Hmân lai aṭang tawhin, Pathian Jehova chuan chhûngkuate chu amah nêna an inlaichînna leh chhûngkuaa an inlaichînna tihngheh nâna hun hmang tlâng tûrin a duh a. (Deuteronomy 6:6, 7) Chuvângin, Jehova Thuhretute chuan chawlhkâr tinin chhûngkuaa Pathian biakna—an chhûngkaw mamawh ang zêla siam rem thlarau lam thilte boruak zâng tak hnuaia sawihona—atân hun an ruat ṭhîn a ni. Mahni chauhva awm i nih pawhin, chutiang hun chu i tuizâwng Bible thute zîr a, Pathian nêna hun hman dun theihna remchâng tak a ni thei a ni.

Chu chu Jehova hnaih lehzual theihna hun a ni. “Pathian hnaih rawh u, tichuan anin a hnaih ang che u.” (Jakoba 4:8) Bible aṭanga Pathian Jehova mizia leh a thiltihte kan zir chian poh leh amah kan hre chiang lehzual a. Chhûngkuaa Pathian biakna neih ṭan dân awlsam ber chu Bible chhiarho nâna hun engemaw zât hman hi a ni a, chu mi atân Nun leh Rawngbâwlna Inkhâwm hun duan chu hman theih a ni ang. Bible châng chhiar tûrte chu inbitukin, chhûngkuaa mi tinte chu an inchhiar chhâwk thei ang a, chuta an thil zirte chu an sawiho leh thei ang.

Chu chu chhûngkaw zînga mite inhnaih lehzualna hun a ni. Chhûngkuaa Bible zirho a nih hian, nupa inkâr leh, nu leh pa leh fate inkâra awm inlaichînna chu a nghet lehzual ṭhîn. Chu mi hun chu chawlhkâr chhûnga hun hlimawm leh nuam ber a ni tûr a ni. Nu leh pate chuan an fate upat dân azirin zirho atâna ṭha an tihte an thlang thei a, Vênnainsâng leh thu leh hla chhuah dangte, a nih loh leh kan website, jw.org aṭanga an lâkte chu an hmang thei a ni. Tin, in fate’n school-a buaina an tawhte leh chûngte an hmachhawn theih dân tûr chu in sawiho thei ang. Engah nge JW Broadcasting (tv.pr418.com)aṭanga tihchhuahte chu enin, a hnua in sawiho loh vang? Inkhâwmnaa hla sak tûrte in zir tlâng theiin, chhûngkuaa Pathian biakna neih zawhah chuan thil engemaw in ei khâwm thei bawk ang.

Chutianga chawlhkâr tina Jehova biakna neihho ṭhinna chuan chhûngkaw zînga mite chu Pathian Thu zir nuam ti tûrin a ṭanpui ang a, in ṭan lâkna chu Pathianin nasa takin mal a sâwm bawk ang.—Sâm 1:1-3.

• Engvângin nge chhûngkuaa Pathian biakna neih nân hun kan ruat ang?

• Engtin nge nu leh pate chuan chu hun chu chhûngkaw zînga mi tinte tân hun hlimawm tak ni tûra an siam theih?