Jehova chu i hmangaih tak zet a, amah tilâwm lotu thilte pumpelh tûrin theih tâwp i chhuah bawk a; chungti chung pawhin thil tihsual châng i nei palh thei a ni. Mahse, sual ṭhenkhat chu a dang aiin a pawi zâwk a. (1 Korinth 6:9, 10) Thil sual pawi tak i tih chuan Jehova’n a la hmangaih reng che a, ngaidam a, ṭanpuina pêk che a inpeih reng a ni tih hre reng ang che.

1. Jehova ngaihdamna dawng tûrin eng nge kan tih ngai?

Jehova hmangaihtute chu thil sual pawi tak an ti a ni tih an inhriat chhuah hian nasa takin an lungngai a. Mahse, Jehova’n a mite hnêna a thutiam: “In sualte chu sen lâr angin awm tawh mah sela, vûr angin a vâr ang,” tihah hian thlamuanna an hmu a ni. (Isaia 1:18) Kan inchhîr tak zet chuan Jehova’n min ngaidam pumhlûm ang. Engtin nge kan inchhîr ang? Inchhîr tak zetna chuan thil ṭha lo kan tih bânsan tûr leh Jehova ngaihdamna dîl tûrin min chêttîr ang. Tichuan, thil sual tihna min thlentu ngaihtuahna ṭha lo, a nih loh leh thil chîn ṭha lote thlâk tûrin theih tâwp kan chhuah ang a, Jehova tehna thianghlimte mila nun kan tum tlat ang.—Isaia 55:6, 7 chhiar rawh.

2. Engtin nge Jehova’n thil sual kan tih huna min ṭanpui tûrin upate a hman?

Thil sual pawi tak kan ti a nih chuan, Jehova’n ‘kohhran upate ko’ tûrin min hrilh a ni. (Jakoba 5:14, 15 chhiar rawh.) Hêng upate hian Jehova leh a berâmte an hmangaih a. Anni chu Jehova nêna kan inlaichînna siam ṭha tûra min ṭanpui tûrin an tling a ni.—Galatia 6:1.

Engtin nge upate chuan thil sual pawi tak kan tih hunah min ṭanpui? Upa pahnih emaw, pathum emawin Bible ṭanchhanin zilhna min pe ang. Anni chuan thil sual tinawn lo tûra min ṭanpui tûrin thurâwn ṭangkai tak leh fuihnate min pe bawk ang. Jehova nêna kan inlaichînna a ṭhat leh hma chu Kristian thiltih ṭhenkhatah min teltîr lo pawh a ni thei. Thil sual pawi tak tituin inchhîrna dik a neih loh chuan, upate chuan thununna hlauhawm laka kohhran vênhim nân ani chu an hnawt chhuak ang.

 ZIR BELHIN HMUH BELH RAWH

3. Inpuanna chuan Jehova nêna inṭhianna nei leh tûrin min ṭanpui

Thil sual kan tih apiang hian Jehova rilru a tihnat avângin a hnênah kan inpuang nghâl tûr a ni. Sâm 32:1-5 chhiarin, he zawhna hi sawiho vang che u:

• Engvângin nge kan thil sual tihte thupbo tum aia Jehova hnêna inpuan chu kan tân thil ṭha tak a nih?

 4. Hnawhchhuahna—ṭanpuina leh vênhimna a nih dân

Thil sual pawi tak tituin Jehova tehnate a zâwm duh lo a nih chuan kohhranah a awm reng thei tawh lo. Ani chu hnawhchhuah a ni ang a, kan kâwm tawh lovin, biak pawh kan be tawh lo vang. Korinth thawn khat 5:6, 11 leh 2 Johana 9-11 chhiarin, he zawhna hi sawiho vang che u:

• Dawidimin chhang pum a fan chhuak angin engtin nge thil sual ti inlamlêt duh lo kawmnain kohhranah nghawng a neih theih?

 KHAIKHAWMNA

Thil sual pawi tak kan ti a; mahse, kan inchhîr tak zeta thil ṭha lo tih tawh loh kan tum tlat chuan Jehova’n min ngaidam ang.

Ennawnna

• Engvângin nge Jehova hnêna sual inpuan chu kan tân thil ṭha tak a nih?

• Kan sual ngaihdam ni tûrin eng nge kan tih ngai?

• Thil sual pawi tak kan ti a nih chuan engvângin nge upate ṭanpuina kan zawn ang?