ZIRLAI 35

Thu Tlûkna Ṭha Siam Theih Dân

PLAY RAWH

Kan za hian thu tlûkna siam tûr kan nei a. Chûng thu tlûkna tam takte chuan kan nunah leh Jehova nêna kan inṭhiannaah a ṭha lam emaw, ṭha lo lam emawin nghawng nasa tak a nei thei a ni. Entîr nân, kan chênna tûr, kan inchâwm dân tûr, a nih loh leh nupui pasal neih tûr chungchângahte thu tlûkna kan siam a ngai thei a. Thu tlûkna ṭhate kan siam hian, nun hlimawm tak kan nei thei a, Jehova kan tilâwm thei bawk a ni.

1. Thu tlûkna ṭha siam tûrin engtin nge Bible i hman theih ang?

Thu tlûkna i siam hmain Jehova ṭanpuina dîlin ṭawngṭai la, a thil thlîr dânte hre tûrin Bible bih chiang ang che. (Thufingte 2:3-6 chhiar rawh.) Dinhmun ṭhenkhatah Jehova chuan thupêk chiang tak a pe a. Chutiang hunah chuan, chu thupêk zâwm tûra thu tlûkna siam chu duhthlan theih ṭha ber a ni ang.

A nih leh, i tih tûr chungchângah Bible thupêk chiang tak awm lo ta se, engtin nge ni ang? Jehova chuan ‘i kalna tûr kawngah’ a la kaihruai thei reng che a ni. (Isaia 48:17) Engtin nge? Nangmah kaihruai theitu tûr thu bulte a awm thei a. Bible thu bulte chu Pathian ngaihtuahna leh a rilru târ langtu thutak bulpuite a ni. Bible-a thilthlengte kan chhiar hian thil engemaw chungchânga Pathian ngaih dân kan hria a. Jehova ngaih dân kan hriat hian amah tilâwmtu thu tlûknate kan siam thei a ni.

2. Thu tlûkna i siam hmain eng thilte nge i ngaihtuah ang?

Bible chuan: ‘Mi remhria chuan a kalna a en ṭha ṭhîn,’ a ti a. (Thufingte 14:15) Chumi awmzia chu thu tlûkna kan siam hmain kan duhthlanna siam tûrte kan ngaihtuah tihna a ni. Duhthlan theihte i ngaihtuah hunah heti hian inzâwt rawh: ‘Eng Bible thu bulte nge ka hman theih ang? Eng duhthlannain nge rilru thlamuanna min pe ang? Ka duhthlanna siam hian engtin nge mi dangte a nghawng ang? A pawimawh berah, Jehova a tilâwm ang em?’ tiin.—Deuteronomy 32:29.

Jehova chuan thil ṭha leh ṭha lo min hrilh tûrin dikna a nei a. A dânte leh a thu bulte kan hriat chiana zawm kan tum tlat hian, chhia leh ṭha hriatna thiang tak kan nei chho va. Chhia leh ṭha hriatna chu chhûngrila a dik leh dik lo kan hriat theihna hi a ni. (Rom 2:13-16) Chhia leh ṭha hriatna sawizawi tawh chuan thu tlûkna ṭhate siam tûrin min ṭanpui ang.

ZIR BELHIN HMUH BELH RAWH

Bible thu bulte leh chhia leh ṭha hriatnain thu tlûkna ṭha siam tûra min ṭanpui dân bih chiang rawh.

3. Bible inkaihhruaitîr rawh

Engtin nge Bible thu bulte’n thu tlûkna kan siam hunah min kaihhruai theih? VIDEO chu chhuah la, a hnuaia zawhnate hi sawiho vang che u.

VIDEO: Bible Thu Bulte Inkaihhruaitîr Rawh (5:54)

Zalên taka duhthlan theihna chu eng nge ni?
Engvângin nge Jehova’n zalên taka duhthlan theihna min pêk?
Zalên taka duhthlan theihna kan neih chu a ṭha thei ang bera hmang tûra min ṭanpui tûrin eng nge min pêk?

Bible thu bul entîrna atân, Ephesi 5:15, 16 chhiar rawh. Tichuan, hêng thilte aṭâna “remchânnate” i lei theih dân sawiho vang che u.

