ENG chanchinbu pawh chhiar rawh. TV enin, radio pawh ngaithla rawh. Dân bawhchhiatna te, indona te, leh fîrfiaka chêtna te chungchâng hriat tûr a va tam êm! Harsatna i tawhte chu han ngaihtuah bawk teh. Natna emaw, i hmangaih tak boralna emaw chuan nasa takin a tilungngai che pawh a ni thei a. Hmân laia mi ṭha, a mangannate ‘tuipui ṭiau aia rit zâwk’ nia sawitu Joba ang chu niin i inhre hial thei a ni.—Joba 6:2, 3.

Heti hian inzâwt rawh:

• Hei hi maw kei leh mi dangte tâna Pathian thiltum chu?

• Ka harsatna tawhte hmachhawn thei tûrin khawi aṭangin nge ṭanpuina ka hmuh ang?

• Leiah hian remna kan hmu ngai ang em?

Bible chuan hêng zawhnate atân hian chhânna lungawithlâk tak a pe a ni.

“An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”—Thu Puan 21:4

“Ke baite chu sakhi angin an zuang ang.”—Isaia 35:6

“Mitdelte mit chu tihmenin a awm ang.”—Isaia 35:5

 “Thlâna awm zawng . . . an chhuak vek ang.”—Johana 5:28, 29

“Chu mi khuaa awm chuan ‘Ka dam love,’ a ti lo vang.”—Isaia 33:24

“Leiah, . . . buh tam tak a awm ang.”—Sâm 72:16

Phêk hmasa lama târ lan tâk thute hi duhthusâm thil maiah ngaiin, hnâwl nghâl mai suh. Pathian chuan hêng thilte hi tihhlawhtlinsak min tiam a; tin, a tihhlawhtlin dân tûr pawh Bible chuan a hrilhfiah a ni.

Chu bâkah, Bible chuan ṭangkaina dang tam tak a nei a. Tûn hun la laa nun lungawithlâk tak neih theihna tûr min pe a ni. I thil lungkham leh buaina i tawhte chu han ngaihtuah lawk teh. Chûng zîngah chuan sum leh pai neih lohna te, chhûngkaw buaina te, hrisêl lohna te, a nih loh leh hmangaihte sûnna te pawh a tel thei a ni. Bible chuan tûn laia harsatnate hmachhawn tûrin a ṭanpui thei che a, a hnuaia târ lan zawhnate hi chhângin min chhâwk zângkhai thei bawk:

• Engvângin nge hrehawm kan tawrh?

• Engtin nge nuna lungngaih manganna kan tawrh chhuah theih?

• Engtin nge kan chhûngkua hlim lehzual tûra kan siam theih ang?

• Kan thih hian kan chungah eng thil nge thleng?

• Kan hmangaih thi tate chu kan hmu leh ngai ang em?

• Pathianin nakin hun atâna a thutiamte a hlen ang tih engtin nge kan rin tlat theih?

 Tûna he lehkhabu i chhiarna ringawt pawh hian Bible zirtîrna hmuh chhuah i duhzia a lantîr a. He lehkhabu hian a ṭanpui dâwn che a ni. Paragraph tinte chuan a phêk hnuaiah zawhna a nei zêl tih chhinchhiah ang che. Mi maktaduai tam takte chuan Jehova Thuhretute nêna chutiang zawhnate hmanga Bible sawihona neih chu nuam an ti hle. Nang pawhin nuam i tih kan beisei a. Bible zirtîrna dik tak zirna phûrawm tak leh lungawithlâk tak i neih laiin, Pathian malsâwmna i dawn ngei kan duhsak a che.