I hmangaih tak tuemaw i sûn tawh em? Chutiang hun harsa takah chuan heti hian i ngaihtuah mai thei: ‘Kan thih hian engtin nge kan awm? Kan hmangaih tak thi tate chu kan hmu leh ngai ang em?’ tiin. He zirlai leh a dawtah Bible chhânna thlamuanthlâk tak kan hmu ang.

1. Kan thih hian engtin nge kan awm?

Isua chuan thihna chu tui taka muthilhna nên a khaikhin a. Tui taka muhîltu chuan a chhehvêla thilthlengte chu a hre lo. Engtin nge thihna leh muthilhna a inan? Mi tuemaw a thih hian nâ a hre tawh lo va. A dam laiin a ṭhiante leh a chhûngte chu eng ang khawpin lo hmangaih pawh ni se, tûnah chuan a hmangaih thei tawh lo. Bible chuan, ‘Mitthi chuan eng mah a hre lo,’ tiin a sawi a ni.—Thuhriltu 9:5 chhiar rawh.

2. Engtin nge thihna chungchânga thu dik hriat chu kan hlâwkpui?

Mi tam tak chuan thih an hlau mai ni lovin, mitthite pawh an hlau hial bawk! Mahse, thihna chungchânga Bible sawi chuan a thlamuan thei che. Isua chuan: “Thutak chuan bâwih a bân ang che u,” tiin a sawi a. (Johana 8:32) Sakhaw ṭhenkhatte sawi nêna inang lo takin, Bible chuan miin a thih hnuah nung zawm zêl thei, thlarau thi thei lo a nei tih a zirtîr lo. Chuvângin, tu mahin an thih hnuah hrehawm an tuar lo va. Chu bâkah, mitthite chuan eng mah an hriat tawh loh avângin min tina thei lo bawk. Chuvângin, mitthite tlawn lungawi, a nih loh leh biak chu a ngai lo va, an tâna ṭawngṭaisak pawh a ngai hek lo.

Mi ṭhenkhat chuan mitthite an biak pawh theih thu an sawi a; mahse, chu chu thil theih a ni lo. Kan hriat tâk ang khân, mitthite chuan “eng mah an hre lo.” An hmangaih thi tawhte nêna inbia anga inngaite chu, a nihna takah chuan mitthi tawh lema chang ramhuaite nên an inbia a ni zâwk a ni. Chuvângin, thihna chungchânga thu dik hriatna chuan ramhuaite lakah min vênghim a. Jehova chuan ramhuaite nêna inbiak pawhna chuan min tina dâwn tih a hriat avângin, mitthite biak tum lo tûrin min vaukhân a ni.—Deuteronomy 18:10-12 chhiar rawh.

3. Mitthite dinhmun dik tak zir rawh

Khawvêl puma mite chuan, kan thih huna thilthleng chungchângah rin dân chi hrang hrang an nei a. Mahse, chûng rin dân zawng zawngte chu a dik vek thei lo.

• Tualchhûngah hian mitthite dinhmun chungchângah eng rin dân nge hluar?

 4. Thihna chungchânga thu dik chu kan hlâwkpui

Thihna chungchânga thu dik hriatna chuan mitthite hlauhna ata min chhuah zalên a. Thuhriltu 9:10 chhiarin, he zawhna hi sawiho vang che u:

• Mitthite’n min tina thei em?

Bible thutak chuan mitthite chu tlawn lungawi tûr, a nih loh leh biak tûr tih ngaih dân lakah min vênghim bawk. Isaia 8:19 leh Thu Puan 4:10, 11 chhiarin, he zawhna hi sawiho vang che u:

• I rin dânin, mitthi betu, a nih loh leh mitthi ṭanpuina zawngtu tuemaw chu Jehova’n engtin nge a ngaih ang?

5. Thihna chungchânga thu dik chuan min thlamuan

Mi tam tak chuan an thih hunah tûn hmaa an thiltihte avângin hrem an tuar dâwn tih zirtîrna an dawng a. Mahse, thil ṭha lo tak tak titute pawh tiamin, mitthite’n hrehawm an tuar lo tih hriatna chuan min thlamuan a ni. Rom 6:7 chhiarin, he zawhna hi sawiho vang che u:

• Bible-a kan chhiar angin, mi chu a thih hunah sual laka a chhuah tawh si chuan, mitthite chuan tûn hmaa an thil sual tihte avângin hrem an tuar thei ang em?

Jehova kan hriat chian poh leh mitthite’n hrem an tuar ngai lo vang tih kan hre chiang lehzual a. Deuteronomy 32:4 leh 1 Johana 4:8 chhiarin, hêng zawhnate hi sawiho vang che u:

• Hêng Bible chânga târ lan miziate neitu Pathian hian mitthi tawhte nghaisak chu a remti ngai ang em?

• Thihna chungchânga thu dik hriat chu a thlamuanthlâk i ti em? Engvângin nge?

 KHAIKHAWMNA

Mi a thih hian a nun a tâwp a. Mitthite chuan hrehawm an tuar lo va, mi nungdamte an tina thei hek lo.

Ennawnna

• Kan thih hian engtin nge kan awm?

• Engtin nge thihna chungchânga thu dik chu kan hlâwkpui?

• Engtin nge thihna chungchânga thu dik chuan min thlamuan?