LINDA-I angin rinnaa unau pakhat thiltih avânga rilru natna i tuar tawh ngai em? Lungchhiatthlâk takin, mi ṭhenkhat chuan mi dangte thiltihin an rilru a tihnat êm avângin, thlarau lama thiltihte chu an bânsan a. Chutiang chu i ni ve em?

Min tinatu rinnaa kan unau tuemaw ngaihdam chu a harsa hle ngei ang. Mahse, Kristiante chu inhmangaih tawn tûra tih kan ni a. (Johana 13:34, 35) Chuvângin, rinnaa kan unauvin dik lo taka min tih hian, kan lung a hnualin, kan rilru pawh a na hle ngei ang.—Sâm 55:12.

Bible chuan Kristiante inkârah “thupawi” chhuah châng a awm thei tih a sawi a. (Kolossa 3:13) Mahse, mahni ngeia kan tawh hunah chuan chinfel chu harsa kan ti hle thei a ni. Min ṭanpui thei thil engemaw a awm em? Bible thu bul pathum ngaihtuah ang che:

Kan Pa vâna mi chuan engkim a hria. Jehova chuan kan tawh rorêl dik lohna leh a rahchhuah hrehawm tawrhnate pawh tiamin, thil engkim hi a hmu vek a ni. (Hebrai 4:13) Chu bâkah, hrehawm kan tawrh hunah Jehova chuan min tawrhpui a. (Isaia 63:9) “Hrehawmnain emaw, lungngaihnain emaw,” a nih loh leh thil dang engmahin—a chhiahhlawh dang emaw pawhin—“Pathian hmangaihna ata chu mi ṭhen” a phal ngai lo vang. (Rom 8:35, 38, 39) Chutiang a nih chuan keini pawhin Jehova nêna kan inkârah thil engmah leh mi tumah kan tlâktîr tûr a ni lo.

Ngaihdam chu sual ngaihzamna a ni lo. Kan chunga thil tisualtute kan ngaihdam hian, an thil sual tih kan tihnêpsak, kan ngaihhnathiam, thiam kan chantîr, a nih loh leh kan ngaizam tihna a ni lo. Pathian Jehova chuan thil sual tih a pawm ngai lo va; mahse, chhan ṭha a awm hunah a ngaidam tih hria ang che. (Sâm 103:12, 13; Habakuka 1:13) Mi dangte ngaidam tûra min fuih hian, amah entawn tûrin min fuih tihna a ni. “A thinur chu a pai kumkhua” si lo va.—Sâm 103:9; Matthaia 6:14.

Thinurna kan pai reng loh hian, a hlâwkna kan seng a ni. Eng kawngin nge? He dinhmun hi han mitthla teh. Lung rit vak lo pakhat chu lain, bân char chungin han keng teh. Rei lo te chhûng chu harsatna awm lêm lovin i keng thei ang. Mahse, rei tak han keng dâwn ta la engtin nge ni ang? Engtia rei nge i ken theih dâwn?—minute rei lo tê nge? Dârkâr khat nge? a aia rei i keng thei dâwn? chutianga i ken chuan i kut chu a kham hle ngei ang! Lung rihna chu a inthlâk lo tih a chiang a. Mahse, i ken rei poh leh rit i ti lehzual ang. Thinurna hi chutiang bawk chu a ni. Lungnih lohna hi chhe tê pawh ni se kan pai rei poh leh kan intina telh telh a ni. Pathian Jehova’n thinurna pai reng lo tûra min  fuih pawh hi a mak lo ve. Chutianga pai reng loh chu kan ṭhatna tûr a ni tih a chiang hle.—Thufingte 11:17.

Linda-i chu rinnaa unaunuin a chunga a thiltih chungchânga thinurna pai reng lo tûrin engin nge ṭanpui? A ṭanpuitu tam tak zîngah chuan, mite ngaihdam chhan tûr Bible-a târ lante ngaihtuahna a tel a. (Sâm 130:3, 4) A bîk takin, mi dangte kan ngaihdam hunah Pathian Jehova chuan min ngaidam ve dâwn tih hriatnain Linda-i chu a chêttîr ber a ni. (Ephesi 4:32–5:2) Chûng thute’n a chunga nghawng a neih dân chungchângah heti hian a sawi a ni: “Jehova ngeiin min bia niin ka hria,” tiin.

A hnuah, Linda-i chuan a thinurna a paih bo thei a. Chu unaunu chu inhuam taka ngaidamin, ṭhian ṭha tak an lo ni ta a. Linda-i chuan Jehova rawng a bâwl chhunzawm zêl a ni. Chutianga ti ve tûrin Jehova’n a ṭanpui duh che tih ring tlat ang che.