Jehova Thuhretu mi engzât nge i hriat? Kan zînga ṭhenkhat chu i ṭhenawmte, i hna thawhpuite, a nih loh leh i classmate te an ni mai thei a. A nih loh pawhin, Bible chungchâng kan sawipui tawh che pawh a ni thei bawk. Mi eng ang chiah nge kan nih a, engvângin nge mite hnêna kan rinna kan sawi chhuah ṭhin?

Mi narân ve mai kan ni. Pian leh mûrna leh dinhmun hrang hrang aṭanga lo kalte kan ni a. Kan zînga ṭhenkhat chu tûn hmaa sakhaw dang lo vuan ṭhînte leh Pathian ring lotute an ni. Mahse, kan vai hian Jehova Thuhretute kan nih hmain Bible zirtîrnate chu ngun takin kan bih chiang ṭheuh va. (Tirhkohte 17:11) Kan thil zirte chu kan pawm a, chutah Pathian Jehova be tûrin mahnia duhthlanna kan siam a ni.

Bible zirna chu kan hlâwkpui. Mi dangte ang bawkin buainate leh mahni chak lohnate chu kan hmachhawn a ngai a. Mahse, kan nî tin nuna Bible thu bulte nunpui kan tum hian, kan nunah hmasâwnna nasa tak kan hmu a ni. (Sâm 128:1, 2) Chu chu Bible aṭanga kan thu zir ṭha tak takte mi dang hnêna kan hrilh chhan pakhat chu a ni.

Pathian tehnate milin kan nung. Bible zirtîr hêng tehnate hian rinawmna leh ngilneihna mizia pawh tiamin, hlimna leh mi dangte zahna min neihtîr a ni. Chûng chuan khawtlâng tâna mi ṭha leh ṭangkai min nihtîr bâkah, chhûngkaw inlungrual leh nungchang ṭha tak min nihtîr bawk. “Pathianin mi duhsak bîk a nei lo” tih ring tlatin, hnam leh politics avânga intihhranna awm lo khawvêl pum huap thlarau lama inunauna chu kan nei a. Mi narân ve mai ni mah ila, kan danglam bîk tlat a ni.—Tirhkohte 4:13; 10:34, 35.

• Jehova Thuhretute chuan mi dangte nên inanna eng nge an neih?

• Thuhretute chuan Bible zirna aṭangin eng tehna hlu takte nge an zir?