Pathian thlarau chuan anni chu kawng chi hrang hrangin a kaihruai a, a châng chuan an thu ziah tûrte chu inlârnaah leh mumangahte a hmuhtîr a ni.

▸ Bung 2, par. 5

Hêng hi thutak bulpuite hrilhfiahtu Bible zirtîrna a ni a. Entîr nân, “Ṭhian sualte chuan nungchang ṭha an tikhawlo ṭhîn,” tih thu bul chuan kan mi kawmte’n a ṭha lamin emaw, chhe lamin emaw min thunun thei tih min zirtîr a. (1 Korinth 15:33) Chu bâkah, “Miin a theh apiang, chu mi vêk chu a seng bawk dâwn si a,” tih thu  bul chuan kan thiltih sawhkhâwkte kan pumpelh thei lo tih min zirtîr bawk.—Galatia 6:7.

▸ Bung 2, par. 12

Hei hi Pathian pêk thuchah a ni a. Chu chu Pathian duh zâwng hrilhfiahna te, nungchang lama zirtîrna te, thupêk te, a nih loh leh rorêlna thute a ni thei. Nakin huna thil lo thleng tûr hriattîrna thuchah a ni thei bawk. Bible-ah hian thleng famkim tawh hrilh lâwkna tam tak a chuang a ni.

▸ Bung 2, par. 13

Isua chu Bible-a Messia chungchâng hrilh lâwkna tam tak awmte tifamkimtu a ni a. “ Messia Chungchânga Hrilh Lâwknate,” tih bâwm chu en rawh.

▸ Bung 2, par. 17, ftn.

Jehova’n leilung chu amah hmangaihtu mihringte awmna tûr paradis mawi tak ni tûrin a siam a. A thiltum chu a inthlâk lo. Nakin lawkah, Pathian chuan suahsualna zawng zawng a tibo vang a, a mite chu chatuana nunna a pe ang.

▸ Bung 3, par. 1

Setana chu Pathian dodâl tûra helna bul ṭantu vântirhkoh a ni a. Jehova a do avângin, “Dodâltu” tih awmze nei Setana tia koh a ni. Diabola tia koh a ni bawk a, chu chu “Sawichhetu” tihna a ni. Pathian chungchânga dâwt sawi a, mite a bum avângin he hming hi pêk a ni.

▸ Bung 3, par. 4

Jehova chuan leilung a siam hma daihin vântirhkohte a siam tawh a. Anni chu vâna awm tûra siam an ni. Vântirhkoh maktaduai za aia tam an awm a. (Daniela 7:10) Hming leh mize hran an nei ṭheuh va, vântirhkoh rinawmte chuan mihringte chibai bûkna an dawng duh lo. Nihna hrang hrang an neiin, hna chi hrang hrang an chelh bawk. An hna chelhte zîngah chuan Jehova lalṭhutthlêng hmaa rawngbâwl te, a thuchah puan chhuah te, leia a chhiahhlawhte vênhim leh kaihhhruai te, a rorêlna thuchah puan chhuah te, leh thu hrilh rawngbâwlna ṭanpui te a tel a ni. (Sâm 34:7; Thu Puan 14:6; 22:8, 9) Nakin lawka Armageddon indonaah Isua an dopui ang.—Thu Puan 16:14, 16; 19:14, 15.

▸ Bung 3, par. 5; Bung 10, par. 1

Jehova leh a duh zâwng kalhtu kan rilru vei zâwng, kan ngaihtuahna, leh kan thiltih eng pawh chu sual a ni. Sual chuan Pathian nêna kan inlaichînna a tihchhiat avângin, tum rêng vânga thil sual kan tih loh nân Pathian chuan dân leh thu bulte min pe a. A tîrin, Jehova’n thil engkim ṭha famkimin a siam a; mahse, Adama leh Evi’n Jehova thu âwih loh thlanga thil sual an tih tâkah chuan, an ṭha famkim tawh lo. An tarin, an thi ta a, Adama hnên aṭanga sual kan rochun avângin keini pawh kan tarin kan thi a ni.

