ATIRA ṭawng hmanah Bible chuan Hebrai thu mal sheʼohlʹ tih leh a tlukpui Grik thu mal haiʹdes tih chu vawi 70 chuang a hmang a. He thu mal pahnihte hian thihna nêna inkûngkaihna a nei ve ve a ni. Bible lehlin ṭhenkhat chuan “thlân” tih te, “hremhmun” tih te, a nih loh leh “khuarkhurum” titein an let chhuak a. Amaherawhchu, ṭawng tam zâwkah chuan hêng Hebrai leh Grik thu malin a sawi tum tak dik taka hrilhfiahtu thu mal a awm lo. Chuvângin, Mizo Bible chuan sheʼohlʹ atân “Seol” emaw, “thlân” emaw a hmang a, haiʹdes atân “Mitthi Khua” tih thu mal chu a hmang thung a ni. Hêng thu malte hi eng tihna chiah nge a nih? Bible châng chi hrang hranga chûng thu malte hman a nih dân chu ilo en ang u.

Thuhriltu 9:10 chuan heti hian a sawi: “Thlân [Seol] i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo,” tiin. Seol chu kan hmangaih tak kan phûmna hmun thlânmual khawi emaw lai bîk sawina a ni em? Ni lo. Bible chuan mitthi phûmna thlân khawi emaw lai bîk a sawi hunah chuan sheʼohlʹ leh haiʹdes hmang lovin, Hebrai leh Grik thu mal dang chu a hmang zâwk a ni. (Genesis 23:7-9) Tin, Bible chuan ruang tam tak phûm khâwm an nihna hmun, chhûngkaw thlân bîk emaw, mi tam tak phûmna hmun emaw sawi nân chuan “Seol” tih thu mal a hmang lo bawk.—Genesis 49:29-31.

Chuti a nih chuan, “Seol” chu eng ang hmun chiah nge a nih? Pathian Thu chuan “Seol” emaw, “Mitthi Khua” emaw chuan mithite phûm khâwmna thlânmual zau tak a kâwk lo tih a târ lang. Entîr nân, Isaia 5:14 chuan Seol chu ‘zau tak leh a kâ chu teh rual loh khawpa âng’ angin a sawi a. Seol chuan mitthi chhiar sên lohte chu lem zo tawh mah se, lungawi chin rêng a nei lo niin a lang. (Thufingte 30:15, 16) Mitthi phûmna thlânmual tak tak erawh chu a khat thei a; chu mi nêna inang lo takin, ‘Seol leh Abadon chuan tâwk chin lêm a nei lo.’ (Thufingte 27:20) Chu chu, Seol chu a khat ve ngai lo tihna a ni, khat thei a ni si lo. Chuvângin, Seol, a nih loh leh Mitthi Khua chu khawi emaw laia thlânmual tak tak sawina a ni lo. Chu ai mahin, mitthite thlân, mitthi a tam zâwkte awmna entîr nei hmun a ni zâwk a ni.

 Bible zirtîr thawhlehna chuan “Seol” leh “Mitthi Khua” tih awmzia hre thiam lehzual tûrin min ṭanpui a. Pathian Thu chuan “Seol” leh “Mitthi Khua” chu thawhlehnaa kaih thawha awm tûr mithite awmna hmun nên a thlunzawm a ni. * (Joba 14:13; Tirhkohte 2:31; Thu Puan 20:13) Bible chuan Seol, a nih loh leh Mitthi Khuaah chuan Jehova rawngbâwltute chauh ni lovin, a rawngbâwl lotu mi tam tak dang pawh an awm thu a târ lang bawk. (Hebrai ṭawnga sheʼohlʹ chu ‘thlân’ leh “khuarkhurum” tia lehlin a nihna, Genesis 37:35 leh Sâm 55:15 en rawh.) Chuvângin, Bible chuan “mi felte leh fel lote thawhlehna a awm ang,” tih a zirtîr a ni.—Tirhkohte 24:15.