Jehova Thuhretute Kingdom Hall zawng zawng chuan Pathian hming thianghlim a pu a. Chuvângin, Kingdom Hall tihfaina, cheimawina, leh siam ṭhat ngaite siam ṭhatnaa tel chu chanvo pawimawh leh kan biakna thianghlim pêng pawimawh tak a ni a. He hnaah hian kan tel vek thei a ni.

Inkhâwm bânah hmun tifai tûra inpein. Inkhâwm bân apiangin unaute chuan hlim takin Kingdom Hall an tifai ṭhîn a. Uluk lehzuala tihfaina chu hunbi neia neih a ni ṭhîn. Chu chu upa emaw, kohhranho rawngbâwltu emawin a kaihhruai ṭhîn a, tih tûr ziah chhuahte zuia tihfai a ni tlângpui ṭhîn. A ṭûl dân azirin, unaute chu hmun phiat tûr te, chhuat nâwt tûr te, hmun dang bal hru fai tûr te, ṭhutthlêng rem ṭha tûr te, bâwlhlo hmanga êk in tifai tûr te, turkverh leh dârthlalang nâwtfai tûr te, bawlhhlawh paih tûr te, a nih loh leh a chhûng leh pâwn vêl tifai tûrtein an inpe ṭhîn a ni. Kan fate pawh thil engemaw tihtîr vein, kan biakna hmun zah dân kan zirtîr a ni.—Thuhriltu 5:1.

A ṭûl ang ang siam ṭha tûra inpein. Kum tinin, Kingdom Hall chhûng leh pâwn hi ngun taka endik a ni ṭhîn a. Chu endikna ṭanchhanin, hall chu hman tlâka ṭha a nih reng theih nân enkawl chhoh a ni a, chu chuan ṭûl lo taka sum insên ṭeuhna nei lo tûrin min ṭanpui a ni. (2 Chronicles 24:13; 34:10) Kingdom Hall fai tak leh ṭha taka enkawl chu kan Pathian biakna hmun atân a inhmeh hle. He hnaa tel ṭhinna hmang hian, Jehova leh amah kan biakna hmun kan ngaih pawimawhzia kan lantîr a. (Sâm 122:1) Hei hian tualchhûnga mite fak a hlawh bawk a ni. —2 Korinth 6:3.

• Engvângin nge kan biakna hmun chu kan ngaihthah loh vang?

• Kingdom Hall fai taka vawng tûrin eng ruahmannate nge siam a nih?