Mite chuan Jehova chanchin kan sawi hian min nuihsawh châng leh thinrim châng an nei ṭhîn a. Chu chuan Pathian chanchin sawi tawh loh mai duhna min neihtîr thei a ni. Chutiang chuan i awm tawh ngai em?— Bible chuan Jehova a hmangaih chung pawha a chanchin sawi bânsan ṭêptu râwlthar pakhat chanchin min hrilh a. A hming chu Jeremia a ni. A chanchin i lo zir belh ang u.

Jeremia a tlangvâl chhoh chuan, Jehova chuan mite chu an thil sual tihte bânsan tûra vaukhân tûrin a tîr a. Chu chu Jeremia tân chuan a harsa hle a, a hlau bawk a ni. Jehova hnênah chuan: ‘Sawi tûr ka hre lo. Naupang mai ka ni si a,’ a ti a. Mahse, Jehova chuan: ‘Hlau suh. Ka ṭanpui ang che,’ tiin a chhâng a ni.

 Tichuan, Jeremia chuan mite chu an nun an siam ṭhat loh chuan hrem an ni dâwn tih a hrilh ṭan ta a. Mite chu Jeremia sawi angin an insiam ṭha em?— Siam ṭha lo. An nuihsawhin, a chungah an thinrim hle a. Ṭhenkhatte chuan tihhlum hial an duh a nih kha! Jeremia chu engtin nge a awm?— A hlau va: ‘Jehova chanchin ka sawi tawh lo vang,’ a ti a ni. Mahse, sawi lovin a awm em?— Awm lo ve. Jehova a hmangaih êm avângin a chanchin sawi lovin a awm thei lo va. Jeremia chuan thu hrilh a bânsan loh avângin Jehova’n a ni chu a vênghim a ni.

Entîr nân, ṭum khat chu mi sual ṭhenkhatin Jeremia chu chirhdiaka khat lei hnuai ripah chuan an paih a. Chaw ei tûr emaw, tui in tûr emaw a nei lo. Chûng mite chuan Jeremia chu chuta thi tûra hnutchhiah chu an duh a ni. Mahse, Jehova ṭanpuinain, a dam chhuak tlat!

Jeremia entawn tûr siam aṭangin eng nge i zir theih?— Ani chuan hlauh châng nei mah se, Jehova chanchin sawi chu a bânsan lo. Jehova chanchin i sawi hian mite chuan an nuihzat che emaw, i chungah an thinrim emaw pawh a ni thei a. I zak emaw, i hlau emaw pawh a ni hial thei bawk. Mahse, Jehova chanchin sawi chu bânsan ngai suh. Ani chuan Jeremia a ṭanpui angin a ṭanpui zêl ang che.