Jehova’n chhûngkua a din khân, nu leh pate chu an fate enkawl tûrin mawhphurhna a pe a. (Kolossa 3:20) Nu leh pa in nih angin in fate chu Jehova hmangaih tûr leh mi puitling tak ni tûra zirtîr chu in mawhphurhna a ni. (2 Timothea 1:5; 3:15) In fate thinlunga thil awm chu in hre tûr a ni bawk. In entawn tûr siam hi a pawimawh hle a. Jehova thu in thinlunga a awm hmasak chuan in fate chu in zirtîr ṭha ber thei ang.—Sâm 40:8.

BIBLE SAWI DAN CHUAN: “Mi tinin ngaihthlâk chuh sela, thusawi chuh lo sela.” (Jakoba 1:19) I fate’n engtik lai pawha biak pawh theih nia an hriat che i duh chuan, an biak duh hunah ngaihthlâksak i inpeih a ni tih an hriat a ngai a ni. An ngaihtuahna sawi chhuah a awlsam nân boruak muanawm tak siam rawh. (James 3:18) I vîn dâwn emaw, i sawisêl dâwn emaw nia an hriat chuan, an rilru an phawrh tak tak lo vang. I fate chungah dawhtheihna lantîr la, i hmangaihzia hrilh nawn fo rawh.—Matthaia 3:17; 1 Korinth 8:1.

I TIH THEIH CHU:

• I fate’n an biak duh hunah biak pawh theihin awm rawh

• I fate chu harsatna a awm hunah chauh ni lovin, be pawp reng rawh

BIBLE SAWI DAN CHUAN: “Mi a kâa thu chu tui thûk tak ang . . . a ni.” (Thufingte 18:4) A châng chuan in fate rilru dik tak hriat nân fing takin an ṭawngkam hman piah lam in en a ngai ang. Naupangte chuan a hleihluakin emaw, an tum loh pui emaw chu an sawi ṭhîn. “Ngaihthlâk hmâa chhân chu a tân âtthlâk nihna leh mualphona a ni.” (Thufingte 18:13) Chuvângin, thinur hmanhmawh suh ang che.—Thufingte 19:11.

I TIH THEIH CHU:

• I fate chuan eng thu pawh sawi se, a sawi lai pawh chahsak loh leh a lutuka chhân lêt loh chu tum tlat rawh

• An kum zât i nih laia i rilru leh i ngaih pawimawhte chu hriat chhuah tum rawh

BIBLE SAWI DAN CHUAN: “Ka fapa, i pa zirtîrna che chu ngaithla la, i nu zirtîrna che chu hawisan suh.” (Thufingte 1:8) Jehova chuan nu leh pate chu naupangte chunga thu neihna a pe ve ve a. I fate chu nangmah zah tûr leh thu âwih tûrin i zirtîr tûr a ni. (Ephesi 6:1-3) Naupangte chuan nu leh pate’n “rilru hmun khat” an put leh put loh chu an hre thei a. (1 Korinth 1:10) Inlungrual lohna chuan nu leh pate an zahna a hlohtîr theih avângin naupangte hmaa lan chhuahtîr loh chu tum ang che.

I TIH THEIH CHU:

• Fate i thunun dân tûr chungchângah i kawppui chu sawipuiin, inremna nei hmasa rawh

• Fate zirtîr dân tûr chungchângah in thu a inhmuh loh chuan, i kawppui thlîr dân aṭanga thlîr chu tum rawh

BIBLE SAWI DAN CHUAN: “Naupang chu a kalna âwm kawngah chuan zirtîr ula.” (Thufingte 22:6) Fate zirtîrna kawnga hlawhtlinna chu amahin a lo thleng mai lo vang. Fate zirtîr tûrin ruahmanna ṭha tak i neih a ngai a, chutah chuan thununna a tel a ni. (Sâm 127:4; Thufingte 29:17) Thununna han tih hian hremna ngawr ngawr sawina a ni lo, i fate chu in dân zamte phêna awm a chhante hre thiam tûra ṭanpuina pêk a tel a. (Thufingte 28:7) Chu bâkah, Pathian Jehova Thu ngaina tûr leh a thu bulte hre tûra zirtîr a tel bawk. (Sâm 1:2) Chu chuan chhia leh ṭha hriatna thiang tak nei tûrin a ṭanpui ang.—Hebrai 5:14.

I TIH THEIH CHU:

• I fate’n Pathian chu an rin theih tûr mi pakhat anga thlîr tûrin ṭanpui rawh

• Nungchang lama hlauhawm thlen thei Internet leh social network-a kan hmuh ang chite hriaa pumpelh tûrin ṭanpui ang che. Mipat hmeichhiatna lama khawih chingpên tumtute pumpelh dân zirtîr bawk rawh