1. Engvângin nge Ethiopia mi hotu lian khân baptisma chan a duh thu a sawi?

“EN TEH, heta hi tui a awm, baptisma channa tûr engin nge mi dâl kher?” Hei hi kum zabi khatnaa Ethiopia mi hotu lian pakhat zawhna siam a ni a. Kristian pakhat, Philipa chuan a hnênah Isua chu thutiam Messia a nihzia finfiahna a pe zo chiah a ni. Bible aṭanga a thu zir chuan a rilru a hneh  êm avângin, Ethiopia mi chu a che nghâl vat a. Baptisma chan a duh thu a sawi chhuak ta hial a ni!—Tirhkohte 8:26-36.

2. Engvângin nge baptisma chan chungchâng chu ngun taka i ngaihtuah ang?

² Jehova Thuhretute bula he lehkhabu bung hmasa lamte ngun taka i lo zir tawh chuan, ‘Baptisma channa tûr engin nge mi dâl kher?’ i ti ve duh tawh pawh a ni thei a. Tûnah chuan Bible-in Paradis-a chatuana nunna min tiam chungchâng chu i lo hre tawh a. (Luka 23:43; Thu Puan 21:3, 4) Mitthite dinhmun dik tak leh thawhleh beiseina chungchâng pawh i hre tawh bawk. (Thuhriltu 9:5; Johana 5:28, 29) Tin, Jehova Thuhretute inkhâwmnaahte telin sakhaw dik an vawn tlat dân nangmah ngeiin i hmu tawh pawh a ni thei bawk a. (Johana 13:35) Chûng aia pawimawh zâwk, Pathian Jehova nêna inlaichînna pawh i nei ṭan tawh mai thei bawk a ni.

3. (a) Isua’n a hnungzuitute hnênah eng thupêk nge a pêk? (b) Engtin nge tuia baptisma chu chan a nih?

³ Engtin nge Pathian rawng bâwl i duhzia i lantîr theih? Isua chuan a hnungzuitute hnênah: “Kal ula, hnam tina mi zirtîrahte siam ula, . . . baptis ula,” tiin a hrilh a ni. (Matthaia 28:19) Amah Isua ngei chuan tuia baptisma changin entawn tûr a siam a. Ani chu tuia theh a ni ringawt lo va, a lu chunga thlawr ringawt lah a ni hek lo. (Matthaia 3:16) “Baptist” tih thu mal chu Grik ṭawnga “chiah” tih thu mal awmze nei tak aṭanga lâk chhuah a ni a. Chuvângin, Kristian baptisma awmzia chu tuia chiah vek, a nih loh leh hnimpil vek tihna a ni.

4. Tuia baptisma channa hian eng nge a târ lan?

⁴ Tuia baptisma chan chu Pathian Jehova nêna inlaichînna nei duh apiangte tâna tih ngei ngei tûr a ni. Baptisma channa chuan Pathian rawng bâwl i duhzia vântlâng hmuhah a târ lang a. Jehova duhzâwng tih hi i lâwmzâwng tak a nihzia a târ lang bawk a ni. (Sâm 40:7, 8) Mahse, baptisma chang thei tûr chuan rahbi rah chhoh ngei tûr i nei a ni.

5. (a) Baptisma chan theih nâna rahbi hmasa ber rah ngai kha eng nge ni? (b) Engvângin nge kohhran inkhâwm a pawimawh êm êm?

⁵ Tûnah pawh hian rahbi hmasa ber chu i rap ṭan der tawh a ni. Engtin nge? Pathian leh Isua Krista hriatna nei chhovin. Chu hriatna chu hun bi nei thlap thlapa Bible zirna aṭanga i neih a ni thei. (Johana 17:3) Mahse, zir belh tûr pawh a la awm a. Kristiante chuan Pathian ‘duhzâwng hriat famkimnaa khah’ chu an duh a ni. (Kolossa 1:9) He mi chungchângah hian Jehova Thuhretute inkhâwmnaa telna chuan nasa takin a ṭanpui ang che. Chutiang inkhâwmnaa tel chu a pawimawh hle. (Hebrai 10:24, 25) Chutianga tel ziahna chuan Pathian i hriatna chu tipung zêl tûrin a ṭanpui dâwn che si a.