▸ Bung 3, par. 7; Bung 5, par. 3

Hei hi Setana khawvêl leh suahsualna zawng zawng titâwptu tûr Pathian indona a ni.

▸ Bung 3, par. 13; Bung 8, par. 18

Pathian Ram chu Jehova’n vâna a din sawrkârna a ni a. Isua Krista chuan chutah Lal angin ro a rêl a ni. Nakinah, Jehova chuan chu Lalram chu suahsualna zawng zawng tihtâwp nân a hmang ang a. Pathian Ram chuan leiah hian ro a rêl ang.

▸ Bung 3, par. 14

Pathian chuan thil engmah a siam hmain Isua a siam a. Jehova chuan Isua chu mi zawng zawng tâna thi tûrin leiah a rawn tîr a ni. Isua tihhlum a nih hnuah, Jehova chuan a kaitho leh a. Isua chuan vânah Pathian Rama Lalber angin ro a rêl mêk a ni.

▸ Bung 4, par. 2

Bible chuan Messia lo lan hun tûr a hrilh lâwk, a nih loh leh a sawi lâwk a. Chu chu hapta 69 tia koh hun tâwpa lo thleng tûr a ni a, B.C.E. 455 aṭanga inṭanin C.E. 29-ah a tâwp a ni.

C.E. 29-ah a tâwp tih chu engtin nge kan hriat? Hapta 69 chu Nehemia Jerusalem a thlen a, khawpui a din ṭhat ṭan hun, B.C.E. 455 khân a inṭan a. (Daniela 9:25; Nehemia 2:1, 5-8) “Dâwrzawn” tih thu mal hian number 12 min hriat chhuahtîr ang bawkin, “hapta” tih ṭawngkam hian number 7 min hriattîr a ni. “Nikhat aiah kum khat” tih hrilh lâwkna kum chhiar dân aṭanga chhût chuan, he hrilh lâwknaa hapta-te hi ni sarih awmna hapta ni lovin, kum sarih awmna hapta a ni. (Numbers 14:34; Ezekiela 4:6) Hapta tin chu kum sarih zêla rei a nih chuan, hapta 69 chu kum 483 (69 x 7) tihna a ni. B.C.E. 455 aṭanga kum 483 kan chhiar chuan, C.E. 29-ah a tâwp a. Chumi  kumah ngei chuan Isua chu baptisma changin, Messia a rawn ni ta a!—Luka 3:1, 2, 21, 22.

Chu hrilh lâwkna vêk chuan kum sariha rei hapta khat dang chungchâng a sawi lâwk a. Chumi hun chhûng C.E. 33-ah Messia chu tihhlum a ni ang a, C.E. 36 inṭannaah Pathian Ram chanchin ṭha chu Juda mite hnênah chauh ni lovin, hnam tina mite hnêna hrilh a ni ang.—Daniela 9:24-27.

▸ Bung 4, par. 7

Bible chuan Pathian Jehova chu Siamtu a ni tih leh thil dang zawng zawng a siam hmain Isua a siam tih a sawi a. (Kolossa 1:15, 16) Isua chu Pathian Engkimtithei a ni lo. Amah pawhin Pathian nêna intlukin a insawi ngai lo. Chu ai chuan: “Pa chu keimah aiin a ropui zâwk si a,” tiin a sawi zâwk a ni. (Johana 14:28; 1 Korinth 15:28) Mahse, sakhaw ṭhenkhat chuan Pathian pakhata mi pathum: Pa, leh Fapa, leh thlarau thianghlim infinkhâwm, Trinity chu an zirtîr a. “Trinity” tih thu mal hi Bible-ah a awm lo. Hei hi zirtîrna dik lo a ni.