Bible chhiar ziah nân
kawppui, nu leh pa, fapa, a nih loh leh fanu ṭha zâwk nih theih nân
kohhran inkhâwmahte tel nân

4. Thu tlûkna ṭhate siam tûrin i chhia leh ṭha hriatna sawizawi rawh

Thil engemaw chungchânga Bible thupêk chiang tak a awm hunah duhthlanna dik siam chu awlsam angin a lang thei a. Mahse, chutiang thupêk chu awm lo ta se, engtin nge ni ang? VIDEO chu chhuah la, a hnuaia zawhnate hi sawiho vang che u.

VIDEO: “Chhia leh Ṭha Hriatna Thiang Tak Vawng Reng Rawh” (5:13)

Video-ah khân unaunu chuan a chhia leh ṭha hriatna sawizawi tûr leh Jehova tilâwmtu thu tlûkna siam tûrin eng nge a tih?

Engvângin nge mi dangte chu kan thu tlûkna siam tûrte kan siamtîr loh vang? Hebrai 5:14 chhiarin, hêng zawhnate hi sawiho vang che u:

Kan tâna thu tlûkna min siamsak tûra mi dangte ngen chu thil awlsam zâwk angin lang mah se, mahni tân eng nge kan fiah theih ngai?
Chhia leh ṭha hriatna ṭha nei tûr leh thu tlûkna ṭhate siam tûra ṭanpui theitu che eng nge awm?

Map ang maiin kan chhia leh ṭha hriatna chuan nuna kan kalna tûr kawng min kawhhmuh

5. Mi dangte chhia leh ṭha hriatna zah rawh

Mi chi hrang hrangte chuan thu tlûkna chi hrang hrang an siam ang. Engtin nge mi dangte chhia leh ṭha hriatna kan zahzia kan lantîr theih? Dinhmun pahnih lo ngaihtuah ta ila:

Dinhmun 1: Incheina ngaina tak unaunu chu chutianga inchei hmu mawh unaunu tam tak awmna kohhranah a insawn.

Rom 15:1 leh 1 Korinth 10:23, 24 chhiarin, hêng zawhnate hi sawiho vang che u:

Hêng Bible chângte ṭanchhanin, chu unaunu chuan eng thu tlûkna nge a siam theih? I chhia leh ṭha hriatna ang ṭâwmpui lotu nêna in awm dun hunah eng nge i tih ang?

Dinhmun 2: Unaupa pakhat chuan Bible-in a âwm tâwka zu in a khap lo tih a hria a; mahse, in loh a thlang a ni. Ani chu inkawmhonaa tel tûra sâwm a ni a, chutah chuan unaute zu in lai a hmu.

Thuhriltu 7:16 leh Rom 14:1, 10 chhiarin, hêng zawhnate hi sawiho vang che u:

Hêng Bible chângte ṭanchhanin, chu unaupa chuan eng thu tlûkna nge a siam theih? Tuemawin i chhia leh ṭha hriatnain a khap thil engemaw a ti lai hmu ta la, eng nge i tih ang?

Eng rahbite’n nge thu tlûkna ṭha min siamtîr thei?

1. Thu tlûkna siam thei tûrin Jehova ṭanpuina dîl rawh.—Jakoba 1:5.

2. He thu nêna inkûngkaih thu bulte hmuh nân, Bible leh Bible ṭanchhan thu leh hla chhuahte zir bingna nei rawh. Tawnhriat ngah Kristiante i râwn thei bawk ang.

3. I thu tlûkna siamin nangmah leh mi dangte chhia leh ṭha hriatna a nghawng dân tûr chu ngaihtuah rawh.

MI ṬHENKHAT SAWI DAN: “I duh apiang i ti thei alâwm. Mi dang ngaih dân pawisak a ngai lo.”

Engvângin nge Pathian ngaih dân bâkah, mi dangte ngaih dân pawh kan pawisak ang?

KHAIKHAWMNA

Thil engemaw chungchânga Jehova ngaih dân kan hriat hunah leh kan thiltihin mi dangte chunga ṭhatna emaw, chhiatna emaw a thlen dân tûr kan ngaihtuah hian thu tlûkna ṭha kan siam ṭhîn.

Ennawnna

Engtin nge Jehova tilâwmtu thu tlûknate i siam theih?
Engtin nge i chhia leh ṭha hriatna i sawizawi theih?
Engtin nge mi dangte chhia leh ṭha hriatna i zahzia i lantîr theih?

Zir zawh nî:

Tih tum rawh

Nakin lawka thu tlûkna i siam tûr chu lo ngaihtuah lâwk la. “ Eng Rahbite’n Nge Thu Tlûkna Ṭha Min Siamtîr Thei?” tih bâwma rahbi pathum chu hmang ang che.

A dang:

I thiltum dang