Kan za hian kan inthuam dân tûr leh kan inchei dân tûrah duh dân kan nei ṭheuh va. Bible thu bul tluang tak ṭhenkhat kan zâwm a nih chuan, kan mi mal duh zâwng chauh ni lovin Jehova tilâwmtu kan thlang thei ang. Chûng thu bul ṭhenkhat chu i lo ngaihtuah ang u.

1. Silhfên leh inchei dân tûr kan thlan hunah eng thu bulte’n nge min kaihruai ang?

“Inthlahdah lo leh inbel lutuk lovin, thuam inchawih tâwkin,” kan inchei tûr a ni a, ‘Pathian kan ngaihsakzia’ târ langtu lan dân thianghlim tak kan nei reng tûr a ni. (1 Timothea 2:9, 10) Hêng thu bul palite hi ngaihtuah rawh: (1) Inthuamna kawngah kan ‘inthlahdah tûr a ni lo.’ Kan incheina chu a zahawm tûr a ni a, mipat hmeichhiatna lama mite châkna chawk tho thei emaw, mite ngaihsakna la lutuk thei emaw a ni tûr a ni lo. (2) Silhfên leh inchei dân chhuak thar apiangte mila kan inchei loh hian kan ‘inbel lutuk lo’ tihna a ni a. (3) Kan thuam chu ‘inchawih tâwk’ a ni tûr a ni. Kohhran inkhâwma i hmuh angin, Jehova mite chuan duh dân chi hrang hrang an nei a; mahse, kan silhfên leh sam put dânte chuan kan biak Pathian chungah zahna a lantîr a ni. (4) Kan lan dân chuan ‘Pathian kan ngaihsakzia’ a târ lang reng tûr a ni a, chutiang chuan mi dangte’n Pathian dik kan bia tih awlsam takin an hre thei ang.—1 Korinth 10:31.

2. Engtin nge kan lan dânin kan Kristian unaute chungah nghawng a neih theih?

Kan inthuam dân tûrah zalên taka duhthlan theihna nei mah ila, kan lan dânin mi dangte chunga nghawng a neih theih dân kan ngaihtuah tûr a ni. Mi dangte tilungni lo lo tûrin theih tâwp kan chhuah mai ni lovin, kan “vêngte tihsâwt nân an ṭhatna tûrin tihlâwm” kan tum zâwk a ni.—Rom 15:1, 2 chhiar rawh.

3. Engtin nge kan lan dânin mi dangte biakna dikah a hîp theih?

A hun leh hmun azira inâwm taka inthuam kan tum laiin, a bîk takin kohhran inkhâwma kan tel hunah leh rawngbâwlnaa kan tel hunah kan fîmkhur lehzual a ni. Kan lan dân avânga chanchin ṭha aṭanga mite rilru lâk pên chu kan duh lo va. Chu aiin, kan lan dân chuan mi dangte thutak lamah a hîp thei a; chu bâkah, ‘min Chhandamtu zirtîrna thu a cheimawitîr’ thei a ni.—Tita 2:9, 10.

 ZIR BELHIN HMUH BELH RAWH

4. Lan dân mawi chuan Jehova zahna a lantîr

Kan lan dân chungchâng kan ngaih pawimawh chhan ber chu eng nge ni? Thu Puan 4:10, 11 chhiarin, hêng zawhnate hi sawiho vang che u:

• Engtin nge Jehova aiawhtu kan nihnain kan inchei dânah nghawng a neih ang?

• Inkhâwmna leh rawngbâwlnaa kan tel huna kan lan dân ngaih pawimawh chu thil inâwm tak niin i hria em? Engvângin nge?

 5. Silhfên leh incheina chungchânga duhthlanna ṭha siam dân

VIDEO chu chhuah rawh.

Kan thawmhnaw chu a man to emaw, a tlâwm emaw pawh ni se, a thianghlimin a hun leh hmun nêna inmilin kan inchei tûr a ni. Korinth thawn khat 10:24 leh 1 Timothea 2:9, 10 chhiar rawh. Tichuan, hetiang thawmhnaw hâk kan pumpelh chhan tûr sawiho vang che u.

• thâwl lutuk, a nih loh leh duhdah lutuk

• tâwt lutuk te, taksa lang tam lutuk, a nih loh leh mipat hmeichhiatna lama châkna chawk tho theite

Kristiante chu Mosia Dân hnuaiah awm tawh lo mah se, chu chuan Jehova ngaihtuahna a târ lang a ni. Deuteronomy 22:5 chhiarin, he zawhna hi sawiho vang che u:

• Engvângin nge mipa hmeichhia anga lan theihna, a nih loh leh hmeichhia mipa anga lan theihna silhfên leh incheinate kan pumpelh ang?

Korinth thawn khat 10:32, 33, leh 1 Johana 2:15, 16 chhiarin, hêng zawhnate hi sawiho vang che u:

• Engvângin nge kan lan dânin tualchhûng leh kohhrana mi ṭhenkhatte chunga nghawng a neih dân chu kan ngaih pawimawh ang?

• I chênna hmuna silhfên leh incheina tlânglâwn tak chu eng nge ni?

• Chûng inchei dân ṭhenkhat chu Kristiante tân a inâwmin i hria em? Engvângin nge?

 KHAIKHAWMNA

Kan lan dân chungchânga thu tlûkna ṭha kan siam hian, Jehova leh mi dangte kan zahzia kan lantîr.

Ennawnna

• Engvângin nge kan silhfên leh inchei dân chu Jehova tân a pawimawh?

• Eng thu bul ṭhenkhatte’n nge kan lan dân tûr chungchânga thu tlûkna kan siam hunah min kaihhruai ang?

• Engtin nge kan lan dân chuan mi dangte’n biakna dik an thlîr dân a nghawng theih?