Kan inawpna pâwlah hian hlawh neia rawngbâwl kan awm lo va. Kristian kohhran din tirh laia an tih dân ang bawk khân, enkawltu tling takte chu “Pathian kohhranho, . . . châwm” tûra ruat an ni. (Tirhkohte 20:28) Hêng upate hi kohhranho kaihruaitu leh châwmtu, thlarau lama mi puitling tak an ni a, anni chuan “tih tûr a nih vâng ni lovin, Pathian thu anga châk chung zâwkin, hlêpna bawlhhlawh duh vâng ni hek lovin, rilrua duh tak zâwkin” kohhranho chu an ṭanpui a ni. (1 Petera 5:1-3) Kan tân eng hna nge an thawh?

Min vêngin, min enkawl. Upate chuan kaihhruaina pein, kohhranho chu thlarau lama chak tûrin an ṭanpui a. Pathianin he mawhphurhna pawimawh tak hi an kovah a nghat tih hre rengin, upate chu kohhranho chungah chuan an intilal lo va, kan ṭhatna tûr leh kan lâwmna tûrin thil an ti zâwk mah a ni. (2 Korinth 1:24) Berâmpu chuan a berâmte taima taka a enkawl ṭheuh angin, upate pawhin kohhrana mite hriat chian ṭheuh chu an tum a ni.—Thufingte 27:23.

Pathian duhzâwng tih dân min zirtîr. Kan rinna tichak tûrin upate chuan chawlhkâr tin kohhran inkhâwm an kaihruai ṭhîn a. (Tirhkohte 15:32) Hêng mi inpe takte hian thu hrilh rawngbâwlnaah pawh hma an hruai bawk a, rawngbâwlna kawng tinrêngah min thawhpuiin, min zirtîr bawk a ni.

Kan mamawh ang fuihna min pe. Mi mal tinte thlarau lam mamawh enkawl nân, tualchhûng upate chuan Bible aṭanga ṭanpuina leh thlamuanna min pe tûrin kan inahte min rawn tlawh emaw, Kingdom Hall-ahte min kâwm emaw ṭhîn a ni.—Jakoba 5:14, 15.

Kohhrana mawhphurhna an neih bâkah, upa a tam zâwkte chu hun leh ngaihsakna pêk ngai hna thawh lai nei leh chhûngkaw nei an ni hlawm a. Hêng unaupa thawkrim takte hian kan zah an phu hle a ni.—1 Thessalonika 5:12, 13.

• Kohhran upate mawhphurhna chu eng nge ni?

• Eng kawngtein nge upate chuan mi mal ngaihsakna kan chungah an lantîr?