Isua chu Kristian kohhran Lû a ni a. (Ephesi 5:23) Tûn laiah, Isua chuan vân aṭangin “bawih rinawm, fing tak” hmangin leia a hnungzuitute chu a kaihruai a ni. (Matthaia 24:45 chhiar rawh.) Isua ngeiin a ruat chu “bawih” chuan thu neihna engemaw chen a nei ang a; mahse, Krista bawih ni rengin Krista unaute rawng an bâwl a ni. Chu bawih chu tu nge ni? Engtin nge min ngaihsak?

1. “Bawih rinawm, fing tak” chu tu nge ni?

Jehova chuan a mite hnêna kaihhruaina pe tûrin mipa tuemaw, a nih loh leh mipa ṭhenkhat chu a hmang ṭhîn a. (Malakia 2:7; Hebrai 1:1) Isua thih hnuah Jerusalema tirhkohte leh upate chuan hma an hruai a ni. (Tirhkohte 15:2) Chu tih dân chu zuiin, tûn laia upa tlêm tê—Jehova Thuhretute Governing Body—chuan thlarau lam chaw pein, thuhrilh rawngbâwlna a kaihruai a ni. Chu pâwl chu ‘bawih rinawm, fing tak, [Isua’n] hotua a siam’ a ni a. (Matthaia 24:45) Governing Body member zawng zawngte chu hriak thih Kristian, an lei lam nun a zawh hnua vân lam Lalrama Krista rorêlpui tûrte an ni.

2. Bawih rinawm chuan eng thlarau lam chaw nge a pêk chhuah?

Isua’n bawih rinawm chuan ‘[a Kristian unaute] chaw chan tûr a semsak’ dâwn tih a sawi a. (Matthaia 24:45) Kan chaw eiin tisa lama chak tûr leh hrisêl tûra min ṭanpui ang bawkin, thlarau lam chaw—Pathian Thu aṭanga kaihhruaina—chuan Jehova chunga rinawm reng tûr leh Isua min pêk hnate thawk zo tûrin kan mamawh chakna min pe a ni. (1 Timothea 4:6) Chûng thlarau lam chaw chu inkhâwm te, bial inkhâwmpui te, leh regional inkhâwmpui te bâkah, Pathian duh zâwng hre thiam tûr leh amah nêna kan inlaichînna tinghet tûra min ṭanpuitu Bible ṭanchhan thu leh hla chhuah leh video-te aṭangin kan dawng a ni.

 ZIR BELHIN HMUH BELH RAWH

3. Jehova mite chu ṭha takin an inrêlbâwl tûr a ni

Isua kaihhruaina hnuaiah Governing Body chuan Jehova Thuhretute rawngbâwlna chu a kaihruai a. Isua’n Kristian hmasate pawh chutiang chiah chuan a kaihruai a ni. VIDEO chu chhuah rawh.

Korinth thawn khat 14:33, 40 chhiarin, he zawhna hi sawiho vang che u:

• Engtin nge hêng chângte hian Jehova’n a Thuhretute chu ṭha taka inrêlbâwl tûrin a duh tih a târ lan?

4. Bawih rinawm chuan kan thu hrilh rawngbâwlna a huaihawt

Thuhrilhna hi Kristian hmasate lo thawh hna pawimawh ber a ni a. Tirhkohte 8:14, 25 chhiarin, hêng zawhnate hi sawiho vang che u:

• Kristian hmasate zîngah tuin nge thuhrilh rawngbâwlna kawngah kaihhruaina pe?

• Engtin nge Petera leh Johana’n an tirhkohpuite kaihhruaina an chhân lêt?

Thuhrilhna hi Governing Body huaihawt hna pawimawh ber a ni. VIDEO chu chhuah rawh.

 Isua chuan thuhrilh a pawimawhzia a sawi uar a. Marka 13:10 chhiarin, hêng zawhnate hi sawiho vang che u:

• Engvângin nge thuhrilh rawngbâwlna chu Governing Body tân thil pawimawh tak a nih?

• Engvângin nge he khawvêl pum huap hna huaihawt tûr hian “bawih rinawm, fing tak” kan mamawh?

5. Bawih rinawm chuan kaihhruaina a pe

Governing Body chuan khawvêl pum huapa Kristiante hnênah kaihhruaina a pe a. Engtin nge kaihhruaina pêk tûrte chu a thlan? Kristian hmasate hun laia governing body tih dân chu ngaihtuah rawh. Tirhkohte 15:1, 2 chhiarin, hêng zawhnate hi sawiho vang che u:

• Kristian hmasa ṭhenkhatte zîngah eng thu buai nge awm?

• Chu thu buai chingfel tûr chuan Paula, Barnaba, leh mi dangte chu tu hnênah nge an kal?

Tirhkohte 15:12-18, 23-29 chhiarin, he zawhna hi sawiho vang che u:

• Kum zabi khatnaa governing body khân thu tlûkna a siam hmain thu buai chungchânga Pathian kaihhruaina an zawnnaah eng nge a ngaihtuah?—Châng 12, 15, leh 28 en rawh.

Tirhkohte 15:30, 31 leh 16:4, 5 chhiarin, hêng zawhnate hi sawiho vang che u:

• Engtin nge Kristian hmasate khân governing body kaihhruaina pêk chu an chhân lêt?

• Engtin nge Jehova’n an thuâwihna chu mal a sâwm?

Timothea thawn hnih 3:16 leh Jakoba 1:5 chhiarin, he zawhna hi sawiho vang che u:

• Tun laia Governing Body-in thu tlûkna a siam hian khawiah nge kaihhruaina a zawn?

 KHAIKHAWMNA

Governing Body chu Krista ruat “bawih rinawm, fing tak” a ni a. Ani chuan lei puma Kristiante hnênah kaihhruaina leh thlarau lam chaw a pe a ni.

Ennawnna

• Tuin nge “bawih rinawm, fing tak” ruat?

• Engtin nge Governing Body-in min ngaihsak?

• Governing Body chu “bawih rinawm, fing tak” a ni tih i ring em?