Leilung chhiatna a lo thlenin, Jehova Thuhretute chuan an unau chhiatna tâwkte ṭanpui tûrin ruahmanna an siam nghâl vat ṭhîn a. Chutianga hma lâkna chuan kan inhmangaih tawn tak zetzia a târ lang a ni. (Johana 13:34, 35; 1 Johana 3:17, 18) Eng kawngtein nge kan ṭanpui?

Sum kan thawh khâwm. Judai rama ṭâm nasa tak a tlâk ṭum khân, Antiokei khuaa Kristiante chuan thlarau lama an unaute chu sum leh paiin an ṭanpui a. (Tirhkohte 11:27-30) Chutiang bawkin, khawvêl hmun khawi emaw laia awm kan unaute’n harsatna an tâwk tih kan hriat hian, an tisa lam mamawhte phuhrûk nân tualchhûng kohhran kal tlangin thawhlâwm kan thawh ṭhîn.—2 Korinth 8:13-15.

Ṭanpuina ṭangkai tak kan pe. Chhiatna thlenna hmuna awm upate chuan kohhran tina mite chu an kim leh kim loh te, an him leh him loh te an chian ṭhîn a. Chhawmdâwlna lam ngaihtuahtu pâwl chuan ei tûr te, tui thianghlim in tûr te, thawmhnaw te, chênna hmun tûr te, leh damdawia inenkawlna lam te a ngaihtuah a ni. Chhiat tâwkte ṭanpui nâna mamawh thiamna bîk nei Thuhretu tam takte chu chhawmdâwlna hnaa tel tûr emaw, unaute in leh Kingdom Hall chhia siam ṭha tûr emawin mahni sum sêngin an inpe ṭhîn bawk. A pâwl anga kan inlungrualna leh hna thawhhona aṭanga kan thiltawn neihte chuan mamawh huna inchhawmdâwl nghâl zung zung thei tûrin min ṭanpui a ni. Kan ṭanpui ber chu ‘rinnaa kan chhûngte’ ni mah se, a theih phawt chuan eng sakhuaa mi pawh kan ṭanpui tho a ni.—Galatia 6:10.

Thlarau lam leh rilru lama ṭanpuina kan pe. Leilung chhiatna tâwkte chuan a bîk takin thlamuanna an mamawh ṭhîn a. Chutih hunah chuan, “thlamuanna zawng zawng Pathian” Jehova hnên aṭangin chakna kan dawng a ni. (2 Korinth 1:3, 4) Lungngaite hnênah chuan Bible thutiamte phûr taka hrilhin, natna leh hrehawm tawrhna thlentu chhiatna zawng zawngte Pathian Ramin a rawn tihbo thuai tûr thu kan hrilh ṭhîn a ni.—Thu Puan 21:4.

• Engvângin nge Thuhretute chuan leilung chhiatna a thlen hunah ṭanpuina an pêk nghâl theih?

• Chhiatna ata dam khawchhuakte hnênah thlarau lama thlamuanna thu eng nge kan hrilh theih?