Thlarau thianghlim chu Pathianin a duh zâwng hlen chhuah nâna a hman hmuh theih loh a thiltihtheihna, a chakna hi a ni. Chu chu mi pakhat anga chhiar theih a ni lo. Entîr nân, Kristian hmasate chu “thlarau thianghlimin an khat” thei a. Chu bâkah, Jehova chuan: “Mi zawng zawng chungah ka thlarau ka leih ang,” tiin a sawi bawk.—Tirhkohte 2:1-4, 17.

▸ Bung 4, par. 12; Bung 15, par. 17

Kristian dikte chuan Pathian an biaknaah kraws an hmang lo. Engvângin nge?

1. Kraws chu sakhaw dik lote’n hun rei tak chhûng an lo hmang tawh a. Hmân lai chuan thil siamte pathian anga biaknaah leh milem betute mipat hmeichhiatna hmanga pathian biaknaah an hmang a ni. Isua thih hnu kum 300 chhûngin, Kristiante chuan an biaknaah kraws an hmang lo. A hnu daihah, Rom Lal Constantine-a chuan kraws chu Kristianna chhinchhiahna a nihtîr ta a. Chu chhinchhiahna chu Kristianna chawilâr nâna hman a ni. Mahse, kraws chuan Isua Krista nên inkûngkaihna engmah a nei lo. New Catholic Encyclopedia chuan:  “Kraws chu Kristianna hun hma leh Kristian ni lote hnam dânah hmuh a ni,” tiin a hrilhfiah a ni.

2. Isua chu kraws-ah a thi lo. Grik thu mal “kraws” tia lehlin awmzia chu “ban ding ngîl pakhat,” “thingzai pakhat,” a nih loh leh “thing kûng pakhat” tihna a ni. Companion Bible chuan: “Grik ṭawnga ziak [Thuthlung Tharah] chuan thingzai pahnih anga ngaih theih tûr sawina pawh a awm lo hrim hrim,” tiin a sawi. Isua chu ban ding ngîlah a thi a ni.

3. Jehova chuan amah kan biaknaah milem emaw, chhinchhiahna emaw kan hman a duh lo.—Exodus 20:4, 5; 1 Korinth 10:14.

▸ Bung 5, par. 12

Isua chuan a zirtîrte chu a thih Hriatrengna hmang tûrin thu a pe a. Chu chu Israel mite’n Kalhlên Kût an hman nî, Nisan 14 nîah kum tinin an hmang ṭhîn a ni. Isua taksa leh thisen entîrtu, chhang leh uain chu Hriatrengna nîah sem kual a ni a. Vâna Isua ruala rorêltu tûrte chuan chhang leh uain chu an ei-in an in ang. Leia chatuan nun beiseina neite erawh chuan Hriatrengna inkhâwmah zah takin tel mah se, chhang leh uain chu an ei-in an in ve lo.

▸ Bung 5, par. 21

Mizo Bible-a “thlarau” tia lehlin Hebrai leh Grik ṭawng hian awmze hrang hrang a nei thei a. Mahse, mihring mita kan hmuh theih loh boruak emaw, mihring leh ramsate’n an hîp thaw emaw ang chîte hi a kâwk tlângpui ṭhîn a ni. Chûng thu malte chu thlarau mite  leh thlarau thianghlim, Pathian chakna sawina a ni thei bawk. Bible chuan mi a thih hnua nung zawm zêl thlarau thi thei lo kan nei tih a zirtîr lo.—Thuhriltu 9:5, 10; Sâm 104:29; Matthaia 12:43; Luka 11:13.

▸ Bung 6, par. 5; Bung 15, par. 17

Gehenna chu Jerusalem bula awm bawlhhlawh hâl ralna hmun atâna hman ruam hming a ni a. Isua hun laiin he ruamah hian ramsa emaw, mihring emaw a nung chunga nghaisak, a nih loh leh hâl an ni tih finfiahna a awm lo. Chuvângin, Gehenna chuan chatuan atâna mitthite nghaisakna leh hâlna, mita hmuh theih lohna hmun a entîr lo. Isua’n Gehenna hmuna paih mite chungchâng a sawi hian, tihboral hlenna a sawina a ni.—Matthaia 5:29, 30; 10:28.

