1, 2. Tûn laiah hian khawi aṭangin nge inhumhimna tûr hmun him tak kan hmuh theih ang?

THLIPUI tleh nîa kal chhuak angah han inchan teh. Khua chu a lo dur khup mai a. Kâwlte lo phe zawr zawrin, khawpui a rawn ri dur dur a; tin, ruahpui vânâwn a rawn sûr ta chiam bawk a. Hmanhmawh takin, tawm hulna tûr i zawng ta ruai mai a ni. Chutah le, kawng sîrah chuan tawmna tûr in i hmu ta hlauh mai a. Chu in chu a ṭha a, a hulin a nawm hmêl êm êm bawk si. Chu hmun him tak mai chu i va han ngaihlu dâwn em!

² Tûnah hian thlipui nuai vêl ang mai hun hrehawm takah kan chêng mêk a. Khawvêl dinhmun hian chhiat lam a pan zêl a. Mahse, tawm hulna tûr in, chatuana chhiatna laka min hum thei tûr kan nei a ni. Chu chu eng nge ni? Bible zirtîrna hi lo chhinchhiah teh: “LALPA chung thu-ah chuan, ‘Ani chu ka inhumhimna leh ka kulhpui; ka Pathian, ka rina chu a ni,’ ka ti ang,” tih hi.—Sâm 91:2.

3 Engtin nge Jehova chu kan inhumhimna kan nihtîr theih?

³ Han ngaihtuah teh! Siamtu leh lei leh vâna  Lalchungnungber chu kan inhumhimna a ni thei a nih chu. Ani chuan min tina thei thil leh min tina theitu apiangte aia thil a tihtheih zâwk fê avângin, min humhim thei a. Tihnat pawh lo ni ta tehrêng ila, Jehova chuan thil ṭha lo sawhkhâwk zawng zawngte chu a sût leh vek thei a ni. Engtin nge Jehova chu kan inhumhimna kan nihtîr theih ang? Chutiang nihtîr tûr chuan amah kan rin tlat a ṭûl a. Chu bâkah, Pathian Thu chuan: “Pathian hmangaihnaah chuan invawng ṭha rawh u,” tiin min fuih bawk a ni. (Juda 21) Ni e, kan Pa vâna mi nêna inzawmna vawng ṭha rengin, a hmangaihnaa kan awm reng a ngai a ni. Tichuan, ani chu kan inhumhimna a ni tih kan ring tlat thei ang. Mahse, engtin nge chutiang inzawmna nghet chu kan siam theih ang?

4, 5. Jehova’n kan chunga hmangaihna a lantîr dân kawng ṭhenkhat chu eng nge ni?

⁴ Pathian hmangaihnaa awm reng tûr chuan Jehova’n kan chunga hmangaihna a lantîr dân kan hriatthiam a ngai a. He lehkhabu ṭanpuinaa Bible zirtîrna i zir tâk ṭhenkhat chu lo ngaihtuah ta la. Jehova chuan Siamtu a nih angin, he lei hi kan chênna hmun nuam tak ni tûrin min pe a. Chu chu ei leh in tûr tam tâwk tak te, leilung hausakna te, rannung chi hrang hrang te, leh ram mawi tak taktein a tikhat vek a ni. Bible ziaktu a nih angin, Pathian chuan a hming leh a miziate chu min hriattîr a. Chu bâkah, a Thu chuan a Fapa mal neih chhun chu he leiah hian rawn tîrin, kan tâna hrehawm tuara a thih a phal thu a târ lang bawk a ni. (Johana 3:16) Chu thilpêk chu kan tân eng thil neih theihna nge ni? Chu chu hma lam hun beiseina ropui tak neih theihna a ni.

⁵ Kan hma lam hun beiseina chu Pathian thiltih dangah a innghat tel bawk. Jehova chuan vân lam sawrkâr, Messia Lalram chu a din a. Chu chuan hrehawm tawrhna zawng zawngte a titâwp thuai ang a, lei pum pui hi paradis-ah a chantîr dâwn a ni. Han ngaihtuah teh! Chutah chuan chatuanin hlim tak leh remna chênin kan nung thei tawh dâwn a nih chu. (Sâm 37:29) Chu mi hun a lo thlen hma chuan, Pathianin tûn la  laa nun dân tûr ṭha bera kan nun theih nân kaihhruaina min pe a ni. Tin, amah nêna inbiak pawh theihna, a hnêna ṭawngṭai theihna thilpêk chu min pe bawk. Hêngte hi, Jehova’n mi nâwlpuite leh a mi mala a hmangaihna che a lantîr dân kawng tam takte zînga ṭhenkhat chauh a ni.

