Bible chuan Krista thih hnuah Kristian hmasate zîng aṭangin zirtîrtu der an lo chhuak ang a, Bible thutak an tidanglam dâwn tih a sawi lâwk a. (Tirhkohte 20:29, 30) A hnuah, chutiang ngei chuan a lo thleng ta rêng a ni. Anni chuan Isua zirtîrna chu milem betu sakhuate ngaih dân nên an chawhpawlh a, Kristianna suak chu a lo piang chhuak ta a ni. (2 Timothea 4:3, 4) Tûn laiah hian Bible zirtîrna dik tak hriatthiamna kan nei tih engtin nge kan chian theih ang?

Jehova tân thutak laih lan hun a lo thleng. Ani chuan “tâwpna hun” chhûnga ‘hriatna dik a pun’ tûr thu a sawi lâwk a. (Daniela 12:4) Kum 1870 khân, thutak zawngtu pâwl te tak tê chuan sakhaw thurin tam tak chu Bible nên a inmil lo tih an hria a. Chuvângin, Bible zirtîrna dik tak chu hriat thiam tumin an bei ṭan ta a, Pathian Jehova chuan Bible thute hre thiam tûra ṭanpuiin anni chu mal a sâwm a ni.

Tih tak takna thinlung neite chuan Bible thu ngun takin an zir. Kan pute anga sawi theih tûr chûng tih tak zeta Bible Zirlaite chuan, tûn thleng pawha kan la hman reng Bible zir dân chu an lo hmang a ni. Anni chuan Bible thute chu a mal malin an sawiho va. Bible châng hriat thiam harsa tih an neih chuan, a hrilhfiah nân Bible châng dang an zawng a. Bible châng dangte nêna inmil thu tlûkna an siam hian, chu chu an ziak chhuak ta ṭhîn a ni. Chutianga Bible chu amah leh amah inhrilhfiahtîrin, Pathian hming leh a Lalram te, mihringte leh he lei atâna a thiltum te, mitthi dinhmun te, leh thawhleh beiseina te chungchânga thutak chu an hmu chhuak leh ta a. Chutianga Bible thutak an zawn chhuahna chuan rinna leh thiltih dik lo tam tak lakah anni chu a chhuah zalên a ni.—Johana 8:31, 32.

Kum 1879 vêlah chuan, Bible Zirlaite chuan thutak puan zâr hun a thleng tawh tih an hre thiam a. Chuvângin, chu mi kum vêkah chuan tûn thlenga la chhuak, Vênnainsâng Jehova Lalram Puanchhuahna tih magazine chu an chhuah ṭan ta a. Tûnah chuan ram 240-ah ṭawng 750 vêlin Bible thutak chu mite hnênah kan hrilh tawh a ni. Tûn ang rêng hian hriatna dik hi a la pung ngai lo!

• Krista thih hnu chuan Bible thutak chu engtin nge a awm tâk?

• Engin nge Pathian Thu aṭanga thutak hmu chhuak leh tûra min ṭanpui?