ZIRLAI 46
Engvângin Nge Inpumpêka Baptisma Kan Chan Ang?
Pathian Jehova hnênah ṭawngṭaiin a rawng chauh i bâwl tawh tûr thu leh i nunah amah i dah hmasak ber tawh tûr thu tiamin a hnênah i inpumpêk a. (Sâm 40:8) Chumi hnuah, baptisma i chang a ni. Chu chuan mi dangte hnênah inpumpêkna i nei tawh tih a târ lang. Jehova hnêna inpumpêk hi thu tlûkna kan siam theih azawnga pawimawh ber a ni a. Chutiang thu tlûkna pawimawh tak leh nun thlâk danglamtu siam tûr chuan engin nge chêttîr ang che?
1. Engin nge mi chu inpumpêk tûra chêttîr?
Jehova hnêna inpumpêk tûra min chêttîrtu chu hmangaihna a ni a. (1 Johana 4:10, 19) Bible chuan: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,” tiin min fuih a. (Marka 12:30) Pathian kan hmangaihna chu kan thusawiah chauh ni lovin, kan thiltih pawhin kan lantîr bawk. Nula leh tlangvâl chu an inhmangaih tak tak avânga an innei ang hian, Jehova kan hmangaihna chuan a hnêna inpumpêka baptisma chang tûrin min chêttîr a ni.
2. Jehova chuan baptisma chang tawh a Thuhretute hnênah eng malsâwmnate nge a pêk?
Baptisma i chan hian Jehova chhûngkaw hlim tak zînga mi i lo ni a. Tichuan, kawng tam takin a hmangaihna i dawng ang a, a hma aiin amah i hnaih telh telh bawk ang. (Malakia 3:16-18 chhiar rawh.) Jehova chu Pa anga i neih bâkah, amah leh nangmah hmangaihtu khawvêl pum huap thlarau lam chhûngkua i nei bawk ang. (Marka 10:29, 30 chhiar rawh.) Mahse, baptisma i chan theih hmain tih tûr ṭhenkhat i nei ngei mai a. Jehova chungchâng i zir a, amah i hmangaih a, a Fapa i rin a ngai a ni. Chumi hnuah, Jehova hnênah i inpumpêk tûr a ni. Chûng thilte i tih hnuah baptisma i chang a nih chuan chatuana hlimna kawng i zawh a ni ang. Pathian Thu chuan: “[Baptisma] chuan . . . tûnah a chhandam che u a ni,” tiin a sawi a ni.—1 Petera 3:21.
ZIR BELHIN HMUH BELH RAWH
Jehova hnêna inpumpêka baptisma chan i tâna a pawimawh chhan bih chiang rawh.
3. Kan za hian tu rawng nge kan bâwl dâwn tih duh kan thlang tûr a ni
Hmân lai Israel hunah, mi ṭhenkhat chuan Jehova leh Baala an be kawp thei niin an hria a. Mahse, Jehova’n chu an ngaihtuahna dik lo chu siam ṭha tûrin a zâwlnei Elija a tîr a ni. Lalte Pakhatna 18:21 chhiarin, he zawhna hi sawiho vang che u:
-
Israel mite’n eng duhthlanna nge an siam ngai?
Israel mite ang bawkin, keini pawhin tu rawng nge kan bâwl dâwn tih kan thlan a ngai a. Luka 16:13 chhiarin, hêng zawhnate hi sawiho vang che u:
-
Engvângin nge Pathian Jehova leh mi tuemaw, a nih loh leh thil engemaw kan biak kawp theih loh?
-
Engtin nge Jehova hnênah amah biak kan thlang tih kan lantîr?
4. Jehova hmangaihna che chu chhût ngun rawh
Jehova chuan thil ṭha tam tak min pe a. Eng nge kan pêk ve theih? VIDEO chu chhuah rawh.
Jehova’n a hmangaihna che a lantîr dân kawng ṭhenkhat chu engte nge ni? Sâm 104:14, 15 leh 1 Johana 4:9, 10 chhiarin, hêng zawhnate hi sawiho vang che u:
-
Jehova thilpêkte zîngah eng atân nge i lâwm bîk?
