I BIBLE hman laiah engtin nge Sâm 83:18 thu chu a inziah? Bible Society of India tihchhuah Mizo Bible chuan he châng hi: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a letling a. Bible lehlin dang ṭhenkhat pawhin chutiang bawk chuan a letling a ni. Mahse, lehlin tam tak chuan Jehova tih hming chu paih bovin, a aiah nihna sawina “LALPA” emaw, “PATHIAN” emaw an dah zâwk a. He chângah hian a eng hi nge hman zâwk tûr? Nihna nge ni a, mi mal hming Jehova?

He Bible châng hian mi mal hming chungchâng a sawi a. Bible bu tam takte atîra ziakna Hebrai ṭawngah chuan, he Bible chângah hian hming bil danglam bîk tak a chuang a. Hebrai hawrawpah chuan יהוה (YHWH) tih a ni. Mizo ṭawngah chuan “Jehova” tia lehlin a ni tlângpui ṭhîn. Chu hming lanna chu Bible châng pakhatah chauh em ni? Ni lo ve. Atîra ziak Hebrai ṭawngah chuan vawi 7,000 dâwn lai a lang a ni.

Pathian hming chu eng ang khawpa pawimawh nge ni? Isua’n Lal Ṭawngṭaina min zirtîr kha han ngaihtuah teh. Hetiang hian a inṭan a ni: “Kan Pa vâna mi, i hming zahawm rawh se,” tiin. (Matthaia 6:9) A hnuah, Isua chu Pathian hnênah hetiang hian a ṭawngṭai a ni: “Ka pa, i hming chawimawi rawh,” tiin. Pathian chuan vân aṭangin: “Ka chawimawi tawh, ka chawimawi leh bawk ang,” tiin a rawn chhâng a ni. (Johana 12:28) Pathian hming chu thil pawimawh ber a ni tih a chiang hle. Chuti a nih chuan, engvângin nge ṭawng letlingtu ṭhenkhatin an Bible lehlinah chu hming chu paih bo va, a aiah a nihnate an dah zâwk mai le?

A chhan bul pahnih a awm niin a lang. A hmasa berin, mi tam tak chuan atîra lam dân dik tak hriat chiah a nih tawh loh avângin a hming kan hmang tûr a ni lo, an ti a. Hmân lai Hebrai ṭawng chu vowel tel lova ziak a ni ṭhîn. Chuvângin, tûn laiah hian tumahin Bible hun laia YHWH thu mal an lam rîk dân chiah chu an hre thei tawh lo. Mahse, chu chu Pathian hming hman loh phahna tûr a ni  em? Bible hun lai chuan, Isua hming pawh chu Yeshua emaw, Yehoshua emaw tia lam rîk a nih hmêl hle a—tumahin a lam dân dik tak an sawi thei tawh lo. Chutichung chuan, tûn lai khawvêl hmun hrang hranga mite hian Isua hming chu an ṭawng hman nêna inmilin chi hrang hrangin an lam tho va. Anni chuan kum zabi khatnaa an lam rîk dân chiah an hriat chian loh mai avângin, Isua hming lam chu an hreh phah chuang lo. Chutiang bawkin, ram danga i zin chhuah chuan, i hming pawh hmun hrang hranga mite chuan i lam dân lo deuhvin an lam mai thei. Chuvângin, hmân laia Pathian hming an lo lam dân chiah hriat chian lohna chu, a hming lam loh phahna tûr a tling lo a ni.

Pathian hming Bible aṭanga tihbo a nih chhan dang leh nia an sawi chu, hmân lai aṭang tawha Juda-ho neih thurochhiah vâng a ni a. An zînga mi tam tak chuan Pathian hming chu lam rîk ngai loh tûr, tih an ring tlat a ni. Chu rinna chu Bible dân pakhat: “LALPA i Pathian hming chu i lam mai mai tûr a ni lo; LALPA chuan a hming lam mai mai chu thiam loh chantîr lohvin a chhuah dâwn si lo va,” tih a dik lozâwnga hman vâng ni ngeiin a lang.—Exodus 20:7.

