ZIRLAI 37

Hna leh Sum Chungchânga Bible Sawi Chu

PLAY RAWH

Hna emaw, sum emaw avângin i rilru a hah tawh ngai em? Kan mamawhte ngaihsak chunga a phû anga Jehova biak chu a harsa thei a. Bible chuan min ṭanpui thei thurâwn ṭha takte min pe a ni.

1. Bible-in hna chungchângah eng nge a sawi?

Pathian chuan kan hnathawha hlim tûrin min duh a. Bible chuan, “Mihring tân chuan . . . a thawhrimnaa a rilru tihnawm te aliama ṭha a lo awm lo,” tiin a sawi a. (Thuhriltu 2:24) Jehova chu a taima hle a. Amah entawna taima taka hna kan thawh hian a thinlung kan tilâwmin lungawina kan nei a ni.

Hna chu a pawimawh a. Mahse, Jehova kan biakna aiin kan dah pawimawh ngai tûr a ni lo. (Johana 6:27) Amah kan dah hmasak chuan kan tisa lam mamawhte min pe ang tih min tiam a ni.

2. Sum leh pai thlîr dân inbûk tâwk chu eng nge ni?

Bible chuan: “Tangka sum himna a ni,” tiin sawi mah se, sum neih ringawtin hlimna min pe thei lo tih vaukhânna min pe bawk. (Thuhriltu 7:12) Chuvângin, tangka sum ngaina lo tûr leh kan ‘thil neih chhun chunga lungawi’ tûra fuih kan ni. (Hebrai 13:5 chhiar rawh.) Kan thil neiha lungawina kan neih hian neih belh zêl duhna avânga beidawnna kan pumpelh a. Ṭûl lo taka leiba neih pawh kan pumpelh bawk a. (Thufingte 22:7) Chu bâkah, pawisa khelhna leh rang taka hausak thut theihna thil hlauhawmte chu kan pumpelh bawk a ni.

3. Engtin nge sum leh pai chu hmasialna tel lova kan hman theih?

Jehova chu Pathian thil phal tak a ni a, “thil phala thawhlâwm peih” kan nih hian ani chu kan entawn a ni. (1 Timothea 6:18) Kan sum leh paite chu kohhran ṭanpui nân leh ṭanpui ngaite, a bîk takin Kristian unaute ṭanpui ngaite ṭanpui nân kan hmang thei a. Jehova chuan kan pêk zât lam ni lovin, pe tûra min chêttîrtu lam chu a ngaihven zâwk a. Thinlung aṭanga phal taka kan pêk hian, hlimna kan nei ang a, Jehova kan tilâwm bawk ang.—Tirhkohte 20:35 chhiar rawh.

ZIR BELHIN HMUH BELH RAWH

Hna chungchânga thlîr dân inbûk tâwk neih leh lungawina neih a hlâwknate chu zir belh ang che.

4. I hnathawh dân hmangin Jehova chawimawi rawh

Jehova nêna kan inṭhianna chuan hna chungchânga kan rilru put hmang a thunun tûr a ni. VIDEO chu chhuah la, a hnuaia zawhnate hi sawiho vang che u.

VIDEO: Jehova Tân Thinlung Zawng Zawngin Thawk Rawh (4:39)

Video-ah khân hnathawhnaa Jason-a rilru put hmang leh nungchang chungchângah engin nge i rilru khawih?
Hna chu a hmun tûr dik taka dah reng tûrin eng nge a tih?

Kolossa 3:23, 24 chhiarin, he zawhna hi sawiho vang che u:

Engvângin nge hna chungchânga kan rilru put hmang chu a pawimawh?

Hna chu a pawimawh a. Mahse, Jehova kan biakna aiin kan dah pawimawh zâwk ngai tûr a ni lo

5. Lungawina chu kan hlâwkpui

Mi tam tak chuan sum neih tam tumin theih tâwp chhuahin an zawng a. Mahse, Bible chuan thurâwn dang min pe a ni. Timothea thawn khat 6:6-8 chhiarin, he zawhna hi sawiho vang che u:

Bible chuan eng ti tûrin nge min fuih?

Sum leh pai nei tam lo mah ila, kan hlim thei. VIDEO chu chhuah la, a hnuaia zawhna hi sawiho vang che u.

VIDEO: “In Thil Neih Chhun Chungahte Chuan Lungawi Rawh U” (3:20)

Sum leh pai nei tam lo chung pawhin, hêng chhûngkuate hlim chhan chu eng nge ni?

Mahse, tam tak kan nei sa reng chung pawha neih belh zêl kan duh chuan engtin nge ni ang? Isua’n tehkhin thu hmangin a hlauhawmna a sawi a ni. Luka 12:15-21 chhiarin, he zawhna hi sawiho vang che u:

Isua tehkhin thu aṭangin eng nge i zir?—Châng 15-na en rawh.

Thufingte 10:22 leh 1 Timothea 6:10 chhiarin khaikhin rawh. Tichuan, hêng zawhnate hi sawiho vang che u:

Eng nge pawimawh zâwka i rin? Jehova nêna inṭhianna nge ni a, sum tam tak neih zâwk? Engvângin nge?
Sum leh pai ûmna chuan eng harsatnate nge a thlen?

6. Jehova chuan kan mamawhte min ngaihsak ang

Hna leh sum lama kan harsatna chuan Jehova kan rinna a fiah thei. Chûng rinna fiahnate kan hmachhawn theih dân hriat nân VIDEO chu chhuah la; tichuan, a hnuaia zawhnate hi sawiho vang che u.