6. Engtin nge i chunga Jehova lantîr hmangaihna chu i chhân lêt theih?

⁶ Zawhna pawimawh tak i inzawh tûr chu hei hi a ni: Engtin nge Jehova hmangaihna chu ka chhân lêt ang?, tih hi. Mi tam tak chuan, “Jehova chu ka hmangaih lêt a ngai a ni,” an ti ngei ang. Chu chu i ngaih dân a ni ve em? Isua chuan he thupêk hi thupêk zawng zawng zînga ropui ber a ni a ti: “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,” tih hi. (Matthaia 22:37) Pathian Jehova hmangaih chhan tûr tam tak i nei ngei mai a. Mahse, chutiang hmangaihna nei nia inhriatna mai chu em ni, Jehova chu i thinlung, thlarau, leh rilru zawng zawnga hmangaihnaa thil tel chu?

7. Pathian hmangaihnaah chuan rilrua hmangaihna neih aia tam a tel em? Hrilhfiah rawh.

⁷ Bible-in a sawi angin, Pathian hmangaihna chu rilrua hmangaihna neih mai a ni lo. Dik tak chuan, rilrua Jehova hmangaihna neih chu thil ṭûl tak a nih rualin, chu chu amah hmangaihna tak tak neih ṭanna chauh a la ni. Entîr nân: Rah chhuah thei tûr khawpa puitling apple kûng neih theih nân, apple chi chu a pawimawh ngei mai; mahse, chu chu a kûng lo inṭanna tûr mai a la ni. Apple i ei duh laiin, miin a chi ringawt pe ta che sela, i lungâwi tâwk ang em? Lungâwi tâwk hauh lo vang! Chutiang bawkin, rilrua Pathian Jehova hmangaihna neih chu a bul ṭanna chauh a ni. Bible chuan: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin min zirtîr a ni. (1 Johana 5:3) Dik taka sawi chuan, Pathian hmangaihna chuan rah ṭha a chhuah tûr a ni a. Thiltiha lan chhuahtîr tûr a ni.—Matthaia 7:16-20.

8, 9. Engtin nge Pathian kan hmangaihna leh kan ngaihhlutna chu kan lantîr theih?

 ⁸ Pathian kan hmangaihna chu a thupêkte zâwm a, a thu bulte nunpuiin kan lantîr a. Chu chu thil harsa lutuk a ni lo. Phur rit nih ahnêkin, Jehova dânte chu nun ṭha, hlimawm, leh lungawithlâk tak kan neih theih nâna siam a ni zâwk a ni. (Isaia 48:17, 18) Jehova kaihhruaina nêna inmila nungin, kan Pa vâna mi hnênah chuan kan tâna a thiltih zawng zawngte kan ngaihhlut tak zetzia kan lantîr a ni. Mahse, lungchhiatthlâk tak maiin, tûn laia mi tlem tê chauhvin chutianga ngaihhlutna chu an lantîr a. Keini erawh chuan, Isua leia a lo kal laia mi ṭhenkhatte anga lâwm nachâng hre lo mi nih chu kan duh lo. Chutih lai chuan Isua’n phâr sâwm a tidam a; mahse, lâwmthu sawi tûrin pakhat chauh a lo kîr leh a nih kha. (Luka 17:12-17) Lâwm nachâng hre lo mi pakuate ang ni lo va, lâwm nachâng hria mi pakhat ang nih chu kan duh ṭheuh ngei ang!

⁹ A nih leh, Jehova thupêk kan zawm ngei tûr chu engte nge ni? He lehkhabuah hian, engemaw zât chu kan sawiho tawh nâ a, tlêm azâwng lo ennawn leh ta ila. Pathian thupêkte zawmna chuan A hmangaihnaa awm reng tûrin min ṭanpui ang.