6. Baptisma i chan theih nân Bible hriatna eng chen nge i neih ngai?

⁶ Baptisma chang thei tûr chuan Bible-a thu inziak zawng zawng i hriat vek erawh a ngai lo ngei mai. Ethiopia mi hotu lian pawh khân Bible hriatna engemaw chen chu a nei tawh sa a; mahse, Bible thu ṭhenkhat hre thiam tûr chuan ṭanpui a la ngai a ni. (Tirhkohte 8:30, 31) Chutiang bawkin, nang pawhin zir tûr tam tak i la nei a. Dik takin, Pathian chungchâng chu i zir chhuak thei ngai lo vang. (Thuhriltu 3:11) Mahse, Baptisma i chan theih hma chuan, Bible zirtîrna thu bul berte tal chu i zir a, i pawm hmasak phawt a ngai a ni. (Hebrai 5:12) Chûng thu bul berte zîngah chuan mitthite dinhmun chungchânga thudik leh Pathian hming leh a Lalram pawimawhna te a tel a ni.

7. Bible zirna chuan nangmahah eng nghawng nge a neih ang?

⁷ Mahse, “rinna lovin [Pathian] lâwmzâwng mi nih rual” a nih loh avângin, hriatna neih ringawt chu a tâwk lo va. (Hebrai 11:6) Bible chuan hmân lai Korinth khuaa mi ṭhenkhat chuan, Kristiante thusawi chu an lo hriatin, “an ring . . . a, baptisma an chang” tih min hrilh a ni. (Tirhkohte 18:8) Chutiang bawkin, Bible zirna chuan Bible chu Pathian thâwk khum Thu ngei a ni tih rinna a neihtîr tûr che a ni a. Chu chuan Pathian thutiamte leh Isua inthawinain a chhandam  thei che tih ring tûrin a ṭanpui tûr che a ni bawk.—Josua 23:14; Tirhkohte 4:12; 2 Timothea 3:16, 17.

8. Engin nge i thu zirte mi dangte hnêna hrilh chhâwng tûrin chêttîr ang che?

⁸ I rinna a lo pun deuh deuh chuan, i thu zirte mahnia vawn reng chu harsa i ti telh telh ang a. (Jeremia 20:9) Pathian leh a thiltumte chungchâng mi dang hnêna hrilh chhâwng tûra nasa taka chêttîrin i awm ang.—2 Korinth 4:13.

9, 10. (a) Tute hnênah nge Bible thutak chu i hrilh ṭan theih? (b) Jehova Thuhretute ruala chanchin ṭha i hrilh ve duh chuan, eng nge i tih ang?

⁹ Bible thutak chu remhre taka i chhûngte, i ṭhiante, i ṭhenawmte, leh i hna thawhpuite sawipuiin, mi dangte hnênah i hrilh ṭan thei a. Nakinah chuan, Jehova Thuhretute ruala thu hrilhnaa tel pawh i duh mai thei a ni. Chutih hunah chuan, Bible zirpuitu che chu hrilh hreh hauh suh ang che. Chutiang vântlâng hmaa thu hrilhnaa tel ve thei tawh tûra i tlin a rinawm chuan, Bible zirpuitu che ruala kohhran upate hmu tûrin ruahhmanna siam a ni dâwn a ni.

¹⁰ Chu chuan Pathian berâmte enkawltu, Kristian upa ṭhenkhatte nêna innêl lehzual tûrin a ṭanpui ang che. (Tirhkohte 20:23; 1 Petera 5:2, 3) Bible zirtîrna bul berte chu hre thiamin i pawm a, Pathian thu bulte mila nungin, Jehova Thuhretute zînga mi nih i duh tak zet tih chûng upate’n an hmuh chuan, baptisma la chang lo chanchin ṭha hril thei thuchhuahtu anga thu hrilhnaa i tel theih thu an hriattîr ang che.

11. Ṭhenkhatte’n thu hrilhnaa an tel hmain eng inthlâkthlengna nge an neih ngai?

¹¹ Kawng lehlamah chuan, upate chuan thu hrilhnaa i tel theih nân, i nun dân phung leh chîn dânte thlâkthleng a la ngai tih an hmu mai thei bawk a. Chutah chuan mite hriat lêm lohva i thil lo chîn rûk ṭhinte bânsan pawh a tel  thei a ni. Chuvângin, baptisma la chang lo thuchhuahtu nih i dîl hmain nungchang bawlhhlawhna te, zu ruihna te, leh ruihhlo ngaihna ang chi sual pawi takte laka i fihlîm a ngai a ni.—1 Korinth 6:9, 10; Galatia 5:19-21.

