He brochure aṭanga i hriat tawh angin, Bible-ah chuan nang leh i chhûngte ṭanpui thei tûr thu bul tam tak a chuang a. Pathian Jehova chuan hlim taka i awm a duhsak che a. Amah chibai bûkna i ngaih pawimawh ber chuan, thil ṭûl dang “zawng zawng . . . pêk belhchhah” chu a tiam che a ni. (Matthaia 6:33) Ani chuan a ṭhiana siam che a duh tak zet a. Chuvângin, Pathian nêna inṭhianna siam tûrin hun remchâng i neih apiang hmang ṭangkai rawh. Mihring neih theih chanvote zînga ropui ber a ni si a.—Matthaia 22:37, 38.

BIBLE SAWI DAN CHUAN: “‘In tân Pa ka ni ang a, nangni pawh ka tân fanu fapa in ni ang,’ Lalpa Engkimtitheia chuan a ti.” (2 Korinth 6:18) Pathian chuan ṭhian ṭhaah a duh che a. Ṭawngṭaina chu a ṭhian ṭha nih theih dân kawng khat a ni. Jehova chuan a hnêna ‘bâng lova ṭawngṭai’ tûrin a sâwm che a. (1 Thessalonika 5:17) Chhûngrila i ngaihtuahna leh i thil veite hriat chu a duh a ni. (Philippi 4:6) I chhûngte hmaa i ṭawngṭai hian, anni chuan i tâna Pathian a takzia chu an hmu ang.

Pathian i biak pawh bâkah, a thusawite i ngaihthlâk a ngai bawk a. Chu chu, a Thu leh Bible ṭanchhan thu leh hla chhuahte zirin i ti thei a ni. (Sâm 1:1, 2) Chutah, i thu zirte chu ngaihtuah ngun rawh. (Sâm 77:11, 12) Pathian thu ngaithla tûr chuan Kristian inkhâwmnaa tel ziah pawh a ngai bawk a ni.—Sâm 122:1-4.

Jehova chanchin mi dangte hnêna hrilh pawh hi amah nêna inlaichînna sawh ngheh theihna kawng pawimawh tak dang pakhat a ni. A chanchin i hrilh tam poh leh amah chu i hnaih lehzual ang.—Matthaia 28:19, 20.

I TIH THEIH CHU:

• Nî tina Bible chhiar nân leh ṭawngṭai nân hun insiam rawh

• Intihhlimna lam aiin thlarau lam thiltih chu chhûngkuaah dah pawimawh zâwk rawh

BIBLE SAWI DAN CHUAN: “Pathian hnaih rawh u, tichuan anin a hnaih ang che u.” (Jakoba 4:8) Chhûngkuaa Pathian biakna neih reng theih nân hun duan siam leh bawhzui reng a ngai a. (Genesis 18:19) Mahse, chu aia tam chu a ngai a ni. Pathian chu i nî tin nuna pêng pakhat ang a ni tûr a ni a. Pathian chanchin chu “ina in ṭhut lai te, kawnga in kal lai te, in mut lai te, in thawh hun tein” sawi ṭhîn ula, chutiang chuan i chhûngkua leh Pathian inlaichînna chu tinghet ang che. (Deuteronomy 6:6, 7) “Kei leh ka chhûngte erawh hi zawngin LALPA rawng ania kan bâwl dâwn ni,” titu Josua ang nih chu tum ang che.—Josua 24:15.

I TIH THEIH CHU:

• I chhûngkaw zînga mi tinte mamawh phuhru thei tûr ṭha taka buatsaih zirtîrna chu neihpui reng rawh