Kristian dikte chuan Jehova an biakna chu thil eng mah leh mi tumah tihchhiattîr loh chu an tum tlat a. Chu chu i tum a ni ve ngei ang. Jehova chuan i rinawmna chu a ngaihlu a. (1 Chronicles 28:9 chhiar rawh.) Eng dinhmunte’n nge a chunga i rinawmna fiah thei a, chûng thilte chu engtin nge i hmachhawn theih?

1. Engtin nge mi dangte’n Jehova chunga kan rinawmna an fiah theih?

Mi ṭhenkhat chuan Jehova rawng bâwl lo tûra min dan beh an tum ang. Chutiang thil chu tute’n nge ti ang? Thutak kalsantu ṭhenkhat chuan kan rinna tihchhiat tumin Pathian inawpna pâwl chungchângah dâwt an sawi a. Anni chu kalpêngte tia koh an ni. Chu bâkah, sakhaw hruaitu ṭhenkhat chuan a hlauhawmna hre lote’n thutak an chhuahsan theih nân kan chungchângah thu dik lo an theh darh bawk. Dodâltute nêna inhnial te, an lehkhabu leh blog-a an thu pho chhuah chhiar te, an website tlawh te, a nih loh leh an video ente chu kan tân thil hlauhawm tak a ni thei. Rinawm taka Jehova rawngbâwltute tihlunghnual tumtute chungchângah Isua chuan heti hian a sawi a ni: “Anni chu pawisa suh u; hruaitu mitdel an ni, tichuan, mitdelin mitdel vêk a hruai chuan khuarkhurumah an tla dûn ang,” tiin.—Matthaia 15:14.

2. Mi mal thu tlûkna engte’n nge Jehova chunga kan rinawmna fiah thei?

Jehova kan hmangaihna chuan sakhaw dik lo nêna inkûngkaihna engmah nei lo tûrin min chêttîr a. Chuvângin, kan hna te, kan telna pâwl te, a nih loh leh kan thiltih a enga mah hian sakhaw dik lo nên inzawmna a nei tûr a ni lo. Jehova chuan heti hian min vaukhân a ni: “Ka mite u, . . . [Babulon Khaw Ropui] chhûng ata chhuak rawh u,” tiin.—Thu Puan 18:2, 4.

 ZIR BELHIN HMUH BELH RAWH

3. Zirtîrtu derte lakah invêng rawh

Jehova inawpna pâwl chungchângah thu ṭha lote kan hriat chuan engtin nge kan chhân lêt ang? Thufingte 14:15 chhiarin, he zawhna hi sawiho vang che u:

• Engvângin nge kan thu hriat apiang ring mai lo tûrin kan fîmkhur ang?

Johana thawn hnih 9-11 chhiarin, hêng zawhnate hi sawiho vang che u:

• Kalpêngte chu engtin nge kan cheibâwl ang?

• Kalpêngte nên hmaichhanah inkâwm lo mah ila, engtin nge kawng danga kan lo kawm reng theih?

• Jehova leh a inawpna pâwl chungchânga thu ṭha lote kan ngaithla a nih chuan ani’n engtin nge a ngaih i rin?

4. I unauvin thil sual a tih hunah Pathian chungah rinawm reng rawh

Kohhrana mi tuemawin thil sual pawi tak a ti tih kan hriat chuan eng nge kan tih ngai? Hmân lai Israelte hnêna Pathian Dân pêk phêna awm thu bul hi ngaihtuah rawh. Leviticus 5:1 chhiar rawh.

He chânga kahhruaina pêk angin, miin sual pawi tak a ti tih kan hriat chuan kan thu hriat chu upate hnênah kan hrilh tûr a ni. Mahse, chutianga tih hmain thil sualtitu chu upate hnêna kal a, a sual puang tûra hrilh chu ngilneihna lantîrna a ni ang. Chutianga a tih loh chuan Jehova chunga kan rinawmna chuan kan thu hriatte upate hnêna hrilh tûrin min chêttîr tûr a ni. Chutianga tihna chu engtin nge a hnuaia târ lante chunga hmangaihna lantîrna a nih?

• Pathian Jehova

• Thil sual titu

• Kohhrana mi dangte

 5. Babulon Khaw Ropui chhuahsan rawh

 KHAIKHAWMNA

Jehova chunga rinawm reng tûr chuan min hruai sual tumtute kan kawm loh a ngai a ni.

Ennawnna

• Engvângin nge kalpêngte ngaih dân chu kan ngaihthlâk loh vang?

• Kan unau tu emawin sual pawi tak a ti tih kan hriat chuan, eng nge kan tih ang?

• Engtin nge sakhaw dik lo tlânsan tûra vaukhânna chu kan zawm ang?