BIBLE chuan Isua pian hun chiah min hrilh lo. Amaherawhchu, December thlaah a piang lo tih thu tlûkna siam theihna tûr chhan ṭha tak min pe a ni.

December thla vêla Isua pianna hmun Bethlehema sik leh sa awm dân chu lo ngaihtuah ta ila. Judate thla, Kisleu thla  (November/December thla vêl) chu a vâwtin, ruah a sur reng mai ṭhîn a. Chu mi thla dawttu chu Tebet thla (December/January thla vêl) a ni. Chu mi thla chu kum khata khaw vawh lai ber a ni a, tlâng ramah phei chuan a khât tâwkin vûr a tla ṭhîn. Chu lai hmuna sik leh sa awm dân chungchâng Bible-in min hrilh dân chu ilo en ang u.

Bible ziaktu Ezra chuan Kisleu thla chu khaw vawh lai leh ruah sûr lai a nihzia a târ lang a. Ezra chuan “thla kuana [Kisleu], ni sawmhnih” nîa Jerusalema mipui an pun khâwm thu a sawi hnuah, mipuite chu “ruahpui nasa tak a sûr avâng chuan an khûr an khûr mai” tih a sawi a ni. Chu mi hun laia sik leh sa awm dân chungchângah, mipui pungkhâwmte ngei chuan: “Ruah sûr hun lai a lo ni bawk si a, pâwnah hian kan ding reng thei lo va,” tiin an sawi a ni. (Ezra 10:9, 13; Jeremia 36:22) December thla a lo thlen chuan, Bethlehem leh a chheh vêla awm berâm vêngtute’n an berâmte zâna an chhuahpui lo pawh chu a mak lo ve!

Amaherawhchu, Bible chuan berâm vêngtute’n Isua pian zâna phûla berâm an vên thu min hrilh a. Dik takin, Bible ziaktu Luka chuan chutih hun lai chuan berâm vêngtute chuan Bethlehem khaw kiangah “zânah an berâmho an vêng a, phûlah an riah chilh” thu min hrilh a ni. (Luka 2:8-12) Berâm vêngtute chu chhûn êngah an kal chhuak mai ni lovin, zânah an berâmte chu phûlah an riah chilh tih chhinchhiah ang che. December thla ruah tam laia Bethlehem khaw vâwt vur mai leh phûla riah chhuah chu a inmil thei em? Thei lo. Chuvângin, Isua pian laia thilthlengte chuan December thlaa Isua a pian lohzia a târ lang a ni. *

Pathian Thu chuan Isua thih hun chiah chiah chu min hrilh a; mahse, a pian hun chiang taka hriat fak theihna erawh min pe tam lo hle. Hei hian Lal Solomona thusawi: “A ṭha zâwk e hming ṭha, hriak to aiin, pian nî aiin thih nî,” tih chu min hriatchhuahtîr a ni. (Thuhriltu 7:1) Chuti chu, Bible-in Isua rawngbâwlna leh a thih chungchâng thu tam tak chipchiar taka min hrilh laia a pian dân chanchin kim chang taka min hrilh lo pawh hi a mak lo ve.