▸ Bung 7, par. 20

Hei hi Isua’n a zirtîrte hnêna ṭawngṭai dân tûr a zirtîr laia mi a ni a. Isua chuan hetianga ṭawngṭai tûrin min zirtîr a ni:

• “I hming zahawm rawh se”

  Jehova chuan a hming, a nih loh leh a hmingṭhatna chu dâwt thu zawng zawng laka thiam chantîr tûrin kan ṭawngṭai a. Hei hi lei leh vâna awm zawng zawngte’n Pathian hming an zahna tûr leh an chawimawina tûrin a ni.

• “I ram lo thleng rawh se”

  Pathian sawrkârna chuan Setana khawvêl suaksual tiboral tûr te, lei chunga rorêl tûr te, leh lei hi paradis-a chantîr tûr tein kan ṭawngṭai a ni.

•  “I duh zâwng . . . leia mi’n ti rawh se”

  Jehova’n mihringte a siam laia a duh ang chiahin, thuâwih mihringte leh mi ṭha famkimte’n Paradis-a chatuana an nun theih nân leilung atâna Pathian thiltum thleng famkim tûrin kan ṭawngṭai a ni.

▸ Bung 8, par. 2

Jehova chuan sual leh thihna ata mihringte chhan chhuah nân tlanna a pe a. Tlanna chu mihring hmasa ber Adama hloh tâk nun ṭha famkim neih lêt nân leh Jehova nêna inlaichînna chhe ta siam ṭhat nâna pêk ngai man hlu tak chu a ni. Pathianin sual fa zawng zawngte aia thi tûrin Isua chu leiah a rawn tîr a. Isua thihna avângin mi zawng zawng chuan chatuana nun theihna leh mi ṭha famkim nih theihna hun remchâng an nei a ni.

▸ Bung 8, par. 21; Bung 9, par. 13

Daniela bung 4-a hrilh lâwkna chuan Pathianin a Lalram chu kum 1914-ah a din dâwn tih min hriattîr a ni.

Hrilh lâwkna: Jehova chuan Lal Nebukadnezzara chu hrilh lâwkna awmze nei thing lian tak kih thlûk chungchâng mumangah a hmuhtîr a. A mumangah chuan, thing chu “hun sarih” chhûng a chawr theih loh nân a bul bâwr chu thîr leh dâra ṭâwn a ni. Chumi hnuah chuan, thing chu a rawn chawr leh ang.—Daniela 4:1, 10-16.

 Hrilh lâwknain kan tâna awmzia a neih chu: Thing chuan Pathian rorêlna a entîr a. Kum tam tak chhûng chu, Jehova chuan Jerusalema lalte chu Israel hnam chungah ro a rêltîr a. (1 Chronicles 29:23) Mahse, chûng lalte chu an rinawm loh avângin an rorêlna chu a tâwp ta a. Jerusalem chu B.C.E. 607-ah tihchhiat a ni a. Chu chu “hun sarih” inṭanna a ni. (2 Lalte 25:1, 8-10; Ezekiela 21:25-27) Isua chuan, “Jentailte nî a kin hma loh zawng Jerusalem khua chu Jentailte rah behin a awm ang,” tia a sawi hian “hun sarih” chungchâng a sawina a ni a. (Luka 21:24) Chuvângin, Isua leia a lo kal khân, “hun sarih” chu a la tâwp lo. Jehova chuan “hun sarih” tâwpah Lal pakhat a ruat dâwn tih thu a tiam a. Chu Lal thar, Isua rorêlna chuan lei pumpuia Pathian mite tân chatuan malsâwmna a rawn thlen ang.—Luka 1:30-33.

“Hun sarih” rei zâwng: “Hun sarih” chu kum 2,520-a rei a ni a. B.C.E. 607 aṭanga kan chhiar ṭan chuan kum 2,520 chu kum 1914-ah a tâwp a. Chu chu Jehova’n Isua, Messia chu vân Rama Lala a siam kum a ni.

