Mi tam tak chu thlarau lama kaihhruaina leh thlamuanna an hmuh loh avângin, sakhaw inkhâwmnaah an tel duh tawh lo va. Chuti chu, engvângin nge Jehova Thuhretute huaihawt Kristian inkhâwmnaah i tel ang? Chutah chuan eng thil nge i tawn ang?

Inhmangaih leh inngaihsak takte zînga telna aṭanga hlimna i tawng ang. Kum zabi khatnaah khân, Kristiante chu kohhran anga din an ni a, Pathian be tûr te, Pathian Lehkha Thu zir tûr te, leh infuih tawn tûr tein an inkhâwm ṭhîn. (Hebrai 10:24, 25) Dinhmun duhawm taka an inhmuh khâwm ṭhin avângin, ṭhian dik tak—thlarau lama an unaute—zînga awm niin an inhria a ni. (2 Thessalonika 1:3; 3 Johana 14) Kum zabi khatnaa Kristiante entîrna chu kan zui a, chutiang bawk hlimna chu kan tawng ve a ni.

Bible thu bulte nunpui dân zirna aṭanga hlâwkna i hmu ang. Bible hun lai ang bawk khân, a hmei a pa, a pui a pangin an inhmu khâwm ṭhîn a. Zirtîrtu tling takte chuan Bible hmangin kan nî tin nuna a thu bulte nunpui dân tûr hre thiam tûrin min ṭanpui a ni. (Deuteronomy 31:12; Nehemia 8:8) Ngaithlatute chu sawi khâwmnaah leh hla saknnaa an tel vek thei a, chu chuan kan Kristian beiseina sawi chhuah theihna hun remchâng min pe a ni.—Hebrai 10:23.

Pathian i rinna tinghet tûra malsâwmna i dawng ang. Tirhkoh Paula chuan a hun laia kohhran pakhat hnênah: “Hmuh ka châk hle si che u a . . . in rinna leh ka rinnain kan inthlamuan tawn theihna tûrin,” tiin a hrilh a. (Rom 1:11, 12) Inkhâwmnaa kan unaute nêna kan inkawm ziahna chuan kan rinna a tichakin, Kristian nun dâna nun kan tumna chu a tinghet a ni.

Engvângin nge kohhran inkhâwm lo awm tûra sâwmna chu pawmin, chûng thilte chu nangmah ngeiin i rawn tawn ve loh vang? Phûr taka lawm i hlawh dâwn si a. Inkhâwmna zawng zawngah hian a thlâwna tel theih a ni a—thawhlâwm pawh khawn a ni ngai hek lo.

• Kan kohhran inkhâwmte chuan tute entîrna siam nge a zui?

• Engtin nge Kristian inkhâwmnaa tel chu kan hlâwkpui theih?