1-3. Kan za hian eng salah nge kan tân a, engtin nge Jehova’n min chhan chhuah dâwn?

I TEL lohna dân bawhchhiatna avânga dam chhûng lung in tâng tûra tih angin han inchan teh. Chhuah zalên i ni ngai dâwn lo va. I hma lam hun chu a thim hle a, tih theih engmah i nei si lo. Mahse, beisei bo taka i awm laiin, nangmah ṭanpui duhtu tuemaw nên in intawng ta thut a. Ani chuan chhuah zalên tûr chein thiltihtheihna a neih mai bâkah, ṭanpui tûr chein a intiam bawk a! Engtin nge i awm ang?

² Kan za hian thihna salah kan tâng vek a. Eng ang pawhin ṭan la mah ila, tlân chhuah theih dân kawng a awm lo. Mahse, Jehova chuan thihna ata min chhan chhuak tûrin thiltihtheihna a nei a. “Hmêlma hnuhnûng ber tihbova awm tûr chu thihna hi a ni,” tiin min tiam a ni.—1 Korinth 15:26.

³ Thihna hlauh a ngaih tawh loh huna i zalên dân tûr chu han mitthla teh! Mahse, Jehova chuan thihna a nuai bo mai ni lovin, mitthi tawhte pawh a kaitho leh ang. Chu chuan i tâna awmzia a neih dân tûr chu han ngaihtuah teh. Ani chuan, “Mitthite chu an nung leh ang,” tih min tiam a. (Isaia 26:19) Chu chu Bible-in thawhlehna a tih chu a ni.

4. (a) Kan chhûngkaw zînga mi emaw, kan ṭhian ṭha tak emaw a thih hian eng thlamuanna nge kan neih theih? (b) Isua ṭhian ṭha takte chu tute nge ni?

⁴ Kan chhûngkaw zînga mi emaw, kan ṭhian ṭha tak emaw a thih hian kan tuar nasain, kan hrilhhai hle  ṭhîn a. Nung leh tûrin tih theih engmah kan nei lo. Mahse, Bible chuan thlamuanna dik tak min pe a ni. (2 Korinth 1:3, 4 chhiar rawh.) Jehova leh Isua’n kan hmangaih takte kaihthawh an duhzia târ langtu entîrna pakhat i lo ngaihtuah ang u. Isua leia a awm lai khân, Lazara leh a farnu Mari leh Marthi te hnênah a kal ṭhîn a. An pathum chuan Isua ṭhian ṭha tak an ni hlawm a. Bible chuan: “Isuan Marthi te, a laizâwn te, Lazara te a hmangaih,” tiin a sawi. A hnuah, Lazara chu a thi a ni.—Johana 11:3-5.

5, 6. (a) Isua’n Lazara chhûngte leh a ṭhiante lungngaihzia a hmuhin eng nge a tih? (b) Engvângin nge Isua’n thihna chungchânga min tawrhpui dân hriat chu a thlamuanthlâk?

⁵ Isua chu Mari leh Marthi te thlamuan tûrin a kal a. Marthi’n Isua a lo kal tih a hriat chuan khaw pâwnah amah hmuak tûrin a kal nghâl a. Isua a hmuh chuan a lâwm hle a, a hnênah: “Heta awm ni la chu ka nuṭa a thi lo tûr,” a ti a. Marthi ngaihah chuan Isua chu a tlai lutuk a ni. A hnuah, Isua chuan Mari ṭap lai a hmu a. An lungngaihzia a hmuhin a tawrhpui hle a, a ṭap ve ta a. (Johana 11:21, 33, 35) Chutiang bawkin, kan hmangaih tak a thih huna kan tawrhna chu min tawrhpui a ni.

⁶ Isua’n thihna chungchângah min tawrhpui tih hriatna chuan min thlamuan a. Isua chu a Pa ang chiah a nih avângin Jehova pawhin min tawrhpui tih kan chiang thei a ni. (Johana 14:9) Jehova chuan thihna chu chatuan atâna nuaibo theihna a nei a, rei lo têah a nuaibo thuai ang.

7, 8. Engvângin nge Marthi chuan Lazara thlâna lung chu chawi sawn a remtih loh va, mahse Isua’n eng nge a tih?

