Mi tam tak chuan Jehova Thuhretute tih hi sakhaw thar hming niin an ngai a. Mahse, kum 2,700 chuang kalta khân, Pathian dik awmchhun chuan a rawngbâwltute chu amah “hriatpuitute,” a nih loh leh a thuhretute angin a sawi a ni. (Isaia 43:10-12) Kum 1931 thleng kha chuan, Bible Zirlaite tia hriat kan ni a. Mahse, engvângin nge Jehova Thuhretute tih hming kan put tâk?

Kan Pathian nihna a târ lang avângin. Hmân lai kutziak lehkhate sawi dânin, Bible-ah hian Pathian hming Jehova tih chu vawi sâng sarih chuang lai a lang a. Ṭawng lehlin tam takah he hming hi Lalpa emaw, Pathian emaw ang chi a nihna nêna thlâkthleng a ni. Mahse, Pathian dik chuan Mosia hnênah: “Kei Jehova ka ni,” tia sawiin a mi mal hming chu a târ lang a. (Exodus 6:2) Hetiang hian pathian dik lo zawng zawngte lakah a inthliar hrang a. Pathian hming thianghlim kan pu chu kan inchhuang hle.

Kan hnathawh a târ lan avângin. Mi fel Abela aṭanga inṭanin hmân laia mi tam takte chuan Jehova an rinna chu an târ lang a. Kum zabi tam tak chhûng chuan Nova te, Abrahama te, Sari te, Mosia te, Davida te, leh mi dangte chuan he ‘chhûmpui nasa tak ang thlîrtute,’ a nih loh leh thuhretute chu an belhchhah a ni. (Hebrai 11:4–12:2) Mi tuemaw chu pawisawi lo tuemaw tâna court-ah thuhretua a ṭang ang chiahin, kan Pathian chungchânga thudik mi dangte hriattîr chu kan tum tlat a ni.

Isua kan entawn avângin. Bible chuan Isua chu “thu hretu rinawm leh dik taka” tiin a ko va. (Thu Puan 3:14) Amah Isua ngei chuan ‘Pathian hming a hriattîr’ tih leh Pathian chungchânga ‘thutak a hriattîr’ zawm zêl tih a sawi a ni. (Johana 17:26; 18:37) Chuvângin, Krista hnungzuitu dik takte chuan Jehova hming an puin, an hriattîr tûr a ni a. Chu tak chu a ni, Jehova Thuhretute tih tum tlat chu ni.

• Engvângin nge Bible Zirlaite chuan Jehova Thuhretute tih hming chu an put?

• Engtik aṭang khân nge Jehova chuan leiah hian thuhretute a lo neih ṭan?

• Tu nge Jehova Thuhretu ropui ber chu?