Milema hmeichhia hi i hmu em?— Jephtha fanu a ni. Bible chuan a hming min hrilh lo va, a pa leh Jehova a tilâwm tih erawh kan hria a ni. Amah leh a pa, Jephtha chungchâng i lo zir ang u.

Jephtha chu mi ṭha tak a ni a, a fanu hnêna Jehova chanchin zirtîr nân hun tam tak a hmang ṭhîn a. Mi chak tak leh hruaitu ṭha tak a ni bawk. Chuvângin, Israelte chuan an hmêlmate donaah hmahruai tûrin an ti a ni.

Jephtha chuan hnehna chang tûrin Pathian hnênah ṭanpuina a dîl a. Hnehna a chan phawt chuan, ina a kîr leh hunah a in aṭanga lo chhuak hmasa ber chu Jehova hnêna pêk a tiam a ni. Chu mi chuan a dam chhûnga Pathian biak  bûkah awmin, rawng a bâwl ang. Biak bûk chu chutih hun laia mite’n Pathian an biak ṭhinna hmun a ni. Jephtha chuan hnehna a chang ta ngei mai le! Ina a va haw chuan, a in aṭanga lo chhuak hmasa ber chu tu nge ni, i hria em?—

Ni e, Jephtha fanu ngei mai a lo chhuak a nih chu! A fanu neih chhun a ni a, Jephtha chuan hla taka a thawn bo a ngai dâwn ta. Chu chuan a tilungngai êm êm a. Mahse, thu a lo tiam tawh tih hre reng rawh. A fanu chuan, ‘Ka pa, Jehova hnênah thu i tiam tawh a, chu chu i hlen tûr a ni,’ tiin a sawi nghâl vat a ni.

Jephtha fanu pawh a lungngai ve tho va. Biak bûkah chuan pasal leh fa a nei thei dâwn lo a ni. Mahse, a pa thutiam chu hlensak leh Jehova tihlâwm chu a duh hle a. Chu chu pasal neih a, fa neih aiin a dah pawimawh zâwk a ni. Chuvângin, in kalsanin, biak bûkah chuan a dam chhûngin a awm ta a.

A thiltih chuan a pa leh Jehova a tihlâwm i ring em?— Tehrêng mai! Thu i âwih a, Jehova i hmangaih bawk chuan, Jephtha fanu ang i ni ve thei a. I nu leh pate leh Pathian Jehova chu i tilâwm hle dâwn a ni.