⁷ Isua chu Lazara an zalhna thlân a va thlen chuan,  thlân kawngka chu lung lian taka khâr a ni tawh a. Isua chuan: “Lung hi chawi sawn rawh u,” a ti a. Mahse, Lazara ruang chu thlânah ni li lai zalh a nih tawh avângin Marthi chuan an chawi sawn a remti lo. (Johana 11:39) Isua’n a nuṭapa a ṭanpui dân tûr a hriat loh vâng a ni.

⁸ Lung chawi sawn a nih hnuah, Isua chuan: “Lazar, lo chhuak rawh,” tiin a au va. A hnua Mari leh Marthi thil hmuh chu a va ropui êm! “Mitthi chu a kut a ke thlân puana tuam chungin a lo chhuak ta a.” (Johana 11:43, 44) Lazara chu a nung leh ta! A chhûngte leh a ṭhian ṭhate nên an intawng leh a, ani chu an kuah theiin, an vuan thei a, an be thei bawk a ni. Thil mak ropui a va ni êm! Isua’n Lazara chu a kaitho leh a ni.

9, 10. (a) Tuin nge Isua chu mitthite kaithawh theihna pe? (b) Engvângin nge thawhlehna chanchin chu kan tân a hlut?

⁹ Isua’n mite chu ama thiltihtheihna hmangin a kaitho em? Kai tho lo ve. Lazara a kaihthawh hmain, Isua chu Jehova hnênah a ṭawngṭai a, Jehova’n Lazara kaihthawh theihna a pe a ni. (Johana 11:41, 42 chhiar rawh.) Lazara chu kaihthawh leh awmchhun a ni lo. Bible chuan nasa taka dam lo hmeichhe naupang kum 12 mi chungchâng min hrilh a. A pa, Jaira chu a beidawng hle a, a fanu mal neih chhun tidam tûrin Isua a ngên chiam a. Isua a biak lai takin mi an lo kal a: “I fanu a thi ta; engah nge zirtîrtu hi i la tihhah cheu dâwn?” an rawn ti a. Mahse, Isua’n Jaira hnênah: “Hlau suh, ring mai rawh, chutichuan a dam leh ang,” a ti a. Tichuan, Jaira nên a in lam pan chuan an kal ta a. An va thlen chuan, Isua’n mite ṭap thâwm chu hriain, an ṭap laite a va hmu a. An hnênah: “Ṭap suh u, a thi  lo ve, a muhîl a ni zâwk,” a ti a. Naupang nu leh pa chuan Isua sawi chu mak an ti hle a. Isua’n mipuite chu chhuak tûrin a hrilh a, tichuan naupang nu leh pa chu an fanu mutna pindanah chuan a hruai a. Isua’n naupang kut chu chelhin: “Chêmtê, tho rawh, ka ti a che,” a ti a. Naupang chu rawn tho va, a kal thei nghâl an hmuh huna a nu leh pate lâwm dân tûr chu han mitthla teh! Isua’n an fanu chu a kaihthawhsak a ni. (Marka 5:22-24, 35-42; Luka 8:49-56) Chumi nî aṭang chuan, an fanu an hmuh apiangin Isua hmanga Jehova thil tihsak chu an hre chhuak ṭhîn ngei ang. *

¹⁰ Isua kaihthawhte chu a hnuah an thi leh a. Mahse, an chanchin chhiarnain beisei tûr min pêk avângin kan tân a hlu a ni. Jehova chuan mite kaihthawh a châk a, a kaitho ngei dâwn a ni.

11. Thuhriltu 9:5 aṭangin Lazara chunga thilthleng chungchâng eng nge kan hriat?

¹¹ Bible chuan: “Mitthi erawh chuan engmah an hre lo,” tiin chiang takin a sawi a. A dikzia chu Lazara chanchin aṭangin kan hre thei a ni. (Thuhriltu 9:5) Isua sawi angin, Lazara chu muhîl ang mai a ni a. (Johana 11:11) Thlâna a awm chhûngin “engmah” a hre lo.

12. Lazara thawhlehna chu a thleng tak tak a ni tih engtin nge kan hriat?

¹² Isua’n Lazara a kaihthawh lai chu mi tam takin an  hmu a. Chu thilmak chu Isua tih a ni tih a hmêlmate pawhin an hria a ni. Lazara a nung leh a, chu chuan thawhlehna a thleng tak tak tih a finfiah a. (Johana 11:47) Chu bâkah, Lazara hmu tûrin mi tam tak an va kal a, an thil hmuh avângin Isua chu Pathian tirh a ni tih an rin phah bawk. Chu chu Isua hmêlmate chuan an duh lo hle a, Isua leh Lazara chu tihhlum an tum ta hial a ni.—Johana 11:53; 12:9-11.