10. Pathian Jehova hriatna neih belh zêl a pawimawh chhan hrilhfiah rawh.

¹⁰ Jehova chungchâng zir chu amah hnaih lehzual nâna rahbi pawimawh tak a ni a. Chu chu thiltih chhunzawm reng tûr a ni. Khaw vawh êm êm zânin pâwnah meilum ai ta la, i mei chhêm chu tuah belh miah lovin i mihtîr mai ang em? Mihtîr hauh lo vang. A mih mai loh nân thing i tuah belh zêl zâwk ang. Chutilochuan, i nunna chu dinhmun hlauhawm takah a awm thei asin! Thingin mei a tih alh belh zêl angin, “Pathian hriatna” chuan Jehova kan hmangaiha chu a tizual sauh va ni.—Thufingte 2:1-5.

11. Isua zirtîrna khân a hnungzuitute chungah nghawng eng nge a neih?

¹¹ Isua chuan a hnungzuitute chu Jehova an hmangaihna leh thutak awmna A Thu, Bible hlu tak an ngainatna chu vawng nung renga mei anga ti alh reng tûrin a duh a. A thawhleh hnuah pawh, Isua chuan a zirtîr pahnihte chu Thuthlung Hlui bua hrilh lâwkna thu ṭhenkhat a chunga thleng famkimte chu a hrilhfiah ani. Chu chuan eng nge a rah chhuah? A hnuah anni chuan: “Kalkawnga min biak laia Pathian Lehkha Thute min hrilhfiah lai khân kan thinlung a harh huai rêng lâwm ni kha?” tiin an sawi a ni.—Luka 24:32.

12, 13. (a) Tûn laia mi tam zâwkte Pathian hmangaihna leh Bible ngainatna chu engtin nge a awm? (b) Engtin nge kan hmangaihna chu a daih loh nân kan vênhim theih?

¹² Bible zirtîrna dik takte i han zir ṭantirh chuan, i thinlung chu hlimna, ṭhahnemngaihna, leh Pathian hmangaihnain a khat liam em? A khat liam ngei ang. Mi tam tak chuan chutiang chu niin an inhria a ni. Chu hmangaihna nasa tak neih reng leh tihpun lehzual chu thil harsa tak mai a ni. He khawvêla mite chîn dân zui chu kan duh lo. Isua chuan: “Mi tam zâwk hmangaihna chu a la dai ang,” tiin a hrilh lâwk a. (Matthaia 24:12) Engtin nge Jehova leh Bible thutak i hmangaihna chu dai lo tûrin i vênhim theih ang?

¹³ Pathian Jehova leh Isua Krista hriatna chu neih belh zêl rawh. (Johana 17:3) Pathian Thu aṭanga i thu zirte chu ngun taka chhûtin, ‘Hei hian Jehova chungchâng eng nge min zirtîr? Hei hian Jehova chu ka thinlung, ka thlarau, ka rilru zawng zawnga ka hmangaihna tûr chhan dang eng nge min pêk belh?’  tihte inzâwt ṭhîn ang che. (Sâm 77:12) Chutianga ngun taka chhûtna chuan Jehova i hmangaihna chu mei anga tinung reng tûrin a ṭanpui ang che.

14. Engtin nge ṭawngṭaina chuan Jehova kan hmangaihna tinung reng tûra min ṭanpui theih?

¹⁴ Jehova kan hmangaihna mei anga tihnun reng theih dân kawng dang leh chu, a hnêna ṭawngṭai ziah hi a ni. (1 Thessalonika 5:17) He lehkhabu Bung 17-naah khân, ṭawngṭai hi Pathian thilpêk hlu tak a ni tih kan zir tawh a. Mihringte inlaichînna pawh zalên taka inbiak pawh rengna aṭanga lo awm a nih ang bawkin, Pathian Jehova nêna kan inlaichînna pawh ṭawngṭaia amah kan biak fona hmangin kan chhawm nung reng thei a ni. Kan ṭawngṭaina chu rilru tel lo emaw, awmze nei lo emawa chham ngai chham nawn tlut tlut mai nihtîr loh chu a pawimawh hle. Naupangin a pa a hmangaih tak a bia ang maiin, Jehova chu kan be tûr a ni a. Chutih rual chuan zah tak chung siin, inhawng tak leh thudik tak sawiin thinlung chhûngril tak aṭangin kan be tûr a ni. (Sam 62:8) Ni e, mahnia Bible zirna leh ṭawngṭaina chu kan biakna pêng pawimawh tak mai a ni a, chûng chuan Pathian hmangaihnaa awm reng tûrin min ṭanpui a ni.

15, 16. Engvângin nge Lalram thuhrilh rawngbâwlna chu hun remchâng ropui tak leh ro hlu anga kan ngaih ang?

