Inneihna leh chhûngkaw nuam tak din tumin theih tâwp chhuah mah la, beisei loh takin thilte a lo thleng thei a, chu chuan hlimna neih zêl a tiharsa thei a ni. (Thuhriltu 9:11) Pathian chuan harsatna kan tawh huna min ṭanpuitu tûr thilte chu min pe a. A hnuaia Pathian Lehkhathua thu bulte i nunpui chuan, dinhmun chhe ber pawh chhûngkua angin in paltlang thei ang.

BIBLE SAWI DAN CHUAN: “Anin a ngaihsak ṭhin che u avângin in manganna zawng zawng ama chungah nghat vek rawh u.” (1 Petera 5:7) In harsatna tawhte avângin Pathian chu mawhpuh tûr a ni lo tih hre reng ang che u. (Ṭah Hla 3:33) Amah in hnaih hian, ani chuan a ṭha thei ang berin a ṭanpui ang che u. (Isaia 41:10) “In thinlung chu a hmâah chuan leihbaw rawh u.”—Sâm 62:8.

Bible nî tina i chhiar a, i zirna aṭang pawhin thlamuanna i hmu thei a. Chuta ṭang chuan, Jehova’n “kan hrehawmna zawng zawngah min thlamuan ṭhîn” tih i hria ang. (2 Korinth 1:3, 4; Rom 15:4) Ani chuan “Pathian thlamuanna, rilru rêng rênga hriat sên loh” a tiam che a ni.—Philippi 4:6, 7, 13.

I TIH THEIH CHU:

• Rilru leh ngaihtuahna fîm tak nei tûrin Jehova ṭanpuina dîl rawh

• Duh thlan tûr i neih zawng zawng chu ennawnin, i tâna kawng ṭha ber chu thlang rawh

BIBLE SAWI DAN CHUAN: “Remhre thinlung chuan hriatna a dawng ṭhîn a, mi fing beng chuan hriatna a zawng ṭhîn.” (Thufingte 18:15) Thil chinchâng engkim la khâwm rawh. I chhûngkaw zînga mi mal tinte mamawh chu hriat tum rawh. Anni chu bia la, an thusawite ngaithla rawh.—Thufingte 20:5.

I hmangaih tak tuemaw thi ta se engtin nge ni ang? I sûnzia lan chhuahtîr chu hreh suh ang che. Isua meuh pawh “a ṭap” tih hre reng rawh. (Johana 11:35; Thuhriltu 3:4) Hahdam taka chawlh leh kham taka mut pawh a pawimawh bawk a. (Thuhriltu 4:6) Chu chuan dinhmun lungngaihthlâk tak hmachhawn chu a tiawlsam zual ang.

I TIH THEIH CHU:

• Chhiatna a lo thlen hmain, i chhûngte nên inbiak pawhna ṭha nei reng rawh. Chutiang chuan buaina a lo chhuah hunah nangmah biak che chu an hreh lo vang

• I dinhmun ang tawngtu mi dangte chu be rawh

BIBLE SAWI DAN CHUAN: “Ṭhian chuan englai pawhin a hmangaih reng a, mangan nî atâna unauva piang a ni.” (Thufingte 17:17) I ṭhiante chuan ṭanpui che an duh a, mahse ṭanpui dân tûr an hre lo mai thei. I mamawh tak chu an hnênah hrilh hreh suh. (Thufingte 12:25) Chu bâkah, Bible hre thiamtute hnên aṭangin thlarau lam ṭanpuina zawng bawk rawh. Bible aṭanga kaihhruaina an pêkte chuan a ṭanpui dâwn che a ni.—Jakoba 5:14.

Pathian leh a thutiam ring tak taktute nêna inkawm fona aṭang pawhin i mamawh ṭanpuina i hmu ang a. Mi dangte i ṭanpuina aṭang pawhin thlamuanna nasa tak i nei bawk ang. Pathian Jehova leh a thutiamte i rinna chu mi dangte hnênah hrilh rawh. Ṭanpui ngaite ṭanpuiin buai reng la, nangmah hmangaih a, ngaihsaktute lakah inkulh hrang suh ang che.—Thufingte 18:1; 1 Korinth 15:58.

I TIH THEIH CHU:

• Ṭhian ṭha pakhat bia la, a ṭanpuina la rawh

• I mamawh chu tlang takin sawi rawh