Engtin nge number 2,520 chu kan neih? Bible chuan hun thum leh a chanve chu ni 1,260 nên a inang tih a sawi a. (Thu Puan 12:6, 14) Chuvângin, “hun sarih” chu, ni 1,260 lêt hnih, a nih loh leh ni 2,520 tihna a ni. Hrilh lâwkna atâna hman “ni khat aiah kum khat zêl” tih chhût dân aṭangin, ni 2,520 chu kum 2,520 nên a inang ta a ni.—Numbers 14:34; Ezekiela 4:6.

▸ Bung 8, par. 23

“Vântirhkoh chungnung ber” tih chu “vântirhkohte hotu ber” tihna a ni a. Bible chuan vântirhkoh chungnung ber pakhat chungchâng chauh a sawi a, a hming chu Mikaela a ni.—Daniela 12:1; Juda 9.

Mikaela chu Pathian sipai vântirhkoh rinawmte Hruaitu a ni a. Thu Puan 12:7 chuan “Mikaela leh a vântirhkohte chuan drakon . . . leh a tirhkohte” an do tih a sawi a ni. Thu Puan buin Isua chu Pathian sipaite Hruaitu a nih thu a sawi avângin, Mikaela chu Isua hming dang a ni tih kan hre thei a ni.—Thu Puan 19:14-16.

▸ Bung 9, par. 4

He ṭawngkam hian Pathian Ramin Setana khawvêl a tihboral hma lawka leia thilthleng tûr lian tham tak takte a thlen hun chhûng a kâwk a. Chutiang ṭawngkam, “khawvêl tâwpna” tih leh “Mihring Fapa lo kal lehna,” tih ang chite chu Bible hrilh lâwknaah hun thuhmun sawi nâna hman a ni. (Matthaia 24:3, 27, 37) ‘Ni hnuhnûng’ chu Pathian Ramin kum 1914-a vâna ro a rêl ṭan khân a inṭan a, Armageddon-a Setana khawvêl tihboral a nih hunah a tâwp ang.—2 Timothea 3:1; 2 Petera 3:3.

▸ Bung 9, par. 5

Pathianin mitthite nung leh tûra a tih hian, chu chu thawhlehna tia koh a ni a. Bible-ah mi pakuate thawhlehna a chuang a. Elija te, Elisa te, Isua te, Petera te, leh Paula te hian mitthi an kaitho ṭheuh a ni. Chûng thilmak tihte chu Pathian thiltihtheihna vâng chauhva thleng a ni a. Jehova chuan “mi felte leh fel lote” chu leia kaihthawh a tiam a ni. (Tirhkohte 24:15) Bible chuan vân nunna changa thawhlehna chungchâng pawh a sawi a. Chutiang thawhlehna chu Isua ruala vâna nung tûra Pathian thlante, a nih loh leh hriak thihte kaihthawh an nih hunah a thleng a ni.—Johana 5:28, 29; 11:25; Philippi 3:11; Thu Puan 20:5, 6.

▸ Bung 9, par. 13

Ramhuai zâwlna, a nih loh leh dawithiamna chu direct-in emaw, mi dang ramhuai puithiam, palai, a nih loh leh dawithiam hmanga thlaraute nêna inbiak pawh tumna thil chîn ṭha lo tak a ni a. Mite’n chutiang thil an chîn chhan chu mihringte an thih hunah an thlarau chu nung zawmin, thlarau thiltithei leh chak takah an chang tih zirtîrna dik lo an rin vâng a ni. Ramhuaite chuan mihringte chu Pathian thu âwih lo tûra thunun an tum bawk a. Arsi en te, aien te, mitdawivaih te, puithuna te, leh tisa khawvêl piah lam thilte chu ramhuai zâwlnaah a tel vek a. Lehkhabu te, magazine te, horoscope te, film te, poster te, leh hlate thleng chuan ramhuai te, mitdawivaih te, leh tisa khawvêl piah lam thilte chu thil pawi lo leh phûrawm tak angin a târ lang bawk. Mitthi vuina nêna inkûngkaiha thil chîn ṭhin mitthi tâna inthawina hlan te, mitthi vui liam hnua ei leh ina hlimhlawp bâwl te, thih champhaphâk hmanga ṭhutkhâwm te, nupui pasal sûnte tih tûr serh  leh sâng te, leh mitthi lumena tlaivâr ang chite chuan ramhuaite nêna inzawmna a nei a. Mite chuan ramhuai thiltihtheihna hman an tum hian ruihhlote an hmang fo ṭhîn bawk.—Galatia 5:20; Thu Puan 21:8.