12. Engvângin nge i sim a ngaih?

¹² Baptisma i chan hmain rahbi dang pawh i rah chhoh a ngai a. Tirhkoh Petera chuan: “In sualte thai bo a nih theih nân sim ula, hawi kîr leh rawh u,” tiin a sawi. (Tirhkohte 3:19) Sim tih awmzia chu thil engemaw i tih tawhna chunga inchhîr tak zetna a ni a. Nungchang ṭha lova nung ṭhîn tân chuan sim a ngaihzia pawm chu a inâwm hle a; mahse, nungchang ṭhianghlim tawh sate tân pawh sim a ngai tho tho a ni. Engvângin nge? Mi zawng zawng hi mi sual vek kan nih a, Pathian ngaihdamna kan mamawh ṭheuh avângin. (Rom 3:23; 5:12) Bible i zir hma chuan, Pathian duhzâwng chu eng nge tih i hre lo. Chuti chu, engtin nge a duhzâwng mila i lo nun theih tehrêng ang? Chuvângin, i sim chu a ngai a ni.

13. Eng nge inlehna chu?

¹³ Simna chu inlehna, a nih loh leh ‘hawi kîrna’ chuan a zui tûr a ni a. Inchhîr satliah mai aia tam i tih a ngai a ni. I nun dân hlui hnâwl a, tûn aṭanga thil dik tih i tum ngheh tlat a ngai a. Simna leh inlehna hi baptisma i chan hmaa i rah chhoh ngei tûr rahbite a ni.

14. Baptisma i chan hmain eng rahbi pawimawh tak nge i rah ngei ngei ngai?

¹⁴ Baptisma chan hmaa rah chhoh tûr rahbi pawimawh tak dang a awm a. Chu chu i tih ngei ngei tûr, Pathian Jehova hnêna mi mala inpumpêkna hi a ni.

15, 16. Pathian Jehova hnêna inpumpêk tih awmzia chu eng nge ni a, chutianga inpumpêk tûrin mi chu engin nge chêttîr ang?

¹⁵ Pathian Jehova hnêna i inpumpêk hian, tih tak zeta  ṭawngṭaiin chatuana ama tân chauhva i inpêk pumhlûm tawh tûr thu i tiam a ni. Mahse, engvângin nge miin chutianga inpumpêk chu a duh ang? Aw le, tlangvâl pakhatin ngaihzâwng a nei a. A ngaihzâwng chanchin a hriat tam a, a mize ṭhate a hmuh tam poh leh, a hmangaihna chu a zual ting mai a ni. A hnuah chuan, nupui atân a be ta a, chu chu thil pângngai tak a ni. Chutianga inneihna chuan mawhphurhna nasa zawk a neihtîr ngei mai. Mahse, a hmangaihna chuan chu rahbi pawimawh tak chu rap chho tûrin a chettîr ngei ang.

¹⁶ Jehova i lo hriat chian a, i hmangaih ṭan hian, khêk nei lova a rawng bâwl tûr emaw, tiam chin nei lova amah be tûr emawa chhêttîrin i awm a ni. Tupawh Pathian Fapa, Isua Krista zui duh tawh phawt chuan ‘mahni hrehawm an pawisak loh’ a ngai a ni. (Marka 8:34) Keimahni duhzâwng leh thiltumte chu Pathian thu kan âwihna tûr indantîr lovin, mahni hrehawm kan pawisa lo. Chuti chu, baptisma i chan hmain Pathian Jehova duhzâwng tih chu i nuna i thiltum pawimawh ber i nihtîr tûr a ni.—1 Petera 4:2.

17. Engvângin nge ṭhenkhatin Pathian hnêna inpumpêk chu an hreh theih?

¹⁷ Ṭhenkhat chuan chutiang rahbi pawimawh tak mai han rah chhoh chu hlauh rûkna an neih avângin, Jehova hnêna inpumpêk chu an hreh phah a. An hlauh chu Kristian inpumpêk tawh han nih a, Pathian laka mawhphurhna neih chu a ni mai thei. Chûng mite chuan hlawhchham a, Jehova an tihbeidawn an hlauh avângin, a hnêna inpumpêk loh chu thil ṭha ber niah an ngai a ni.

18. Engin nge Pathian hnêna inpumpêk tûra chettîr thei che?

¹⁸ Jehova hmangaih dân i han zir tâkah chuan, a hnêna inpumpêk a, chu mi mila nung tûra chêttîrin i awm ngei ang a. (Thuhriltu 5:4) Chutianga i inpumpêk hnuah chuan ‘kawng tinrênga amah tilungawi tûra Lalpa zui tlâka’ awm pawh i  duh ngei bawk ang. (Kolossa 1:10-12) Pathian i hmangaihna avângin, a duhzâwng tih chu thil harsa lutukah i ngai lo vang. “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tia tirhkoh Johana thuziak hi i pawmpui ngei ang.—1 Johana 5:3.

