RORELNA Nî hi engtin nge i mitthla? Mi tam tak chuan mi chhiar sen lohte chu a mal malin Pathian lalṭhutphah hmaa hruai an ni ang a, a mal mala rorêlsak an ni ang; a ṭhen chu vâna hlim taka awm tûra lâwmman pêk an ni ang a, a ṭhen erawh chu chatuana hrem atân thiam loh chantîr an ni ang, tih ngaih dân an nei a ni. Mahse, Bible chuan rorêlna nî hi thil dang daih angin a sawi thung a. Pathian thu chuan chu hun chu hun râpawm tak angin a sawi lo va, beiseina hun leh Siam ṭhatna hun angin min hrilh zâwk a ni.

Thu Puan 20:11, 12-ah chuan Tirhkoh Johana’n Rorêlna Nî chungchâng a sawi chu kan hmu a ni: “Lalṭhutphah lianpui vâr tak leh a chunga ṭhu chu ka hmu a, a hma ata chu lei leh vân an tlân bo va, an tân hmun reng a awm ta lo va. Tin, mitthite, alian atêin, lalṭhutphah hmâa ding ka hmu a; tin, lehkhabu an hawng a; tin, lehkhabu dang, Nunna Bu chu an hawng bawk a; tin, mitthite chu lehkhabutea ziak an thiltih ang zêla rêlsakin an awm ta a,” tiin. Heta rorêltu hi tunge ni?

Pathian Jehova chu mihringte chunga rorêltu sâng ber a ni  a. Mahse, chu hna chu mi dang hnênah a hlân chhâwng a ni. Tirhkohte 17:31-ah chuan, tirhkoh Paula chuan “a mi ruata chu, leia mite fel takin a ngaihtuahtîr ang” tih min hrilh a ni. Chu rorêltu atâna mi ruat chu Isua Krista a ni. (Johana 5:22) A nih leh, engtikah nge Rorêlna Nî chu a inṭan? Chu chuan eng chen nge a awh ang?

Thu Puan bu chuan Rorêlna Nî chu he leia Setana khawvêl zawng zawng tihchhiat a nih hun, Armageddon zawhah a inṭan ang tih min hrilh a ni. * (Thu Puan 16:14, 16;19:19–20:3) Armageddon zawhah, Setana leh a ramhuaite chu kum sângkhat chhûng leilâwtah khung an ni ang a. Chu mi chhûng chuan, vân lama Isua ro luahpuitu tûr mi 1,44,000-te chu rorêltute niin, lal angin “kum sângkhat atân Krista nên rorêlin an awm” dâwn a ni. (Thu Puan 14:1-3; 20:1-4; Rom 8:17) Rorêlna Nî chu darkâr 24 chhûnga hmanhmawh taka lo thleng tûr a ni lo. Kum sângkhat chhûng awh tûr a ni.

Chu kum sângkhat chhûng chuan, Isua Krista chuan ‘mi nung leh mitthite chu a ngaihtuah ang a.’ (2 Timothea 4:1) “Mi nung” tih chu Armageddon-a dam khawchhuak “mipui tam tak” sawina a ni. (Thu Puan 7:9-17) Tirhkoh Johana pawhin “mitthite . . . [rorêlna] lalthutphah hmaa ding” a hmu bawk a. Isua tiam angin, “thlâna awm zawng zawngin [Krista] aw an hria ang a, an chhuak vek ang.” (Johana 5:28, 29; Tirhkohte 24:15) A nih leh, eng ṭanchhanin nge ro rêlsak an nih ang?

Tirhkoh Johana’n inlârnaa a hmuh angin, “lehkhabute an hawng a,” tin, “lehkhabua ziak an thiltih ang zêla rêlsakin an awm ta a.” Chûng lehkhabua thu inziakte chu khawvêla an damlaia an thiltih tawhte em ni? Ni lo ve, rorêlna chuan mite an thih hmaa an thiltihte chu a ṭanchhan lo vang. Chu chu engtin nge kan hriat theih? Bible chuan: “Tupawh thi tawh chu sual lakah a chhuak tawh si a,” tiin min hrilh a ni. (Rom 6:7) Chuvângin, tholehte chu sualna nei lovin an lo nung leh a tih theih a. Chuti chu, lehkhabute chuan Pathian thil phût dangte a entîr ngei ang. Chatuana nung tûr chuan, Armageddon-a dam khawchhuakte leh tholehte chuan kum sâng rorêl chhûnga a  thil phût tharte pawh tiamin Pathian thupêk rêng rêng chu an zawm a ngai a ni. Chuvângin, mite chu Rorêlna Nî chhûnga an thiltih ang zêla rorêlsak an ni ang.

Rorêlna Nî chhûng chuan, mi chhiarsên lohte chuan Pathian duhzâwng zir a, chu mi mila nun theihna hun remchâng chu a hmasa ber atân an nei ang. Chuti a nih chuan, inzirtîrna hna nasa taka thawh a ni dâwn tihna a ni. Dik takin, “khawvêla awmte chuan felna chu an zir” ang. (Isaia 26:9) Mahse, mi zawng zawngin Pathian thu anga awm chu an thlang kher lo vang. Isaia 26:10 chuan: “Mi suaksual chu duhsakin awm mah sela, felna a zir chuang hlei lâwng e: dikna ramah chuan dik lo takin a ti ang a, LALPA ropuina a hmu chuang lo vang,” a ti a ni. Chutiang mi suaksualte chu Rorêlna Nî chhûng la laa tihboral hlen an ni ang.—Isaia 65:20.

Rorêlna Nî a zawh hunah chuan, chuta dam khawchhuakte chu mi ṭha famkim niin ‘an nung’ tawh ang. (Thu Puan 20:5) Chuvângin, Rorêlna Nî chhûng chuan mihringte chu atîra Pathian thiltum angin an ṭha famkim tawh ang. (1 Korinth 15:24-28) Tichuan, fiahna hnuhnûng ber chu a lo thleng ang a. Setana chu a tânna hmun ata chhuah a ni ang a, a tâwp ber atân mihringte bum tuma a beih leh chu phalsak a ni ang. (Thu Puan 20:3, 7-10) Chutih huna lo dodâl tlattute chuan Bible thutiam: “Mi felte chuan ram hi an luah ang a, a chhûngah hian kumkhuain an awm ang,” tih hi a takin an chên tawh ang. (Sâm 37:29) Ni e, Rorêlna Nî chu mi rinawm zawng zawngte tân chuan malsâwmna a ni dâwn a ni.