He dân hian Pathian hming a ni lozâwnga hman a khap tlat a. Mahse, chu chuan a hming zahawm taka hman chu a khap tlat em? Khap lo ve. Hebrai Bible (“Thuthlung Hlui”) ziaktute chu an vaiin mi rinawm tak, Pathianin hmân lai Israelte hnêna a pêk Dân hnuaia intulût vek an ni a. Mahse, anni chuan Pathian hming chu an hmang fo a ni. Entîr nân, Pathian betu mipuite sak ṭhin fakna hla tam takah chuan Pathian hming a tel a. Pathian Jehova ngei chuan, amah be tute chu a hming lam tûrin a zirtîr a, anni chuan thu âwih takin an lam a ni. (Joela 2:32; Tirhkohte 2:21) Chuvângin, tûn laia Kristiante pawhin Isua ang bawkin, Pathian hming zahawm taka hman chu an hreh rêng rêng lo.—Johana 17:26.

Pathian hming aia a nihna an hman hian, Bible letlingtute chuan thil sual pawi tak an ti a ni. Bible chuan “LALPA . . . ṭhian” nih tum tûra min fuih laiin, anni chuan Pathian chu hnaih theih loh leh nêlawm lo tak angah an chantîr a ni. (Thufingte 3:32) I ṭhian duh tak pakhat han ngaihtuah teh. A hming takngial pawh hre lo ta la chuan, ani chu i ṭhian ṭha tak a ni thei ang em? Chutiang bawkin, mite’n Pathian hming Jehova an hriat loh chuan, engtin nge an hnaih tak tak theih ang? Chu bâkah, mite’n Pathian hming an hman loh hian, a hming awmze thûk tak pawh hi an hre ta lo a ni. Pathian hming awmzia chu eng nge ni?

 Pathian ngei chuan a hming awmzia chu a chhiahhlawh rinawm Mosia hnênah a hrilhfiah a. Mosia’n Pathian hming awmzia a zawh chuan Jehova chuan: “AWMA KA NI,” tiin a hming awmzia a hrilhfiah a. (Exodus 3:14) Rotherham-a Bible lehlin chuan chu lai thu chu: “Ka nih duh ang apiang chu ka ni ang,” tiin a let chhuak thung. Chuvângin, Jehova chu a thiltumte tihpuitlin nâna a ṭûl ang apiang a innihtîr thei tihna a ni.

I duh apiang ni thei tûrah han inchan chhin teh. I ṭhiante tân mi eng ang nge i nih dâwn? I ṭhian tuemaw chu dam lo ta se, doctor thiam takah inchantîrin i tidam ngei ang. I ṭhian dang leh chu sum dâwnna lamah tla chhe ta se, mi hausa taka changin, amah chu i tungding leh ngei bawk ang. Mahse, a nihna takah chuan, chutiangin i duh ang apiang chu i ni thei si lo. Kan zîngah hian chutianga duh ang apiang ni thei rêng rêng kan awm lo. Bible i han zir chhoh zêl hian, Jehova chu a thutiamte tihpuitlin nâna a ṭûl ang apiang a innihtîr theih dân mak tak chu i hmu chhuak ngei ang. Tin, ani chuan amah hmangaihtute tâna a thiltihtheihna hman chu a châk hle bawk. (2 Chronicles 16:9) Hêng Jehova mize duhawm takte hi a hming hre lote tân chuan hriat ngaihna a awm lo a ni.

Jehova hming chu Bible-ah a chuang tûr a ni tih a chiang hle. A hming awmzia hriat leh amah kan biaknaa zalên taka hman hi kan Pa Vâna mi, Jehova hnaih tûra min ṭanpuitu thiltithei tak a ni. *