“Pioneer” tih thu mal chuan hmun thar tlawh chhuak hmasa a, mi dangte tâna kawng sialtute a kâwk tlângpui ṭhîn a. Isua chu nunna pe thei rawngbâwlna nei tûr leh chhandamna kawng hawng tûra he leia rawn tirh a nih avângin, pioneer anga sawi theih a ni. (Matthaia 20:28) Tûn laiah, a hnungzuitute chuan ‘zirtîr siamnaa’ an theih ang tâwk hun pein, Isua chu an entawn a. (Matthaia 28:19, 20) Ṭhenkhat phei chu pioneer rawngbâwlna tia kan kohvah hian an inhmang hial a ni.

Pioneer thawktu chu hunbi kima chanchin ṭha hriltu a ni. Jehova Thuhretu zawng zawngte chu chanchin ṭha hriltu, thuchhuahtu an ni vek a. Mahse, ṭhenkhat chu regular pioneer thawk tûrin an insiam rem a, thu hrilhnaah thla tin dârkâr 70 an hmang a ni. Hetianga an thawh theih nân mi tam tak chuan hun puma hna thawk lovin, hunbi neiin an thawk a. Mi dangte chu Lalram thu puangtu mamawh zualna hmuna special pioneer thawk tûra thlan an ni a, thla tinin rawngbâwlnaah dârkâr 130 emaw, a aia tam emaw an hmang a ni. Pioneer-te chu Jehova’n an mamawhte a pe ang tih ring tlat chungin, samkhai takin an nung a. (Matthaia 6:31-33; 1 Timothea 6:6-8) Hun puma pioneer thawk thei lote pawhin an theih hunah auxiliary pioneer an thawk thei a, thla khata dârkâr 30 emaw, 50 emaw hmuin an rawngbâwlna an zauh a ni.

Pioneer thawktu chu Pathian leh mite hmangaihnain a chêttîr a ni. Isua ang bawkin, tûn laiah pawh thlarau lama mite retheihzia kan hmu a. (Marka 6:34) Chûng mite hnêna hma lam hun beiseina nghet pe a, tûn la la pawha anmahni ṭanpui thei hriatna chu kan nei a ni. Ṭhenawmte hmangaihna chuan pioneer thawktu chu mi dangte thlarau lama ṭanpui nâna a hun leh tha leh zung phal taka hmang tûrin a chêttîr a. (Matthaia 22:39; 1 Thessalonika 2:8) Chu chuan a rinna tichakin, Pathian a hnaihtîr lehzual bâkah, hlimna a neihtîr lehzual bawk a ni.—Tirhkohte 20:35.

• Engtin nge pioneer awmzia i hrilhfiah ang?

• Engin nge mi ṭhenkhat chu hun puma pioneer thawk tûra chêttîr?