▸ Bung 10, par. 10; Bung 16, par. 4

Jehova chu Pathian Engkimtithei a ni a, lei leh vân hi ama siam a ni. (Thu Puan 15:3) Chuvângin, thil engkim Neitu a ni a, a thil siamte chunga ro rêl tûr lalchungbung ber, a nih loh leh thuneihna pumhlûm neitu a ni. (Sâm 24:1; Isaia 40:21-23; Thu Puan 4:10, 11) A thil siam zawng zawngte tân dânte a siam a. Jehova chuan mi dangte chu rorêltua ruat tûrin thuneihna a nei bawk. Amah kan hmangaih a, a thu kan âwih hian Pathian lalchungnunna kan thlâwp tihna a ni.—1 Chronicles 29:11.

▸ Bung 11, par. 10

Nau tihtlâkna tih chu nau la piang lo tum rêng vânga tihhlumna a ni a. Chu chu tihpalh thilthua thleng emaw, pum chhûnga amaha lo thi emaw a ni lo. Nau pai ṭan aṭangin nautê chu nu taksa pêng pakhat mai ni lovin, mihring pakhat a ni.

▸ Bung 13, par. 5

Hei hi thisen hlang emaw, thilsen pêng bulpui pali emaw chu mi dang hnên aṭanga laa inthunna, a nih loh leh thisen dah ṭhatsa inthunna hmanga inenkawlna a ni a. Thisen pêng bulpui palite chu thi mûr sen, thi mûr vâr, thi mûr ban, leh thisena tuihnâng te a ni.

▸ Bung 13, par. 13

Bible-a “thununna” tih thu mal hi hremna sawina ṭawngkam dang mai a ni lo. Thunun kan nih hian kaihhruai, zirtîr, leh siam ṭhatin kan awm a ni. Jehova chuan a thununte chu a ânkhumin, an chungah a râwng ngai lo. (Thufingte 4:1, 2, NW) Nu leh pate tân entawn tûr ṭha tak a siam a ni. A thununna pêk chu a ṭhat êm avângin mi chuan a ngaina hial thei a ni. (Thufingte 12:1) Jehova chuan a mite chu a hmangaihin, a zirtîr ṭhîn a. Ngaih dân ṭha lo siam ṭha thei kaihhruaina a pe a, chu chuan a lâwm zâwnga thil ngaihtuah a, ti tûrin anni chu a ṭanpui a ni. Nu leh pate tân, thununnaah chuan an fate chu thu an âwih chhan tûr hre thiam tûra ṭanpuina pêk a tel a. Jehova hmangaih tûr te, a Thu Bible ngaina tûr te, leh Bible thu bulte hre thiam tûra zirtîr te a tel bawk a ni.

▸ Bung 14, par. 13

Anni chu hmuh theih loh mihringte aia thil tithei thlarau thil siam suaksualte an ni a. Ramhuaite chu vântirhkoh suaksualte an ni. Pathian thu âwih lohna hmanga a hmêlmaa insiamin, an lo sual ta a. (Genesis 6:2; Juda 6) Jehova chunga Setana helna chu an ṭâwmpui a ni.—Deuteronomy 32:17; Luka 8:30; Tirhkohte 16:16; Jakoba 2:19.

▸ Bung 16, par. 4