ZIRLAI 02

Bible-in Beiseina Min Pe

PLAY RAWH

Khawvêl pum huapa mite chuan lungngaihna, lungkhamna leh natna hial thlentu harsatna tam takte an hmachhawn a. Chutiang harsatnate chu i hmachhawn ve tawh em? Dam lohna vâng emaw, i hmangaih tak tuemaw thihnaa i chân vâng emawin hrehawm i tuar pawh a ni thei. Chuvângin, ‘Hei aia nun ṭha zâwk a awm thei ang em?’ tiin i ngaihtuah mai thei. Bible chuan chu zawhna atân chhânna thlamuanthlâk tak min pe a ni.

1. Engtin nge Bible-in beiseina min pêk?

Bible chuan he khawvêl hi buainaa a khah chhan mai ni lovin, buainate hi rei lo te tân chauh a ni a, nakin lawkah tihbo a ni thuai dâwn tih chanchin lâwmawm pawh min hrilh a ni. Bible thutiamte chuan kan “hun hnuhnûng tâwpah” beiseina min pe thei a. (Jeremia 29:11, 12 chhiar rawh.) Chûng thutiamte chuan tûna kan tawh mêk buainate hmachhawn thei tûr te, a êng zâwnga thil thlîr tûr te leh, hlimna tluantling hmu tûrtein min ṭanpui a ni.

2. Bible chuan eng ang nakin hun nge a târ lan?

Bible chuan ‘thihna te, lungngaihna te, ṭahna te, natna te awm tawh lo hun tûr’ nakin hun a târ lang a. (Thu Puan 21:4 chhiar rawh.) Tûn laia nun hi beisei bo anga lantîrtu—retheihna te, rorêl dik lohna te, dam lohna te, leh thihna te ang chi—buainate hi a bo tawh ang. Bible chuan mihringte chu lei Paradis-ah chatuanin hlim takin an nung thei ang tih a tiam a ni.

3. Engtin nge Bible pêk beiseinate i rinna chu i tihngheh theih ang?

Mi tam tak chuan thil ṭhate a thlen an beisei a, mahse an beiseite a rawn thleng famkim tak tak ang tih erawh an chiang lo. Mahse, Bible thutiamte erawh a danglam bîk hle. ‘Pathian Lehkhaah Zawngin’ chûng a sawite kan rinna kan tinghet thei a ni. (Tirhkohte 17:11) Bible i zir chuan nakin hun chunghchânga a thusawite i rin dâwn leh dâwn loh chungchângah nangmah ngeiin thu tlûkna i siam thei ang.

ZIR BELHIN HMUH BELH RAWH

Nakin hun chungchânga Bible thutiam dinhmun ṭhenkhatte chu bihchiang rawh. Bible-in a pêk beiseinain tûn laia mite a ṭanpui dân hmu rawh.

4. Bible chuan dinhmun ṭha famkima chatuan nun beiseina min pe

A hnuaia Bible thutiam ziak chhuahte hi en rawh. Eng thutiam hi nge i duh ber a, engvângin nge?

Thutiamte zawha târ lan Bible chângte chu chhiar la, hêng zawhnate hi sawiho ang che u:

Hêng Bible chângte hian beiseina a pe chein i hria em? I chhûngte leh i ṭhiante beiseina a pe theiin i hria em?

Hetiang khawvêla nung ang hian han inmitthla teh

TUMAHIN . . .	MI ZAWNG ZAWNGIN . . .
natna, tarna, leh thihna an tâwk tawh lo vang.—Isaia 25:8.	an hmangaih takte he leia rawn tho leh an hmu ang.—Johana 5:28, 29.
dam lohna, a nih loh leh piansualna an nei tawh lo vang.—Isaia 33:24; 35:5, 6.	hrisêlna ṭha leh vânglai chakna an nei leh ang.—Joba 33:25.
rorêl dik lohna an tâwk tawh lo vang.—Isaia 32:16, 17.	ei tûr tam tak, in nuam tak, leh hna lungawithlâk tak an nei ang.—Sâm 72:16; Isaia 65:21, 22.
indona avângin hrehawm an tuar tawh lo vang.—Sâm 46:9.	remna tluantling an chên ang.—Sâm 37:11.
tûn hmaa thil ṭha lote avânga rilru hrehawmna an tuar tawh lo vang.—Isaia 65:17.	dinhmun ṭha famkimah chatuanin an nung ang.—Sâm 37:29.

5. Bible pêk beiseinate chuan danglamna a thlen thei

Mi tam takte chu an chhehvêla buainate chuan a tibeidawngin, a tithinur hial a. Ṭhenkhat chuan dinhmunte ṭha zâwka thlâk danglam tumin hma an la a. Bible thutiam dinhmun ṭha zâwk rawn awm tûrin tûna mite a ṭanpui dân hmu rawh. VIDEO chu chhuah la, a hnuaia zawhnate hi sawiho vang che u.

VIDEO: Inthliar Hranna Tihbo Ka Duh (4:07)

Video-ah khân, eng inthliar hrannain nge Rafika-i rilru tibuai?
Inthliar hranna a hmuhte chu bo lo mah se, engtin nge Bible-in ani chu a ṭanpui?

Nakin hun atâna Bible min pêk beiseinate chuan kan lunghnualnate leh buainate chu hlawhtling taka hmachhawn thei tûrin min ṭanpui thei a ni. Thufingte 17:22 leh Rom 12:12 chhiarin, hêng zawhnate hi sawiho ang che u: