Inneihna hian chhûngkaw thar a din a. I nu leh pate chu hmangaihin, zah reng dâwn mah la, i kawppui hi i tân chuan leia mi pawimawh ber a ni ta. Chu chu i chhûngte zînga mi ṭhenkhat tân pawm harsa tak a ni mai thei. Mahse, Bible thu bulte chuan inbûk tâwk tûrin a ṭanpui thei che a; chutiang chuan chhûngkaw inlaichînna thar atâna thawk rim reng chungin chhûngkhatte nên inrem takin in awm thei ang.

BIBLE SAWI DAN CHUAN: “I nu leh i pa chawimawi rawh.” (Ephesi 6:2) Kum eng zât mi pawh ni la, i nu leh pate i chawimawiin, i zah reng tûr a ni. I kawppui pawhin, tuemaw tâna fanu emaw, fapa emaw a nih angin, a nu leh pate a ngaihsak a ngai tih hria ang che. “Hmangaihnain a îtsîk lo va,” chuvângin, i kawppuiin anmahni nêna inlaichînna a neih chu ngaihṭhat loh nân hmang suh.—1 Korinth 13:4; Galatia 5:26.

I TIH THEIH CHU:

• Ṭawngkam huap zau tak, “I chhûngte chuan min hmusit reng alâwm,” tih emaw, “I nu hian ka thiltih chu a duh ngai lo,” tih emaw ang chite chu pumpelh rawh

• I kawppui thil thlîr dân aṭanga thlîr thiam tum rawh

BIBLE SAWI DAN CHUAN: “Mipain a nu leh a pa a kalsan ang a, a nupui a vuan ang: ti chuan tisa pum khat an lo ni tawh ang.” (Genesis 2:24) Nupui pasal i han neih hian, i nu leh pate chuan i chungah mawhphurhna la nei nia inhriain, in nupa inkârah duh aiin an rawn inrawlh thui mai thei a ni.

An tâna ramri khamsak chin tûr chu in thu tlûkna siam tûr a ni a, chu chu an hnênah ngilnei takin in hriattîr tûr a ni. Hawihhâwm lo chuang si lovin, tlang tak leh inhawng takin hrilh rawh. (Thufingte 15:1) Inngaihtlâwmna, thuhnuairawlhna, leh dawhtheihna chuan i chhûngkhatte nêna inlaichînna duhawm tak siam tûrin a ṭanpui ang che a, “hmangaihnaa indawh tawn” zêl tûrin a ṭanpui bawk ang che.—Ephesi 4:2.

I TIH THEIH CHU:

• In chhûngkhatte chu in nuna inrawlh thui mah mah nia i hriat chuan, dinhmun a reh laiin i kawppui chu sawipui ang che

• Chûng thilte chungchângah in pahniha pawm tlân theih tûr thu tlûkna siam rawh