Kingdom Hall tih hmingin a târ lan ang hian, chu mi hmuna Bible zirtîrna kan sawikhâwm ber chu Pathian Ram—Isua rawngbâwlnaa a thupui ber—chungchâng a ni.—Luka 8:1.

Tualchhûnga biakna dik hmunpuite a ni. Hêng aṭang hian Lalram chanchin ṭha hrilhna chu huaihawt a ni a. (Matthaia 24:14) Kingdom Hall sak dân leh a len zâwngte chu a inang lo thluah a; mahse, mawi tâwk tak vek a niin, ṭul lo khawpa lian a ni lo; Kingdom Hall tam tak chu kohhran pakhat aia tamin an hmang ṭhîn. Kohhran mi kan pun zêl avângin, tûn hnai kumahte khân Kingdom Hall sâng tam tak (a chawh rual chuan nî tina panga zêl) sak a ni. Chutianga kan sak theih chhan chu eng nge ni?—Matthaia 19:26.

Kingdom Hall sak nâna ruahman thawhlâwm hmanga sak a ni. Chûng thawhlâwmte chu Kingdom Hall sak emaw, siam ṭhat emaw ngai kohhrante’n an hman theih nân branch office-ah thawn a ni.

Mahnia inpe mi chi hrang hrangte’n hlawh nei lova an sak a ni. Hmun tam takah chuan Kingdom Hall Satu Pâwl din a ni a. Chûng mite leh mahnia inpete chu hmun kilkhâwr takah pawh ni se, ram pakhat chhûnga Kingdom Hall sakna apiangah insawn kualin, tualchhûng kohhran chu an Kingdom Hall saknaah an ṭanpui a ni. Ram dangah chuan, in sakna lama tawnhriat ngah Thuhretute chu ram engemaw zâta Kingdom Hall sak leh siam ṭhatna lam enkawl tûra ruat an ni a. Hall sakna apiangah chutiang mite tel mah se, hna thawh tûr a tam zâwk chu tualchhûng kohhrana mite chuan mahnia inpein an thawk ṭhîn. Hetiang in sakna zawng zawngte hi Jehova thlarau leh a mite theihtâwp chhuahna avânga thawh theih a ni.—Sâm 127:1; Kolossa 3:23.

• Engvângin nge kan inkhâwmna hmun chu Kingdom Hall tia koh a nih?

• Engtin nge khawvêl pumah Kingdom Hall-te chu kan sak theih?