¹⁵ Mi mala Bible zirna leh ṭawngṭainate chu kan biakna thiltih mahnia kan tih theihte a ni a. Mahse, tûnah chuan vântlâng hriata kan tih Pathian biakna pêng dang, mi dangte hnêna kan thurinte hrilhhriat chu lo ngaihtuah ta ila. Mi dangte hnênah Bible thutak ṭhenkhat i hrilh tawh em? I hrilh tawh a nih chuan, Jehova pêk che a rawngbâwl theihna hun remchâng ropui tak i nei tihna a ni. (Luka 1:74, 75) Pathian Jehova chungchâng kan zirte mi dangte hnêna kan hrilh chhâwn hian, Kristian dik zawng zawngte thawh atâna pêk hna pawimawh tak mai—Pathian Ram chanchin ṭha hrilhna—chu kan thawk tihna a ni bawk.—Matthaia 24:14; 28:19, 20.

¹⁶ Tirhkoh Paula chuan a rawngbâwlna chu a ngaihlu êm êm a, “ro” tiin a ko hial a ni. (2 Korinth 4:7) Pathian Jehova leh  a thiltum chungchâng mi dangte hnêna hrilh chu, i hnathawh theih zawng zawng zînga hna ṭha ber a ni: Pu ṭha ber rawngbâwlsakna a nih bâkah, lâwmman ṭha ber dawn theihna a nih avângin. He rawngbâwlnaa i tel hian, thinlung ṭha pu mite chu kan Pa vâna mi i hnaihtîr bâkah, chatuana nunna kawngah i hruai bawk tihna a nih chu! Chu aia hna lungâwithlâk zâwk eng  nge awm thei chuang ang? Chu bâkah, Jehova leh a Thu chungchâng mi dangte i hrilhna chuan nangma rinna ngei chu tipungin, amah i hmangaihna a tinghet sauh bawk a. Tin, Jehova chuan i thawhrimna chu a ngaihlu hle bawk a ni. (Hebrai 6:10) Chutiang rawngbâwlnaa i buai rengna chuan Pathian hmangaihnaa awm reng tûrin a ṭanpui ang che.—1 Korinth 15:58.

17. Engvângin nge Kristian rawngbâwlna chu tûn laiah hian a hmanhmawhthlâk êm êm?

¹⁷ Tûn laiah hian, Lalram thuhrilh chu a hmanhmawhthlâk hle tih hriat reng a pawimawh a ni. Engvângin nge? Pathian Thu chuan: “LALPA ni ropui tak chu a hnai e, a hnaiin a thleng thuai dâwn a ni,” tia min hrilh avângin. (Zephania 1:14) Ni e, Jehova’n he khawvêl kalhmang zawng zawng a tihtâwp hun chu a lo thleng thuai dâwn a. Mite chu vaukhân an ngai a ni! Tûn hi an lal chungnungber atâna Jehova an thlan hun tûr a ni tih an hriat a ngai a ni; tâwpna chu ‘a tlai dâwn si lo va.’—Habakuka 2:3.

18. Engvângin nge Kristian dikte ruala vântlâng hmaah Jehova kan biak ang?

¹⁸ Jehova chuan Kristian dikte ruala vântlâng hmaa amah be tûrin min duh a. Chuvângin, a Thu chuan: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tiin min hrilh a ni. (Hebrai 10:24, 25) Inkhâwmnaa Kristian unaute nêna kan inhmuhkhâwm hian, kan Pathian duh tak mai chawimawi theihna leh biak theihna hun rengchâng ṭha tak kan nei a. Tin, keimahni pawh kan infuih tawnin, kan intichak tawn bawk a ni.

19. Engtin nge Kristian kohhran chhûnga inhmangaihna awm chu kan tihngheh sauh theih?

¹⁹ Jehova betu dangte nêna kan inkawm hian, kohhran chhûnga hmangaihna leh inṭhian ṭhatna awm chu kan tinghet sauh va. Jehova’n kan ṭhatna laite min ensak ang bawkin, kan ṭhatna laite inensak ṭheuh chu a pawimawh a ni. I rinpuite chu an ṭhat famkim beisei lo la. Mi tinte hi thlarau lama kan ṭhan chhoh dân a inchen vek lo tih leh kan vai hian thil kan tisual ṭheuh tih chu hre reng ang che. (Kolossa 3:13) Jehova hmangaih  tak zettute chauh ṭhiana siam tum la, tichuan thlarau lamah i ṭhang chho vang. Ni e, i thlarau lam unaute nêna Jehova chibai bûkhona chuan Pathian hmangaihnaa awm reng tûrin a ṭanpui ang che. Engtin nge Jehova chuan rinawm taka amah chibai bûk a, a hmangaihnaa awm rengte hnênah lâwmman a pêk?

