ZIRLAI 19

Jehova Thuhretute Hi Kristian Tak Tak An Ni Em?

PLAY RAWH

Jehova Thuhretute kan nih angin, Kristian dik niin kan inhria a. Engvângin nge? Kan thurin innghahna te, kan hming putin min tihhranna te, leh kan inhmangaih tawnnate hi ngaihtuah ang che.

1. Jehova Thuhretute thurin innghahna chu eng nge ni?

Isua chuan: “[Pathian] thu chu thutak a ni,” tiin a sawi a. (Johana 17:17) Isua ang bawkin, Jehova Thuhretute thurin innghahna chu Pathian Thu a ni reng a ni. Tûn lai huna kan chanchin hi han ngaihtuah teh. Kum zabi 19-na tâwp lamah, Bible zirlai ho khat chuan Bible zirtîrna ngun takin an bih chiang ṭan a. A hun laia kohhrante thurin nêna a inkalh hunah pawh, an thurin chu Bible-ah an innghahtîr tlat a. Tichuan, chûng Bible thutakte chu mite hnênah an hrilh ṭan bawk a ni. a

2. Engvângin nge Jehova Thuhretute tih hming kan inpêk?

Jehova chuan amah betute chu a chungchâng thu dik an sawi avângin thlîrtute, a nih loh leh a thuhretute tiin a ko va. (Hebrai 11:4–12:2) Entîr nân, hmân lai hunah khân, Pathianin a mite chu: “Mi hriatpuitute [“ka thuhretute,” NWT] in ni,” tiin a hrilh a ni. (Isaia 43:10 chhiar rawh.) Chu bâkah, Isua chu “Thuhretu Rinawm,” tia koh a ni bawk. (Thu Puan 1:4, 5) Chuvângin, kum 1931 aṭang khân Jehova Thuhretute tih hming kan inpe a. He hming kan put avâng hian kan inchhuang tak zet a ni.

3. Engtin nge Jehova Thuhretute’n Isua hmangaihna an entawn?

Isua’n a zirtîrte chu a chhûngte ang tlukin a hmangaih a. (Marka 3:35 chhiar rawh.) Chutiang bawkin, Jehova Thuhretute chu khawvêl pum huap chhûngkaw inlungrual tak an ni. Chuvângin, unaunu, unaupa tiin kan inko ṭhîn a. (Philemona 1, 2) “Unaute chu hmangaih rawh u,” tih thupêk pawh kan zâwm bawk. (1 Petera 2:17) Jehova Thuhretute chuan he hmangaihna hi kawng tam takin an lantîr a; entîr nân, khawvêl pum huapa awm an Kristian unaute’n ṭanpui an ngaih hunah an ṭanpui a ni.

ZIR BELHIN HMUH BELH RAWH

Hun kal tawha Jehova Thuhretute chanchin zir belh zêl la, Kristian dik kan ni tih finfiahna hmuh belh ang che.

Kristian dikte thurin chu Bible-ah a innghat a, chu chu mi dangte hnênah an hrilh bawk

4. Kan thurin innghahna chu Bible a ni

Jehova chuan Bible thutak hriatfiah lehzual a ni dâwn tih a hrilh lâwk a. Daniela 12:4 chhiarin, he zawhna hi sawiho vang che u:

Pathian mite’n Bible an bih chian chhunzawm zêl avângin, an zîngah eng nge “pung dâwn”?

Charles Russell-a pawh tiamin Bible zirlai ho khatte’n Pathian Thu an zir dân ngaihtuah rawh. VIDEO chu chhuah la, a hnuaia zawhna hi sawiho vang che u.

VIDEO: Bible Thutak Hmuh Chhuah Lehna (7:45)

Video-ah khân engtin nge Charles Russell-a leh Bible zirlai dangte chuan Bible an zir?

I lo hre tawh em?

A châng chuan, kan thurin ṭhenkhat kan siamrem ṭhîn a. Engvângin nge? Nî a tlângsân chhoh va, lei pianhmang kan hmu fiah telh telh angin, Pathian chuan a Thu hriatthiamna chu zawi zawiin min pe a ni. (Thufingte 4:18 chhiar rawh.) Bible chu inthlâk danglam lo mah se, Bible kan hriatthiam chhoh zêl avângin kan thurinte pawh kan siamrem ṭhîn a ni.

5. Kan hming phûin kan nung

Engvângin nge Jehova Thuhretute tih hming kan inpêk? VIDEO chu chhuah la, a hnuaia zawhna hi sawiho vang che u.

VIDEO: Kan Nihna Sawifiahtu Hming (2:40)

Engvângin nge Jehova Thuhretute tih hming chu inâwm tak a nih?

Engvângin nge Jehova chuan mite chu a thuhretute ni tûra a thlan? A chungchâng dâwt thu a lên vêl avângin, Pathian dik a nihzia finfiahtu tûr atân a thlang a ni. Chûng dâwt thute zînga pahnih lo ngaihtuah ta ila.

Sakhaw ṭhenkhat chuan an mi leh sate chu Pathianin amah an biaknaah milem hmang tûrin a duh tih a zirtîr a. Mahse, Leviticus 26:1 chhiarin, hêng zawhnate hi sawiho vang che u:

Thu dik chu eng nge ni? Engtin nge Jehova’n milem hman chungchâng a ngaih?

Sakhaw hruaitu ṭhenkhat chuan Isua chu Pathian a ni tiin an zirtîr a. Mahse, Johana 20:17 chhiarin, hêng zawhnate hi sawiho vang che u:

Thu dik chu eng nge ni? Pathian leh Isua chu mi thuhmun an ni em?
Jehova’n amah leh a Fapa chungchânga thu dik hril tûrin a Thuhretute a tîr chhuak tih hriatna chuan engtin nge a awmtîr che?

6. Kan inhmangaih tawn

Bible chuan Kristiante chu mihring taksa pêng hrang hrang nên a khaikhin a. Korinth thawn khat 12:24-26 chhiarin, hêng zawhnate hi sawiho vang che u:

Kristian dikte chuan an unaute’n hrehawm an tawrh hian eng nge an tih ang?
Jehova Thuhretute inhmangaih tawn dân hmuh i nei tawh em?

Khawvêl hmun khata Jehova Thuhretute’n hrehawm an tawrh hian, khawvêl puma Thuhretu zawng zawngte’n ṭanpui an tum nghâl ṭhîn. Entîrna pakhat hriat nân, VIDEO chu chhuah la. Tichuan, a hnuaia zawhna hi sawiho vang che u.

VIDEO: Haiti Ramin Hurricane Matthew Thlipui A Tuar (5:29)

Engtin nge Jehova Thuhretute theih tâwp chhuaha chhawmdâwlna chu hmangaihna târ langtu a nih?

Kristian dikte’n ṭanpui ngaite chungah hmangaihna an lantîr

MI ṬHENKHAT SAWI DAN: “Jehova Thuhretute lo chhuahna chu a la rei hlei nêm.”

Engtik aṭang khân nge Jehova’n amah betute chu a thuhretute tia a koh ṭan?

KHAIKHAWMNA

Jehova Thuhretute chu Kristian dik an ni a. Bible-a innghat thurinte nei a, Jehova chungchâng thu dik hriattîrtu khawvêl pum huapa Pathian betu chhûngkaw khat an ni.