-
Chûng a thilpêkte avâng chuan ani chu engtin nge i ngaih?
Kan duh zâwng tak thilpêk kan dawn hian min petu chungah kan lâwmzia lantîr kan duh ṭhîn. Deuteronomy 16:17 chhiarin, he zawhna hi sawiho vang che u:
-
I tâna Jehova thiltih zawng zawngte i ngaihtuah hian a hnênah eng nge pêk lêt ve i duh?
5. Inpumpêkna chuan malsâwmna tam tak a thlen
Mi tam tak chuan hmingthanna te, hna ṭha te, a nih loh leh sum leh paite chuan hlimna a pêk an ring a. Chu chu a dik em? VIDEO chu chhuah la, a hnuaia zawhnate hi sawiho vang che u.
-
Video-a kan en tâk infiam mi khân football khelh ngaina hle mah se, engvângin nge a bânsan?
-
A nun chu football khelh nân ni lovin, Jehova rawngbâwl nâna pumpêk tûrin thu tlûkna a siam a. Thu tlûkna dik a siamin i hria em? Engvângin nge?
Tirhkoh Paula chuan Kristian a nih hma khân hna sâng tak a chelh a. Zirtîrtu hming thang tak hnênah Juda dân a zir a ni. Mahse, Kristian a nih theih nân chu chu a kalsan a. Paula chu a inchhîr em? Philippi 3:8 chhiarin, hêng zawhnate hi sawiho vang che u:
-
Engvângin nge Paula chuan Kristian a nih hmaa a thiltihte “hnâwmhneah,” a nih loh leh bawlhhlawh anga a ngaih thu a sawi?
-
Chumi aiah eng nge a dawn?
-
Engtin nge Jehova rawngbâwl chu kawng danga i nun i hman theih dân nên i khaikhin ang?
Paula chuan Kristian a rawn nih khân, a thil chân tâk aia tam a hmu
MI ṬHENKHAT SAWI DAN: “Pathian hnêna inpumpêk chu thil âtthlâk tak a ni.”
-
Engvângin nge Jehova hnêna inpumpêk chu thil ṭha tak nia i hriat?
KHAIKHAWMNA
Hmangaihna chuan Jehova hnêna inpumpêka baptisma chang tûrin min chêttîr.
Ennawnna
-
Engvângin nge Jehova’n thinlung zawng zawnga amah kan hmangaih leh kan biak a phû?
-
Engtin nge Jehova chuan baptisma chang tawh a Thuhretute chu mal a sâwm?
-
Jehova hnêna inpumpêk chu i duh em?
HRIAT BELH NAN
Rimawi tum thiam leh infiam miin Jehova hnêna inpumpêk an thlan chhan en rawh.
Ṭhalaite Zawhna—Ka Nunah Eng Nge Ka Tih Ang?—Thlîr Lêtna (6:54)
Inpumpêkna tûr chhan dangte ngaihtuah rawh.
“Engvângin Nge Pathian Jehova Hnênah I Inpumpêk Ang?” (Vênnainsâng, January 1, 2010)
He music video-ah hian, Jehova hnêna inpumpêkte’n hlimna an neih dân en rawh.
“Kum Tam Tak Chhûng Chu Heti Hian Ka Ngaihtuah, ‘Engvângin Nge Kan Lo Pian Chhuah?’” tih nun kawng chanchina nu pakhat chu a ngaih pawimawhte chhût ngun tûra chêttîrtu chu lo chhinchhiah rawh.
You May Also Like
ZAWH FO ṬHIN ZAWHNATE
Jehova Thuhretute Ruahman Bible Zirna Chu Eng Nge Ni?
Jehova Thuhretute ruahman a thlâwna sawihona phûrawm takah Bible lehlin eng pawh i hmang thei a. I chhûngte leh i ṭhian tu pawh i sâwm thei a ni.
