Isua chuan baptisma chan chu Kristiante tân tihmâkmawh niin a zirtîr a. (Matthaia 28:19, 20 chhiar rawh.) Mahse, baptisma tih chu eng nge ni? Miin baptisma chang thei tûr chuan eng nge a tih ngai?

1. Baptisma chu eng nge ni?

“Baptis” tih thu mal hi Grik ṭawnga tui chhûnga “chiah pil” tih awmze nei ṭawngkam aṭanga lo chhuak a ni a. Isua’n baptisma a chan khân Jordan Luiah hnim pil a ni a, a hnuah ‘tui ata a lo chhuak’ a ni. (Marka 1:9, 10) Chutiang bawkin, Kristian dikte’n baptisma an chan hian tui chhûnga chiah pil vek, a nih loh leh hnim pil vek an ni.

2. Baptisma channa hian eng nge a târ lan?

Mi chuan baptisma changin Pathian Jehova hnêna a inpumpêk tawhzia a târ lang a. Engtin nge a inpumpêk? Baptisma a chan hmain Jehova hnênah chatuana A rawng bâwl a duh thu ṭawngṭaiin a hrilh a. Jehova chauh a biak tûr thu leh a duh zâwng tih chu a nunah a dah pawimawh ber tûr thu a tiam a ni. Isua zirtîrnate leh a entawn tûr siamte chu ‘mahni hrehawm pawisa lova zui’ a thlang bawk. (Matthaia 16:24) A inpumpêkna leh baptisma a channa zârah Jehova leh a unaute nên inṭhian ṭhatna a nei thei a ni.

3. Baptisma chang thei tûrin eng nge tih ngai?

Jehova chungchâng zirin leh a chunga rinna nghet tak nei chhovin, baptisma chang tûrin i inbuatsaih thei a. (Hebrai 11:6 chhiar rawh.) I hriatna leh rinna a ṭhan chhoh rualin, Jehova i hmangaihna pawh a ṭhang chho vang. A chungchâng mi dangte hrilh duhna leh a tehnate mila nun duhna pawh i nei chho vang tih rinhlelhrual a ni lo. (2 Timothea 4:2; 1 Johana 5:3) Tuemaw chu Jehova ‘tilungawi tûra amah zui tlâka’ a nun tawh chuan, Pathian hnêna inpumpêka baptisma chan chu a duh ngei ang.—Kolossa 1:9-12. a

 ZIR BELHIN HMUH BELH RAWH

4. Isua baptisma channa aṭanga kan hriat theihte

Isua baptisma channa chungchâng chipchiar zâwka hriat nân, Matthaia 3:13-17 chhiar la; tichuan, hêng zawhnate hi sawiho vang che u:

• Isua’n a nausên laiin baptisma a chang em?

• Engtin nge baptisma a chan? Tuia theh mai a ni em?

Isua’n baptisma a chan zawh khân leia thawh tûra Pathian pêk hna ropui tak chu a thawk ṭan a ni. Luka 3:21-23 leh Johana 6:38 chhiarin, he zawhna hi sawiho vang che u:

• Isua’n baptisma a chan hnuah eng hna nge a nunah a dah pawimawh ber?

5. Baptisma chu i tihhlawhtlin theih tûr thiltum a ni

Inpumpêkna leh baptisma chan chu a tîr chuan thil huphurhawm tak angin a lang thei a. Mahse, chutiang thu tlûkna pawimawh tak siam thei tûra inrintâwkna i neih thlengin hma i sâwn chho thei a ni. Chutianga titu mi ṭhenkhat hriat nân, VIDEO chu chhuah rawh.

Johana 17:3 leh Jakoba 1:5 chhiarin, he zawhna hi sawiho vang che u:

• Engin nge mi chu baptisma chang tûra inpeih tûrin ṭanpui thei?

1. Jehova hnênah chatuana a rawngbâwl kan duh thu hrilhin kan inpumpêk

2. Baptisma kan chan hian Pathian hnênah kan inpumpêk tawh a ni tih thlîrtute hmaah kan lantîr

 6. Baptisma kan chan hian Jehova chhûngkaw zînga mi kan lo ni

Baptisma kan chan hian khawvêl puma chhûngkaw inlungrual tak zîngah kan tel a. Hmun hrang hrang leh ṭobul hrang hrang aṭanga lo chhuak ni mah ila, thurin thuhmun kan nei a, nungchang lama tehna thuhmun neiin kan nung. Sâm 25:14 leh 1 Petera 2:17 chhiarin, he zawhna hi sawiho vang che u:

• Engtin nge baptisma channa chuan mi chu Jehova nêna an inlaichînna leh Amah betu mi dangte nêna an inlaichînna chu a nghawng?

 KHAIKHAWMNA

Isua chuan Kristiante tân baptisma chan a ngai tih a zirtîr a. Chu thiltum hlen tûr chuan Jehova chungah rinna nghet tak neih te, A tehnate mila nun te, leh A hnêna inpumpêkte a ngai a ni.

Ennawnna

• Baptisma chu eng nge ni a, engvângin nge a pawimawh?

• Engtin nge inpumpêkna leh baptisma channa chu a inkûngkaih?

• Inpumpêka baptisma chang tûrin eng rahbite nge rah ngai?