13. Engvângin nge Jehova’n mitthite a kai tho dâwn tih kan chian theih?

¹³ Isua’n ‘thlâna awm zawng zawng’ an tho leh dâwn tih a sawi a. (Johana 5:28) A awmzia chu, Jehova’n a hriat reng zawng zawngte chu an tho leh dâwn tihna a ni. Mahse, Jehova tân a kaihthawh tûrte nihna kimchang taka a hriat vek a ngai ang. A hre kimchang vek thei ang em? Vânah khian arsi tlûklehdingâwn tam tak a awm a. Jehova chuan arsi zawng zawngte hming a hre vek tih Bible-in a sawi a ni. (Sâm 147:4, 5 chhiar rawh.) Arsi zawng zawngte hming mah a hriat vek theih chuan, a kaihthawh leh tûrte nihna kimchang chu awlsam takin a hre thei ang tih a chiang hle. Chu bâkah, Jehova chu thil engkim Siamtu a nih avângin mitthite kaitho tûrin thiltihtheihna a nei tih kan hria a ni.

14, 15. Joba thusawi chuan thawhlehna chungchâng eng nge min zirtîr?

¹⁴ Mi rinawm Joba chuan thawhlehna a ring a. “Mi a thih chuan a nung leh ang em ni?” tia a zawh hnuah, Jehova hnênah: “Mi ko vang a, keiin ka chhâng ang che; i kut hnathawh i ngaina a ni,” tiin a sawi a ni. Ni e, Jehova chuan mitthite a kaihthawh leh hlân a nghâkhlel hle tih chu Joba’n a hria a ni.—Joba 14:13-15.

 ¹⁵ Thawhleh beiseina i ngaihtuah hian engtin nge i awm? ‘Ka chhûngte leh ka ṭhian thi tawhte chu an rawn tho leh ang em?’ tiin i ngaihtuah mai thei. Jehova’n mitthite kaih thawh leh a duh tak tak tih hriatna chuan min thlamuan a ni. Bible-in tho leh tûrte leh an awmna tûr a sawite chu i lo en ang u.

16. Leia nung tûra kaihthawhte chuan eng ang nun nge an neih ang?

¹⁶ Hmân laia mitthi kaihthawhte chu an chhûngte leh ṭhiante nên he leiah ngei hian an chêngho leh a. Chutiang chu nakinah a lo thleng ang; mahse, a aiin a ropui zâwk ang. Engvângin nge? Leia kaihthawhte chuan chatuana nun theihna an neih a, an thih ngai tawh dâwn loh vâng a ni. Chu bâkah, tûna kan chênna nêna inang lo tak khawvêlah an nung ang a. Chutah chuan indona te, dân bawhchhiatna te, leh dam lohnate a awm tawh lo vang.

17. Tute nge tho leh ang?

¹⁷ Tute nge tho leh ang? Isua chuan “thlâna awm zawng zawngin a aw an hria ang a, an chhuak vek ang,” tiin a sawi a. (Johana 5:28, 29) Thu Puan 20:13 chuan: “Tuifinriat chuan a chhûnga mitthi awmte chu a chhuahtîr a, thihna leh Mitthi Khua chuan an chhûnga mitthi awmte chu an chhuahtîr bawk a,” tiin a sawi bawk. Ni e, mi tlûklehdingâwn tam tak chu an tho leh ang. Tirhkoh Paula pawhin, “Mi felte leh fel lote thawhlehna a awm ang,” tih a sawi a ni. (Tirhkohte 24:15 chhiar rawh.) Chu chu eng tihna nge ni?

18. Tho leh tûr “mi felte” chu tute nge ni?

¹⁸ “Mi felte” zîngah chuan Isua leia a lo kal hmaa  nung Jehova chhiahhlawh rinawmte an tel a. Nova te, Abrahama te, Sari te, Mosia te, Ruthi te, leh Estheri te chu leiah hian an rawn tho leh ang. An zînga ṭhenkhat chungchâng chu Hebrai bung 11-ah i chhiar thei ang. Kan huna Jehova chhiahhlawh rinawm thi tate chungchâng ve hi le? Anni pawh “mi felte” zîngah an tel a, an tho leh ang.