19. Engvângin nge Pathian hnêna inpumpêk chu i hlauh a ngaih loh?

¹⁹ Pathian hnêna inpumpêk tûr chuan mi ṭha famkim i nih kher a ngai lo. Jehova chuan i tlin tâwk a hria a, i tih theih chin bâk engmah a beisei ngai lo che. (Sâm 103:14) Ani chuan i hlawhtlin a duh a, a chhawmdâwl chein, a ṭanpui ngei ang che. (Isaia 41:10) I thinlung zawng zawnga Jehova  i rin tlat chuan, ani chuan “i kawngte chu a kawhhmuh zêl ang che.”—Thufingte 3:5, 6.

20. Engvângin nge Jehova hnêna inpumpêkna chu thup reng theih a nih loh?

²⁰ Kan sawiho tâk thute ngun taka ngaihtuahna chuan ṭawngṭaia Jehova hnêna mi mal inpumpêkna nei tûrin a ṭanpui thei che a. Pathian hmangaihna dik tak neitu apiang chuan ‘chhandamna hmuh nân kâin an ṭan’ tûr a ni. (Rom 10:10) Chu chu engtin nge i tih?

21, 22. Engtin nge i rinna chu ‘kâa i ṭan’ theih?

 ²¹ In kohhrana upahote râwn khâwmtu chu baptisma chan i duh thu hrilh rawh. Ani chuan Bible zirtîrna bul berte chungchânga zawhna engemaw zât ennawnpui tûr chein upa ṭhenkhat a ruatsak ang che a. Chûng upate chuan i tling nia an hriat chuan hun remchâng hmasa bera baptisma i chan theih thu an hrilh ang che. * Chûng hunah chuan baptisma awmzia ennawnna thusawi neih a ni tlângpui ṭhîn a. Chutah thusawitu chuan baptisma chang tûrte chu an rinna ‘kâa an ṭanzia’ târ lanna kawng khat atân, zawhna mâwlmang tê pahnih a zâwt ṭhîn a ni.

²² Baptisma i channa ringawt pawh chuan vântlâng hmaah Pathian hnêna i inpumpêk tawhzia leh tûnah chuan Jehova Thuhretute zînga mi pakhat i nih tawhzia a târ lang a. Baptisma chang tûrte chu Jehova hnêna an inpumpêkzia vântlâng hmaa lantîr nân, tuiah an inhnimpil vek a ni.

23. ‘Pa leh Fapa leh thlarau thianghlim hminga’ baptisma chang tih awmzia chu eng nge ni?

²³ Isua chuan a zirtîrte chu “Pa leh Fapa leh thlarau thianghlim hmingah chuan” baptis an nih tûr thu a sawi a. (Matthaia 28:19) Chu mi awmzia chu baptisma chang tûrte chuan Pathian Jehova leh Isua Krista thu neihna an pawm tihna a ni. (Sâm 83:18; Matthaia 28:18) Chu bâkah, Pathian thlarau thianghlim, a nih loh leh a chakna chevêl reng hnathawh leh thiltihte chu an pawm tihna a ni bawk.—Galatia 5:22, 23; 2 Petera 1:21.

24, 25. (a) Baptisma chuan eng nge a entir? (b) Eng zawhna nge chhân ngai?

²⁴ Amaherawhchu, baptisma chan chu tuia inhnimpilna satliah mai a ni lo. Chu chuan thil engemaw pawimawh tak mai a entîr a ni. Tui chhûnga i inhnimpilna chuan i tûn hma  nun i thihsan tawh tih a entîr a. Tui ata i lo chhuah lehna chuan Pathian duhzâwng ti tûra tihnun leh i nihzia a entîr a ni. Tin, hnathawh tûr emaw, thurin pakhat emaw, mi dangte emaw, a nih loh leh pâwl pakhat emaw hnêna inpumpêk i ni lo va; Pathian Jehova hnêna inpumpêk i ni tih hre reng ang che. I inpumpêkna leh baptisma channa chu Pathian nêna inṭhianna hnai tak leh ṭha tak neih ṭanna a ni.—Thufingte 3:32.

²⁵ Baptisma chan chu chhandam nih ngei ngeina a ni lo. Tirhkoh Paula chuan: “Hlau leh khûr chungin nangmahni chhandamna thawk chhuak rawh u,” tiin a ziak a. (Philippi 2:12) Baptisma chan chu chhandamna atâna kê pên ṭanna chauh a ni. Zawhna lo awm ta chu, Engtin nge Pathian hmangaihnaah chuan i awm reng theih ang? tih a ni a. He lehkhabua bung tâwpna ber hian chu zawhna chu a rawn chhâng ang.