Rebeki chu Jehova hmangaihtu nu pakhat a ni a. A pasal hming chu Isaaka a ni. Ani pawhin Jehova a hmangaih a. Engtin nge Rebeki chuan Isaaka chu a tawn? Engtin nge Jehova tihlâwm a duhzia a târ lan? A chanchin tam zâwk i lo en ang u.

Isaaka nu leh pate chu Abrahama leh Sari an ni a. Mite’n Jehova an biak lohna hmun, Kanaan ramah an chêng a ni. Mahse, Abrahama chuan a fapain Jehova betu nupui a neih chu a duh a. Tichuan, a chhiahhlawh chu a chhûngte awmna Haran-ah Isaaka nupui tûr zawnsak tûrin a tîr a, a mi tirh hi Eliezera a nih ngei a rinawm hle.

Eliezera chu Abrahama chhiahhlawh dangte nên an zin chhuak ta a. An zin kawng chu a thui hle a. Ei tûr leh thilpêk phur tûrin sanghâwngsei sâwm an hruai a. Engtin nge Eliezera chuan Isaaka nupui tûr chu a thlan theih ang le? Chhiahhlawh dangte nêna Haran an lo thlen chuan, Eliezera chuan tui chawi tûrin mi an lo kal thuai dâwn tih a hriat avângin tuichhunchhuah bulah chuan an châwl a. Jehova hnênah chuan: ‘Nula tui in tûr min pe tûra ka dîl a, kei leh ka sanghâwngseite pawh in tûr petu chu, i hmeichhe thlan chu a ni tih ka hria ang,’ tiin a ṭawngṭai a ni.

Tichuan, nula Rebeki chu tuichhunchhuahah chuan a lo kal ta a. Bible chuan a hmêl a ṭha hle tih a sawi a ni. Eliezera chuan tui in tûr a han dîl chuan: ‘Teh reng mai. Tui in tûr ka pe ang che a, i sanghâwngseite tân pawh tui ka chawisak ang e,’ a ti. Han ngaihtuah teh! Sanghâwngsei tuihâlte chuan tui tam tak an in ṭhîn a; chuvângin Rebeki chu tuichhunchhuahah tui chawi tûra a tlân zak zak a ngai a ni. Milemah hian a thawh hahzia chu i hmu em?— Eliezera chuan Jehova’n a ṭawngṭaina a chhân dân chu mak a ti hle a ni.

Eliezera chuan Rebeki chu thil mawi tam tak a pe a. Ani chuan Eliezara leh chhiahhlawh dangte chu an ina kal tûrin a sâwm a. Eliezera chuan Abrahama’n chu mi hmuna a tirh chhan leh Jehova’n a ṭawngṭaina a chhân dân chu a hrilhfiah a. Rebeki chhûngkua chuan Isaaka nupui a ni tûr chu lâwm takin an remti a ni.

Mahse, Rebeki’n Isaaka chu a neih duh i ring em?— Rebeki chuan Jehova’n Eliezera chu a rawn tîr tih a hria a. Chuvângin, Rebeki chhûngte’n Kanaana kal a, Isaaka nupuia awm a duh leh duh loh an zawh chuan, ‘Aw, duh e,’ tiin a chhâng a ni. Eliezera rual chuan Kanaan lam panin a kal nghâl vat a. An va thlen chuan, Isaaka chuan nupuiah a lo nei ta a ni.

Rebeki chuan Jehova duhzâwng anga thil a tih avângin Jehova chuan mal a sâwm a. Kum tam tak a liam hnuah, Isua chu a chhûngkua aṭangin a lo piang ta! Rebeki ang i nih a, Jehova i tihlâwm chuan nang pawh mal a sâwm ang che.