Kum zabi khatnaah khân, hriak thih Kristian kohhran pum pui aiawha thu tlûkna pawimawh tak siam tûrin pâwl tlêm tê, “Jerusalem khuaa tirhkohte leh upate” chu governing body angin an awm a. (Tirhkohte 15:2) Chûng mite’n inlungrual taka thu tlûkna an siam hian, chu chu Pathian Lehkha Thu an sawihona leh Pathian thlarau kaihhruaina rah chhuah a ni ṭhîn. (Tirhkohte 15:25, 26) Tûn laiah pawh chutiang tih dân chu zui a ni.

Pathianin a duhzâwng tih nân a hmang. Governing Body-a tel hriak thih unaupate chu Pathian Thu ngaihven tak an niin, kan hnathawh leh thlarau lam thil enkawlnaah thiltawn ngah tak an ni a. Anni chu khawvêl puma unaute mamawh ngaihtuahho tûrin chawlhkâr khatah vawi khat an inhmukhâwm ṭhîn. Kum zabi khatna hun lai ang bawkin, Bible ṭanchhan kaihhruainate chu lehkha hmangin emaw, traveling overseer-te leh mi dangte hmangin emaw an thawn darh ṭhîn a. Chu chuan Pathian mite zîngah rilru leh thiltiha inpumkhatna a awmtîr a ni. (Tirhkohte 16:4, 5) Governing Body chuan thlarau lam chaw buatsaihna chu a enkawl a, Lalram chanchin ṭha hrilhna dah pawimawh ber ṭheuh tûrin min fuih bawk a; tin, mawhphurhna chelhtu tûr unaupate ruatna chu a enkawl bawk a ni.

Pathian thlarau kaihhruaina ṭha takin a chhâng lêt. Governing Body chu Lei leh Vâna Lal Chungnungber, Pathian Jehova leh kohhran Lû, Isua kaihhruainaah a innghat a ni. (1 Korinth 11:3; Ephesi 5:23) Governing Body zînga mite chuan Pathian mite hruaitu angah an inngai lo. Hriak thih Kristian zawng zawngte rualin, anni chuan ‘Berâm No [Isua] chu a kalna apiangah an zui a ni.’ (Thu Puan 14:4) Governing Body chuan a tâna kan ṭawngṭaina chu a ngaihlu hle.

• Kum zabi khatnaa governing body-ah khân tute nge tel?

• Engtin nge tûn laia Governing Body chuan Pathian kaihhruaina a zawn?