Hebrai ṭawnga Bethel tih hi “Pathian In” tihna a ni a. (Genesis 28:17, 19) He hming hi khawvêl hmun tina Jehova Thuhretute hmunpui, thu hrilh rawngbâwlna atâna kaihhruaina leh ṭanpuina pêkna hmun hming atân a inhmeh hle. Governing Body chuan khawvêla Jehova Thuhretute hmunpui ber, New York State, U.S.A.-ah rawngbâwlin, chuta ṭang chuan khawvêl ram hrang hranga branch office-te rawngbâwlna chu a enkawl a ni. Chûng hmuna ho khat anga rawngbâwltute chu Bethel chhûngkua tia koh an ni a. Anni chuan chhûngkua anga inlungrual taka chêng tlângin, hnate an thawk tlâng a, chawte ei tlângin, Bible an zir tlâng ṭhîn a ni.—Sâm 133:1.

Mahni inpêkna neite tâna chhûngkua anga rawngbâwlna hmun danglam bîk tak. Bethel inahte chuan Pathian duhzâwng ti tûr leh hun puma Lalram hmasâwn nâna thawk tûra inpe Kristian a hmei a pate an chêng a. (Matthaia 6:33) Chuta awmte chuan hlawh an nei lo; mahse, chênna tûr leh ei leh in tûr pêk an ni a, mi mal mamawh châkkhai phuhrûk nân sum tlêm azâwng pêk an ni. Bethel-a mi zawng zawngte chu office-ah emaw, ei rawng bâwlna lamah emaw, dining room lamah emaw hna thawh tûr ruatsak vek an ni a. Ṭhenkhat chuan lehkha chhutna lamah te, a bua siamna lamah te, in chhûng tihfaina lamah te, insûkna lamah te, khâwl leh ilo enkawlna lamah te, leh thil dang dangah te an thawk a ni.

Lalram thu hrilhna ṭanpuitu hnate thawka buai mup mupna hmun. Bethel tinin a tum ber chu, mi a tam thei ang berte tâna Bible thutak hmuh theiha siam hi a ni a. Chu mi entîrtu pakhat chu he brochure hi a ni. He brochure hi Governing Body endikna hnuaia ziah a ni a, chu mi hnuah khawvêl puma ṭawng letlingtute hnênah computer hmanga thawn chhuah a ni leh a; tichuan, Bethel in engemaw zâta lehkhabu chhut chhuahna khâwl chak ber berte hmanga chhut chhuah a niin, chu mi hnuah kohhran 1,10,000 chuangah thawn chhuah a ni leh ta a ni. Hetianga hna a kal kual chhûng zawng hian Bethel chhûngkua chuan hna zawng zawnga hmanhmawhthlâk ber—chanchin ṭha hrilh—chu an ṭanpui a ni.—Marka 13:10.

• Tute’n nge Bethel-ah rawng bâwl a, anni chu eng anga enkawl nge an nih?

• Bethel in zawng zawnga hna thawhte chuan eng hna hmanhmawhthlâk tak nge a ṭanpui?