Jeriko khawpuia awm angin han inngai ta ila. Chu khawpui chu Jehova ringtu an awm lohna hmun, Kanaan ramah a awm a. Chutah chuan Rahabi tia hriat hmeichhe pakhat a awm a ni.

Rahabi chuan a naupan laiin Mosia’n Tuipui Sen ṭhen hrang a, Aigupta aṭanga Israel mite a hruai chhuah dân chanchin chu a hria a. An hmêlmate do hneh tûra Jehova’n a ṭanpui dân pawh a hria a ni. Tûnah chuan, a awmna Jeriko khaw bul an lo thleng tawh tih a hre ta!

Tlai khat chu, khawpui enthla tûrin Jeriko khuaah Israel mi pahnih an va kal a. Rahabi in an va thleng a ni. Chutah, ani chuan a ina thleng tûrin a sâwm a. Chu mi zân chuan Jeriko lal chuan khawpuiah enthlatute an awm tih leh Rahabi inah an lût tih a hria a. Chuvângin, lal chuan man tûrin a mite a tîr ta a ni. Rahabi chuan enthlatu pahnihte chu a in chung zâwlah chuan thukruin, lal mi tirhte hnênah chuan: ‘Enthlatute chu an lo kal a, mahse khawpui an chhuahsan daih tawh. Tûna in ûm nghâl chuan, in la ûmpha ang!’ tiin a hrilh a. Rahabi’n enthlatute a vênhim chhan i hria em?— Jehova a ring a, Kanaan ram chu Israelte hnênah a pe dâwn tih a hriat vâng a ni.

Enthlatute’n Rahabi in an chhuahsan hmain, Jeriko tihchhiat a nih hunah amah leh a chhûngte tihboral an ni dâwn lo tih an tiam a. Rahabi tih atâna an hrilh chu i hria em?— Anni chuan: ‘He la sen hi la la, i tukverhah hian ṭâwn betin uai thlâktîr ang che. Chutianga i tih chuan, i in chhûnga awmte chu an him vek ang,’ an ti a. Rahabi chuan enthlatute hrilh ang ngei chuan a ti a. A hnua thilthleng chu i hria em?—

A hnu rei lo têah Israelte chuan ngawi rengin khawpui chu an kal hual a. Ni ruk chhûng chu ni khatah vawi khat zêl khawpui an kal hual a ni. Mahse, a ni sarih nîah chuan, khawpui chu vawi sarih an kal hual a. Tichuan, an vaiin ring takin an au ta vak a. Jehova chuan khawpui hualtu kulhte chu a tichim ta vek a  ni. Mahse, tukverha hrui sen inkhaina in erawh chu a chim ve miah lo! A lemah hian i hmu thei em?— Rahabi leh a chhûngte chu an him ta!

Rahabi hnên aṭang hian eng nge i zir theih?— Rahabi chuan Jehova chanchin ropui tak a hriatte avângin Ani chu a ring a ni. Nang pawhin Jehova chanchin ropui tam tak i zir mêk a ni. Rahabi angin Jehova chu i ring em?— I ring tih kan hria e!