20, 21. “Nunna taktak” chu eng nge ni a, engvângin nge chu chu beisei tûr ropui tak a nih?

²⁰ Jehova chuan a chhiahhlawh rinawmte chu lâwmmanah nunna a pe ṭhîn a; mahse, eng ang nunna nge a pêk? Aw le, tûnah hian i nung tak tak em? Tam tak chuan, ‘A chhânna chu a chiang sa reng alâwm,’ an ti ngei ang. Tihah chuan, kan thaw a, kan eiin kan bâr a, kan in bawk si a. Chu chu kan nung tihna a ni ngei mai. Chu bâkah, kan hlim lai tak phei chuan, “Dam man a va awm tak êm!” an ti hial a ni. Mahse, Bible chuan kawng pawimawh tak pakhatah, tûn laia mihring tumah hi an nung tak tak lo tih a târ lang thung.

²¹ Pathian Thu chuan ‘nunna taktak chu vuan tlat’ tûrin min fuih a. (1 Timothea 6:19) Chu ṭawngkam chuan “nunna taktak” chu nakina kan la neih chauh tûr thil a ni tih a târ lang a ni. Ni e, ṭha famkim kan nih hunah chuan, Pathianin a tîra kan nun dân tûra a ruahman ang taka kan nun tawh dâwn avângin, kan nung tak tak tawh ang. Paradis-a hrisêlna, remna, leh hlimna famkim chêna kan nun hunah chuan, “nunna taktak”—chatuana nunna chu kan chên tawh ang. (1 Timothea 6:12) Hei hi beisei tûr ropui tak a ni lâwm ni?

22. Engtin nge ‘nunna taktak chu i vawn tlat’ theih?

²² Engtin nge ‘nunna taktak chu kan vawn tlat’ theih ang? Paula chuan chu mi chungchângah tho chuan Kristiante chu “thil ṭha ti tûrin, thil ṭha tih ngah tûrin” a fuih a. (1 Timothea 6:18) Chuvângin, Bible aṭanga kan thu zirte kan nunpui leh pui lovah a innghat thui hle a ni tih a lang chiang hle. A nih leh, Paula chuan “nunna taktak” chu thil ṭha tihna hmanga kan hlawh chhuah a ni a tihna a ni em? Ni lo ve. Chutiang beisei tûr ropui tak chu Pathian “khawngaihna” kan dawn leh dawn lovah a innghat tlat zâwk a ni. (Rom 5:15) Amaherawhchu, Jehova  chuan rinawm taka a rawngbâwltute lâwmman pêk chu nuam a ti a. “Nunna taktak” i nei hmuh chu a duh a ni. Pathian hmangaihnaa awm rengte chu chutiang nun hlim, nun râl muang, leh chatuana nunna chuan a hmuak reng a ni.

23. Engvângin nge Pathian hmangaihnaa awm reng chu thil pawimawh tak a nih?

²³ Kan vai hian he zawhna hi kan inzâwt ṭheuh tûr a ni, ‘Pathian chu a duh dân Bible-a a târ lan angin chibai ka bûk em?’ tiin. Nî tin a duh dân anga amah chibai kan bûk zêl a nih chuan, kawng dikah kan kal tihna a ni a. Jehova chu kan inhumhimna a ni tih kan ring tlat thei ang. Ani chuan a mi rinawmte chu he kalhmang hlui buai tak tâwpnaah hian a humhim ang a. Tin, Jehova chuan nakin lawka lo thleng mai tawh tûr kalhmang thar ropui takah chuan min hruaikai dâwn a ni. Chu mi hun kan thlen hun chuan kan va phûr dâwn êm! He tâwpna huna duhthlanna dik kan lo siam avângin kan va lâwm dâwn êm! Chutiang duhthlanna chu tûnah i siam a nih chuan, Pathianin atîr tê aṭanga a lo ruahman tawh angin, “nunna taktak” chu chatuanin i chên thei dâwn zu nia!