LUNGKHAMNA chu Pathian mite pawh tiamin mi zawng zawngin an tâwk a. ‘Ka mangang êm êm a,’ tiin fakna hla phuahtu chuan a ziak a ni. (Sâm 94:19, C.L. Re-edited) Isua pawhin tâwpna hunah hian ‘dam chhûng khawsak ngaihtuahna’ chuan a bîk takin Jehova rawngbâwl a tiharsa dâwn tih a sawi a ni. (Luka 21:34) Lungkhamna i nei ve em? Sum leh pai lama harsatna, chhûngkaw buaina, a nih loh leh hrisêl lohnate chuan a tlâk buak ve che em? Engtin nge Jehova chuan hmachhawn tûrin a ṭanpui theih che?

Lungkhamna chu mahni mai chuan kan hmachhawn thei lo. Paula chuan: “Lehlam lehlama nêksâwrin kan awm a . . . Mangangin kan awm a . . . Vuak thlûkin kan awm,” tiin a ziak a. Chutichung pawhin “kan thaw a ipik si lo,” “kan bei a dawng si lo,” “tihboralin kan awm si lo,” tiin a sawi bawk a ni. Engin nge tuar thei tûra min ṭanpui? ‘Thiltihtheihna nasa tak’—kan Pathian engkimtithei, Jehova hnêna mi hian min ṭanpui a ni.—2 Korinth 4:7-9.

Hun kal tawha ‘thiltihtheihna nasa tak’ i dawn dânte kha ngaihtuah rawh. Thusawi ṭha tak pakhatin Jehova hmangaihna rinawm a ngaihhlut zualtîr che dân chu i la hria em? Mi dangte hnêna Paradis beiseina i sawi hian Jehova thutiam i rinna chu a nghet zual sauh em? Kristian inkhâwma tel a, kan rinna mi dangte hnêna kan hrilh hian, nuna lungkhamnate hmachhawn thei tûrin chakna kan dawng a, hlim taka Jehova rawngbâwl nâna kan mamawh rilrua thlamuanna kan dawng a ni.

Kil tin aṭanga pawhpên niin i inhre ngei ang. Entîr nân, Jehova chuan Lalram zawng hmasa tûr leh thlarau lam thiltihtea inhmang reng tûrin min beisei a. (Matthaia 6:33; Luka 13:24) Mahse, dodâlna te, hrisêl lohna te, a nih loh leh chhûngkuaa buainate chuan min tlâk buak reng ta se engtin nge ni ang? A nih loh leh, i hnathawh hian kohhran nêna i hun hman tûr zawng zawng la zo ta se engtin nge ni ang? Tih tûr tam tak i neih a, a tihna tûr tha leh zung leh hun i neih si loh chuan, i rulru a buai hle mai thei a. Pathian Jehova chuan ka lakah a beisei sâng mah mah em aw ti pawhin i ngaihtuah hial thei a ni.

Jehova chuan min hre thiam a. A hnêna kan pêk theih aia tam min beisei ngai lo. Tisa lam leh rilru lam hahna ata ṭha chhuak leh tûrin hun kan mamawh tih a hria a ni.—Sâm 103:13, 14.

Entîr nân, Jehova’n zâwlnei Elija a ngaihsak dân kha ngaihtuah rawh. Lunghnual leh hlauh avânga thlalêra a tlân chhiat khân, Jehova chuan a zâwlnei chu hauvin, a hna thawk leh tûrin thu a pe em? Pe lo ve. Jehova chuan Elija muhîl lai kaitho va, ei tûr pe tûrin vântirhkoh  ṭum hnih lai a tîr a ni. Chutichung pawhin, ni 40 a liam hnuah pawh Elija chuan lungkhamna leh hlauhna a la nei reng a. Amah ṭanpui tûrin Jehova chuan eng dang nge a tih? A hmasain, a vênhim theihzia a lantîr a. A dawtah, Elija chu ‘aw dam diaiin’ a thlamuan a. A tâwpah chuan, Jehova chuan amah betu rinawm a sâng têl an la awm thu a hrilh a ni. A hnuah chuan, Elija chu zâwlnei thatho tak a lo ni leh ta. (1 Lalte 19:1-19) Zir tûr chu eng nge ni? Lungkhamnain Elija a hneh lai khân, Jehova chuan a chungah dawhtheihna leh khawngaihna a lantîr a. Jehova chu a la inthlâk danglam lo. Kan chungah pawh chutiang ngaihsakna a lantîr ve ngei ang.

Jehova hnêna i pêk theih tûr i ngaihtuah hunah, a tak ramah chêng rawh. Tûna i tih theih tûr leh tûn hmaa i lo tih tawhte chu khaikhin suh. Entîr nân: Intlânsiak mi, a thla têl, a nih loh leh a kum têl inzirna nei tawh lo chu tûn hma angin a tlân nghâl thei lo. Chutianga tlân ai chuan, chakna leh chhelna neihtîr thei tûr thiltum tênau zâwkte a insiam zâwk a ni. Kristiante chu intlânsiak mite ang an ni a. Thiltum chiang tak neiin an inzir a ni. (1 Korinth 9:24-27) Chuvângin, engah nge i tâna awlsam ber tûr thlarau lam thiltum pakhat i insiam loh vang? Entîr nân, kohhran inkhâwma tel i tum ṭan thei a. Jehova hnênah chu i thiltum hlen thei tûrin a ṭanpuina dîl rawh. Thlarau lam chakna i neih leh hun chuan, ‘Jehova ṭhatzia chu i tem’ thei ang. (Sâm 34:8) Jehova i hmangaihzia lantîr nâna i thiltih apiang chu—engmah tham ni lo angin lang mah se—a tân chuan a hlu a ni tih hre reng ang che.—Luka 21:1-4.

Engtin nge Jehova chuan June-i chu lo kîr leh tûra a ṭanpui? Heti hian min hrilh a ni: “Jehova hnênah ṭawngṭaiin a ṭanpuina ka dîl reng a. Tichuan, ka monu chuan kan khuaa inkhâwmpui a awm thu min hrilh a. Ni khat tal inkhâwmpuia tel ka tum ta a. Jehova mite zînga tel leh chu a va nuam tak êm! Chu inkhâwmpui chu ka lo nghah reng tihchakna a ni. Tûnah chuan hlim takin Jehova rawng ka bâwl leh tawh a. Ka nun hian awmzia a nei lehzual tawh a ni. Ka inla hrang thei lo va, ṭanpuina ka mamawh tih tûn hma zawng aiin ka hre ta. Lo kîr lehna hun a la awm avângin ka lâwm tak zet a ni,” tiin.