ZIRLAI 01
Engtin Nge Bible-in A Ṭanpui Theih Che?
Kan zavai deuh thaw hian nunna, hrehawm tawrhna, thihna, leh nakin hun chungchângah zawhnate kan zâwt ṭhîn a. Chu bâkah, kan nî tin nuna bet tlat eizawnna, a nih loh leh chhûngkaw hlim neih theih dân chungchâng chu kan ngaihtuah ṭhîn bawk. Mi tam tak chuan Bible-in nuna zawhna pawimawh takte chhânna hre tûrin a ṭanpui mai ni lovin, nî tin nun atân thurâwn ṭangkai tak a pe bawk tih an chhar chhuak a ni. Bible hian mite a ṭanpui theih i ring em?
1. Bible-in a chhân zawhna ṭhenkhat chu engte nge ni?
Bible chuan hêng zawhna pawimawh takte chhânna a pe a ni: Engtin nge nun a lo inṭan? Engvângin nge hetah kan lo awm? Engvângin nge pawi sawi lo mite’n hrehawm an tawrh? Mi a thih hian a chungah eng nge thleng? Mi tinte hian remna an duh a nih si chuan, engvângin nge indona a tam êm êm? Nakin hunah leiah eng nge thleng ang? Bible chuan hêng zawhnate chhânna zawng tûr hian min fuih a, a chhânna lungâwithlâk takte chu mi maktaduai tam takin an hmu tawh a ni.
2. Engtin nge Bible chuan kan nî tin nun chu hlim taka hmang tûra min ṭanpui theih?
Bible chuan thurâwn ṭha tak min pe a. Entîr nân, chhûngkuate chu hlimna dik tak an neih theih dân a zirtîr a ni. Rilru hahna hmachhawn dân leh kan hnaa hlimna kan neih theih dân chungchângah thurâwn min pe a ni. Hêng thute leh thu dang tam tak chungchânga Bible zirtîrnate chu he lehkhabu kan sawiho hunah i hria ang. ‘Pathian Lehkha Thu [Bible Thu] zawng zawng hi . . . a sâwt a ni,’ tih i pawm ngei ang.—2 Timothea 3:16.
He lehkhabu hian Bible ai a awh lo va. Chu aiin, nangmah ngeiin Bible bihchiang tûrin a fuih che a ni. Chuvângin, hêng zirlaitea târ lan Bible chângte chhiar tûr leh i thu zir nêna khaikhin tûrin kan fuih duh che a ni.
ZIR BELHIN HMUH BELH RAWH
Bible-in mite a ṭanpui tawh dân te, Bible chhiar nuam i tih theih dân te, leh Bible hre thiam tûra ṭanpuina dawn a ṭhat chhante ngaihtuah rawh.
3. Bible-in min kaihruai thei
Bible hi êng chak tak ang a ni a. Bible chu thu tlûkna ṭhate siam dân min kawhhmuhtu atân leh nakina thil lo thleng tûrte hmu thiam tûra min ṭanpuitu atân kan hmang thei a ni.
Sâm 119:105 chhiarin, hêng zawhnate hi sawiho vang che u:
-
Engtin nge he fakna hla phuahtu hian Bible a thlîr?
-
Nang engtin nge i thlîr ve?
4. Bible-in kan zawhna neihte a chhâng thei
Nu pakhat chuan kum tam tak chhûng amah tibuaitu zawhnate chhânna Bible-ah a hmu a ni. VIDEO chu chhuah la, a hnuaia zawhnate hi sawiho vang che u.
-
Video-ah hian nu pakhatin eng zawhnate nge a neih?
-
Engtin nge Bible zirna chuan a ṭanpui?
Bible chuan zawhnate zâwt tûrin min fuih a. Matthaia 7:7 chhiarin, a hnuaia thu hi sawiho vang che u:
-
Bible-in a chhânsak theih tûr eng zawhnate nge i neih?
5. Bible chhiar nuam i tithei
Mi tam tak chuan Bible chhiar nuam an tiin, an hlâwkpui hle. VIDEO chu chhuah la, a hnuaia zawhnate hi sawiho vang che u.
-
Video-ah hian, ṭhalaite chuan a tlângpuiin lehkha chhiar hi engtin nge an ngaih?
-
Engvângin nge Bible chhiar chungchânga an thlîr dân chu a danglam tâk?
Bible chuan thlamuanna leh beiseinate min petu kaihhruainate min pe thei a ni. Rom 15:4 chhiarin, he zawhna hi sawiho vang che u:
-
Bible thutiam thlamuanna leh beiseina chu i ngaihven em?
6. Mi dangte chuan Bible hre thiam tûrin min ṭanpui thei
Mi tam tak chuan mahnia Bible chhiar bâkah, mi dangte nêna sawihona neih chu ṭangkai an ti hle. Tirhkohte 8:26-31 chhiarin, he zawhna hi sawiho vang che u:
-
Engtin nge Bible kan hriatthiam theih ang?—Châng 30 leh 31 en rawh.
Ethiopia mi chuan Pathian Lehkha Thu hre thiam tûrin ṭanpuina a mamawh. Tûn laia mi tam tak pawhin chutianga mi dangte nêna Bible sawihona neih a ṭangkaizia an hria
MI ṬHENKHAT SAWI DAN: “Bible zir chu hun khawhralna mai a ni.”
-
Nang engtin nge i ngaih a, engvângin nge?
KHAIKHAWMNA
Bible chuan kan nî tin nun atâna thurâwnte min pe a, kan zawhna pawimawh takte a chhân bâkah, thlamuanna leh beiseina min pe a ni
Ennawnna
-
Bible-ah hian eng ang thurâwn nge kan hmuh theih?
-
Bible-in a chhân zawhna ṭhenkhat chu engte nge ni?
-
Bible aṭangin eng thu nge i zir duh?
HRIAT BELH NAN
Bible thurâwn pêk tûn laia a ṭangkai dân ngaihtuah rawh.
“Bible Zirtîrnate—Englai Pawha Hman Tlâk Finna” (Vênnainsâng No. 1 2018)
A naupan lai aṭanga rilru lama harsatna nei pa pakhat Bible-in a ṭanpui dân en rawh.
Chhûngkuate tâna Bible thurâwn pêk ṭangkai tak bih chiang rawh.
Bible-in khawvêl awptu dik tak chungchânga mi tam takte ngaih dân dik lo a siam ṭhat dân hria ang che.