ZIRLAI 09
Ṭawngṭaiin Pathian Hnaih Rawh
I nunah kaihhruaina mamawh niin i inhre ngai em? Zawhna pawimawh tak a chhânna hriat duhte i nei em? Thlamuanna, a nih loh leh fuihna i mamawh em? Jehova hnaih lehzual i duh em? Ṭawngṭaina chuan hêng zawng zawngah hian a ṭanpui thei che. Mahse, ṭawngṭai dân dik chu eng nge ni? Pathianin ṭawngṭaina zawng zawng a ngaithla em? A hnêna i ṭawngṭainate a ngaihthlâk ngeina tûrin eng nge i tih theih? I lo en ang u.
1. Tu hnênah nge kan ṭawngṭai anga, eng chungchângah nge kan ṭawngṭai theih?
Isua chuan kan Pa vâna mi hnênah chauh kan ṭawngṭai tûr a ni tih min zirtîr a. Amah ngei pawh Jehova hnênah a ṭawngṭai a ni. Ani chuan: “Chutichuan, nangni chu hetiang hian ṭawngṭai rawh u: ‘Kan Pa, vâna mi . . . ’” tiin a sawi a. (Matthaia 6:9) Jehova hnêna kan ṭawngṭai hian, amah nêna kan inṭhianna kan tinghet a ni.
Eng chungchângah pawh a hnênah kan ṭawngṭai thei a. Mahse, kan ṭawngṭainate chhân ni tûr chuan kan thil dîlte chu a duh zâwng nên a inmil tûr a ni. “Eng pawh [Pathian] duh zâwng anga kan dîl chuan anin min ngaihthlâksak ṭhin hi.” (1 Johana 5:14) Isua chuan ṭawngṭainaa kan telh âwm thilte min hriattîr a. (Matthaia 6:9-13 chhiar rawh.) Kan mi mal mamawhte kan dîl bâkah, thil min tihsakte avânga Pathian hnêna lâwmthu sawi leh mi dangte tâna a ṭanpuina dîlsak chu kan theihnghilh tûr a ni lo.
2. Engtin nge kan ṭawngṭai ang?
Bible chuan ‘kan thinlung chu Pathian hmâa leihbaw tûrin’ min fuih a. (Sâm 62:8) Chuvângin, thinlung leh tih tak zetin kan ṭawngṭai tûr a ni. Pathian zahna lantîrtu a nih phawt chuan awm dân engpawh hmangin a ri chhuakin emaw, ri chhuak lovin emaw kan ṭawngṭai thei a. Khawi hmunah leh eng hunah pawh kan ṭawngṭai thei bawk.
3. Engtin nge Pathianin kan ṭawngṭainate a chhân?
Kawng tam takin min chhâng ṭhîn. Jehova chuan a Thu, Bible min pe a, chutah chuan kan zawhnate chhânna chu kan hmu ṭhîn. Pathian Thu chhiarna chuan “mi mâwl a tifing” thei a ni. (Sâm 19:7; Jakoba 1:5 chhiar rawh.) Harsatnate kan hmachhawn hunah pawh rilrua thlamuanna min pe thei a. Chu bâkah, amah betute chu kan mamawh huna min ṭanpui tûrin a chêttîr thei bawk a ni.
ZIR BELHIN HMUH BELH RAWH
Pathian tilâwmtu thinlung taka ṭawngṭaina i hlan theih dân bih chiang la, ṭawngṭaina i hlâwkpui theih dân hmu ang che.
4. Ṭawngṭaina ngaihthlâksak ni tûrin Pathianin phût a nei
Engin nge kan ṭawngṭaina hi Pathian pawm nihtîrin, nihtîr lo thei? VIDEO chu chhuah rawh.
Jehova’n a hnêna ṭawngṭai tûrin min duh a ni. Sâm 65:2 chhiarin, hêng zawhnate hi sawiho vang che u:
-
“Ṭawngṭaina Ngaithlatu” chuan a hnêna ṭawngṭai tûrin a duh che niin i hria em? Engvângin nge?
