Samuela chuan naupang tê a nih lai aṭangin, mite’n Jehova be tûra an kalna hmun biak bûkah awmin rawng a bâwl a. Biak bûka Samuela lo awm ṭan dân i hria em? Samuela nu, Hani chungchâng i lo zir phawt ang u.

Hun rei tak aṭang tawh khân Hani chuan fa neih duh hle mah se, pakhat mah a nei thei lo va. Chuvângin, Jehova hnênah ṭanpuina dîlin a ṭawngṭai a. Fapa a neih chuan, biak bûka awm tûr leh rawngbâwl tûra pêk a tiam a ni. Jehova chuan a ṭawngṭaina chu a ngaithlâksak a, fapa a nei ta. A hmingah Samuela a sa a. Samuela chu kum thum kum li mi vêl a nih chuan, Hani chuan a thutiam ang ngeiin biak bûka Pathian rawngbâwl tûrin a hruai ta a ni.

Chu biak bûkah chuan Elia chu puithiam lal a ni a. A fapa pahnihte pawhin chutah chuan rawng an bâwl a. Biak bûk chu Pathian biakna in a ni a, mite’n chutah chuan thil ṭha an ti tûr a ni tih hre reng ang che. Mahse, Elia fapate erawh chuan thil ṭha an ti lo. Samuela chuan an thiltih chu a hmu a. Ani chuan Elia fapate angin thil ṭha lo a ti ve em?— Ti lo ve, a nu leh pate zirtîrna angin thil dik a ti chho zêl a ni.

I ngaih dânin Elia’n a fapa pahnihte chunga a tih tûr chu eng nge ni?— Anni chu a hrem tûr a ni a, Pathian ina rawng an bâwl pawh a phal tûr a ni lo. Mahse, Elia erawh chuan chutiang chuan a ti lo. Chuvângin amah leh a fapa pahnihte chungah Jehova chu a thinur a. Anni chu hrem a tum ta a ni.

Zan khat chu Samuela chuan a muthilh laiin tuemawin, ‘Samuel!’ tia a koh thâwm chu a hria a. Elia hnênah a va tlân a, mahse: ‘Ka ko lo che,’ tiin a lo hrilh a. Chutiang chuan vawi hnih koh thâwm a hre leh a. A vawi thumnaah, Elia chuan Samuela hnênah aw i hriat leh chuan: ‘Aw, Jehova, khawingaihin sawi rawh, ka ngaithla e,’ lo ti ang che a ti a. Chutiang chuan Samuela chuan a sawi ta  a. Tichuan, a hnênah Jehova chuan: ‘Elia hnênah an thil sual tih avângin a chhûngkua chu ka hrem dâwn tih hrilh ang che,’ a ti a. Samuela tân Elia hnêna chutiang thu han sawi chu a awlsam i ring em?— A awlsam lo a ni. Mahse, hlau tak chungin Samuela chuan Jehova sawi ang chuan a va hrilh a. Jehova thusawi chu a lo thleng dik ta. Elia fapate pahnih chu tihhlum an ni a, Elia pawh a thi ta a ni.

Samuela chu kan tân entawn tûr ṭha a ni. Mi dangte’n thil ṭha lo an tih chu hmu reng mah se, thil ṭha a ti reng tho si a. Chutiang chu i ni ve em? Samuela angin, thil dik i ti chho zêl ang em? Chutianga i tih chuan, Jehova leh i nu leh pate chu i tilâwm dâwn a ni.