19. Tute nge mi “fel lote” chu ni? Jehova’n eng hun remchâng nge a pêk ang?

 ¹⁹ Mi “fel lote” zîngah chuan Jehova hriat theihna hun remchâng nei lo mi tlûklehdingâwn tam tak an tel a. Anni chu thi tawh mah se, Jehova’n a theihnghilh lo. A kai tho leh ang a, a chungchâng zir theihna leh a rawngbâwl theihna hun remchâng an nei ang.

20. Tute nge kaihthawh ni dâwn lo?

²⁰ Chuti chu, thi tawh zawng zawngte an tho leh dâwn tihna a ni em? Ni lo. Isua’n mi ṭhenkhat chu kaihthawh an ni dâwn lo tih a sawi a. (Luka 12:5) Mi chu kaihthawh a nih dâwn leh dâwn loh chungchângah tuin nge thu tlûkna siam ang? Jehova chu Rorêltu lû ber a ni a; mahse, Isua hnênah ‘mitthite leh mi nungte chunga rorêl tûrin’ thuneihna a pe bawk a ni. (Tirhkohte 10:42) Mi sual nia rorêlsakte leh inthlâk thleng duh lote chu kaihthawh an ni lo vang.—Endnote 18-na en rawh.

21, 22. (a) Vân nunna changa kaihthawh tih awmzia chu eng nge ni? (b) Vân nunna changa kaihthawh hmasak ber chu tu nge ni?

²¹ Bible chuan mi ṭhenkhat chu vânah an nung dâwn tih min hrilh a. Mi chu vâna nung tûra kaihthawh a nih hian, mihring taksa puin leiah kaihthawh a ni tawh lo vang. Thlarau mi nia vâna kaihthawh a nih tawh avângin.

²² Isua chu vâna nung tûra kaihthawh hmasak ber a ni a. (Joahan 3:13) Tihhlum a nih aṭanga a ni thum nîah Jehova’n a kai tho va. (Sâm 16:10; Tirhkohte 13:34, 35) Isua chu mihring taksa pua kaihthawh a ni lo. Tirhkoh Petera chuan Isua chungchângah, “Tisaah chuan tihthihin a awm a, thlarauvah erawh chuan  tihnunin a awm,” tiin a sawi. (1 Petera 3:18) Isua chu thlarau thiltithei tak nia kaihthawh a ni ta! (1 Korinth 15:3-6) Mahse, Bible chuan amah chauh a ni dâwn lo tih a sawi a ni.

23, 24. Isua sawi “pâwl tlêmte” chu tute nge ni a, mi engzât nge an nih dâwn?

²³ Isua chuan a thih hma lawk khân, a zirtîr rinawmte hnênah: “In tân hmun siamin ka kal dâwn hi,” tiin a hrilh a. (Johana 14:2) A hnungzuite zînga ṭhenkhat chu a hnêna awm tûrin vân nunna changin kaihthawh an ni dâwn tihna a ni. Mi eng zât nge kaihthawh ni dâwn? Isua chuan “pâwl tlêmte” tia a sawi avângin, mi tlêm tê chauh an ni ang. (Luka 12:32) Tirhkoh Johana chuan Isua leh vân lam “Zion Tlânga ding . . . mi 1,44,000” a hmuhna chuan a zât tûr chiah chu min hriattîr a ni.—Thu Puan 14:1.

²⁴ Eng hunah nge Kristian mi 1,44,000-te chu an thawh leh dâwn? Bible chuan Krista’n vâna ro a rêl hnuah a ni dâwn tih min hrilh a. (1 Korinth 15:23) Tûnah hian chu mi hunah chuan kan awm mêk a, mi 1,44,000-te zînga a tam zâwk chu vân nunna changa kaihthawh an ni tawh a ni. Tûna leia la awmte chu an thih veleh vân nunna chang tûra kaihthawh an ni nghâl ang. Mahse, mi a tam zâwkte chu nakina lei Paradis-ah kaihthawh an ni ang.

25. Bung 8-naah eng chungchâng nge kan zir ang?

²⁵ Rei lo têah Jehova’n thihna ata mihringte chu a chhuah zalên ang a, thihna chu chatuan atân a bo tawh ang! (Isaia 25:8 chhiar rawh.) A nih chuan, vâna kalte chuan eng nge an tih dâwn? Bible chuan Lalram sawrkârah Isua ro an rêlpui dâwn tih a sawi a ni. Bung 8-naah chu sawrkâr chungchâng chu kan zir belh ang.