Pathianin kan ṭawngṭainate min ngaihthlâksak kan duh chuan a tehnate milin kan nung tûr a ni. Mika 3:4 leh 1 Petera 3:12 chhiarin, he zawhna hi sawiho vang che u:
-
Kan ṭawngṭainate Jehova ngaihthlâksak ni tûrin eng nge kan tih theih?
Indo laiin, lehlam lehlamah hnehna dîlin an ṭawngṭai ve ve mai thei a. Chutiang ṭawngṭainate Pathianin a chhânsak beisei chu a âwm em?
5. Thinlung aṭangin kan ṭawngṭai tûr a ni
Mi ṭhenkhat chu ṭawngṭainaah thu ngai chham nawn fo tûra zirtîr an ni a. Mahse, chu chu Pathianin ṭawngṭai tûra min duh dân a ni em? Matthaia 6:7 chhiarin, he zawhna hi sawiho vang che u:
-
Engtin nge i ṭawngṭainaah “sawi nawn mai mai” chu i pumpelh theih ang?
Nî tinin, i nuna malsâwmna i dawn pakhat ngaihtuahin, chumi atân Jehova hnênah lâwmthu sawi ang che. Chawlhkâr khat chhûng chutianga i tih chuan, thu ngai chham nawn miah lovin thil pasarih chungchângah i ṭawngṭai tihna a ni ang.
6. Ṭawngṭaina chu Pathian thilthlâwnpêk a ni
Engtin nge ṭawngṭaina chuan hun ṭha leh ṭha lovah chakna min pêk theih? VIDEO chu chhuah rawh.
Bible chuan ṭawngṭainain rilrua thlamuanna dik tak min pe thei tih min tiam a ni. Philipi 4:6, 7 chhiarin, hêng zawhnate hi sawiho vang che u:
-
Ṭawngṭaina chuan kan buainate la bo reng lo mah se, engtin nge min ṭanpui?
-
Eng thilte nge ṭawngṭainaah i telh duh?
I lo hre tawh em?
“Amen” tih thumal hi “tehrêng mai” emaw, “ni rawh se” emaw tihna a ni a. Bible hun lai aṭang tawhin, ṭawngṭaina tâwpah “amen” an ti ṭhîn a ni.—1 Chronicles 16:36.
7. Ṭawngṭai nân hun insiam rawh
Kan buai theih êm avângin ṭawngṭai theihnghilh châng kan nei thei a ni. Isua tân ṭawngṭaina hi engtiang khawpin nge a pawimawh? Matthaia 14:23 leh Marka 1:35 chhiarin, hêng zawhnate hi sawiho vang che u:
-
Ṭawngṭaina hun nei tûrin Isua’n eng nge a tih?
-
Eng hunah nge ṭawngṭaina hun i insiam theih?
MI ṬHENKHAT SAWI DAN: “Ṭawngṭaina hi rilru hahdamna mai a ni.”
-
Nang engtin nge i ngaih?
KHAIKHAWMNA
Tih tak zeta ṭawngṭaina chuan Pathian min hnaihtîrin, rilrua thlamuanna min pêk bâkah, Jehova tilâwm tûra kan mamawh chakna min pe a ni.
Ennawnna
-
Tu hnênah nge kan ṭawngṭai ang?
-
Engtin nge kan ṭawngṭai ang?
-
Ṭawngṭai a hlâwkna ṭhenkhat chu eng nge ni?
HRIAT BELH NAN
Ṭawngṭaina chungchânga zawhna tlânglâwn takte chhânna chhiar rawh.
“Ṭawngṭaina Chungchânga I Hriat Ngai Thil Pasarih” (Vênnainsâng, November 1, 2010)
Ṭawngṭai a pawimawh chhante leh i ṭawngṭaina i tihhmasâwn theih dân zir rawh.
“Tu hnênah nge kan ṭawngṭai ang?” tih chungchânga Bible zirtîrnate chu ngaihtuah rawh.
“Mi Thianghlimte Hnênah Ka Ṭawngṭai Tûr A Ni Em?” (Website thuziak)
He music video-ah hian kan ṭawngṭaina hun leh hmun a pawimawh leh mawh loh lo chîk rawh.