Jehova chuan vâna a chhûngkaw chanchin zir tûrin min duh a. Chu chhûngkuaah chuan “Pathian fate,” tia koh vântirhkohte an tel a ni. (Joba 38:7) Bible-in vântirhkohte chungchâng eng nge a sawi? Eng nge an thawh? Vântirhkoh zawng zawng chu Pathian chhûngkaw zînga mi an ni vek em?

1. Tute nge vântirhkohte chu?

Jehova chuan leilung a siam hmain vântirhkohte a siam a. Amah ang bawkin, anni chu vâna awm hmuh theih loh thlarau an ni. (Hebrai 1:14) Vântirhkoh maktaduai tam tak an awm a, an inang lo ṭheuh va. (Thu Puan 5:11) Anni chuan ‘Jehova thu ngaithlain an zâwm ṭhîn.’ (Sâm 103:20) Hmân laiin, Jehova chuan vântirhkohte chu a mite hnêna a thuchah puang tûr te, ṭanpuina pe tûr te, leh chhanhim tûrtein a tîr ṭhîn a. Tûn laiah, vântirhkohte chuan Kristiante chu Pathian thu zir duhna neite hnênah an hruai a ni.

2. Setana leh a ramhuaite chu tute nge an nih?

Vântirhkoh ṭhenkhat chu Jehova chungah an rinawm reng lo va. Vântirhkoh hel hmasa ber chu “Diabola leh Setana an tih, khawvêl zawng zawng bumtu” a ni. (Thu Puan 12:9) Setana chuan mi dangte chunga rorêl a duh a, chuvângin a helna thlâwp tûrin mihring hmasa berte leh a hnuah vântirhkoh dangte pawh a hmin a. Chûng vântirhkoh helte chu ramhuaite tia koh an ni. Jehova chuan Mikaela leh a vântirhkohte hmangin anni chu vân aṭangin leiah a paihthla a, nakinah tihboral an la ni ang.—Thu Puan 12:9, 12 chhiar rawh.

3. Engtin nge Setana leh ramhuaite’n min bum an tum?

Setana leh ramhuaite chuan mite chu ramhuai zâwlna, a nih loh leh dawithiamna hmangin an hruai sual a, chu chu thlaraute nêna inbiak pawh tumna thil chîn ṭha lo tak a ni. Entîr nân, mi ṭhenkhat chuan arsi hmanga aien thiam te, aisânthiam te, ramhuai zâwl te, leh dawithiamte an râwn ṭhîn a. Mi dangte chuan ramhuai thiltihtheihna nêna inkûngkaihna nei damdawi lama inenkawlnate chu an zawng a. Mite chu mitthite nên an inbe pawh thei tih ring tûra bum an ni bawk. Mahse, Jehova chuan heti hian min vaukhân a ni: “Ramhuai aienthiam zâwlte chu pan suh ula, dawithiamte pawh . . . zawng chhuak suh u,” tiin. (Leviticus 19:31) He vaukhânna hi Setana leh a ramhuaite laka min vênhim nâna pêk kan ni a. Anni chu Pathian hmêlmate an ni a, min tihnat an duh a ni.

 ZIR BELHIN HMUH BELH RAWH

6. Setana leh a ramhuaite chu do hneh rawh

Ramhuaite chu Setana thununna hnuaiah an awm a. Mahse, vântirhkoh rinawmte chu vântirhkoh chungnung ber Mikaela’n a kaihruai a, chu chu Isua hming dang a ni. Ani chuan eng ang khawpin nge thil a tih theih? Thu Puan 12:7-9 chhiarin, hêng zawhnate hi sawiho vang che u:

• Tu nge thil tithei zâwk? Mikaela leh a vântirhkohte nge ni a, Setana leh a ramhuaite zâwkin?

• Isua hnungzuitute tân Setana leh a ramhuaite hlauh a ngaih i ring em?

Setana leh a ramhuaite chu i do hneh thei. Jakoba 4:7 chhiarin, he zawhna hi sawiho vang che u:

• Engtin nge Setana leh ramhuaite lak ata i invênhim theih?

 KHAIKHAWMNA

Vântirhkoh rinawmte chuan min ṭanpui a. Setana leh a ramhuaite chu Jehova hmêlmate an ni a, anni chuan mite bum nân dawithiamna an hmang a ni.

Ennawnna

• Engtin nge Jehova vântirhkohte chuan mite chu a chungchâng zir tûra an ṭanpui?

• Setana leh a ramhuaite chu tute nge an nih?

• Engvângin nge dawithiamna laka inthiarfihlîm chu i duh?