Milema mipate hi i hmu em?— Matthaia, Marka, Luka, Johana, Petera, Jakoba, Juda, leh Paula te an ni. Hêng mite hi Isua dam rual puite an ni a, Isua chanchin an ziak a ni. An chanchin chu i lo zir belh ang u.

An zînga pathum chu Isua rawngbâwlpui tirhkohte an ni a. Tute nge an nih i hria em?— Matthaia, Johana, leh Petera te an ni. Tirhkoh Matthaia leh Johana chuan Isua chu an hre chiang hle a, Isua nun chanchin an  ziak ve ve a ni. Tirhkoh Johana chuan Thu Puan bu leh Johana Thawn Khat, Johana Thawn Hnih, leh Johana Thawn Thumte chu a ziak bawk. Tirhkoh Petera chuan Bible-a chuang lehkha thawn pahnih chu a ziak a. Chu chu Petera Thawn Khat leh Petera Thawn Hnih tia hriat a ni. Petera chuan a lehkha thawn pahnihnaah, Jehova’n Isua hnêna: ‘Hei hi ka fapa a ni a. Ka hmangaihin, ka chhuang a ni,’ tih thu vân aṭanga a sawi lai chanchin a ziak a ni.

Milema mipa dangte pawh hian an lehkhabu ziakah Isua chanchin min zirtîr bawk. An zînga pakhat chu Marka a ni a. Isua man a nih lai chuan a bulah awmin, thil awm dân engkim a hmu vek niin a lang. Mi dang leh chu Luka a ni. Ani chu doctor a ni a, Isua thih hnuah Kristian a lo ni chauh niin a lang.

Bible ziaktu dang pahnih milema i hmuhte hi Isua naute an ni a. An hming i hria em?— An hming chu Jakoba leh Juda an ni. Atîrah chuan Isua an ring lo va. Isua chu a â deuh a nih an ring hial a. Mahse, a hnuah Isua chu an ring a, Kristian an lo ni ta a ni.

Bible ziaktu hnuhnûng ber milema i hmuh hi Paula a ni a. Kristian a nih hma chuan, a hming chu Saula a ni. Kristiante chu a haw hle a, an chungah a sual thei hle bawk. Engin nge Paula chu Kristian nih duhna neihtîr i hria em?— Ni khat chu, Paula kawnga a kal laiin tuemaw hian vân aṭangin a rawn be thut a. Chu chu Isua a lo ni reng a! Paula hnênah chuan: ‘Engvângin nge keimah min ringtute lakah hian i sual êm êm mai le?’ a ti a. Chu mi hnuah chuan, Paula chu Kristian a lo ni ta a. Paula chuan Bible-a lehkhabu 14, Rom aṭanga Hebrai bu thleng chu a ziak a ni.

Bible hi nî tin kan chhiar a ni lâwm ni?— Bible chhiarna aṭangin Isua chanchin tam tak kan hriat belh a ni. Isua chanchin zir belh chu i duh em?—