JEHOVA hnêna i kîr leh chuan, ani’n a ṭanpui ang che tih ring tlat rawh. Lungkhamna hmachhawn tûr te, lungnih lohna tiveng tûr te, chhia leh ṭha hriatna thiang aṭanga neih theih rilru leh thinlunga thlamuanna hmu tûr tein a ṭanpui ang che. Tichuan, i unaute ruala Jehova rawngbâwl leh châkna i lo nei ang. I dinhmun chu kum zabi khatnaa Kristian ṭhenkhatte dinhmun nên a inang mai thei a; tirhkoh Petera chuan an hnênah: “Berâm bo ang in nih kha, tûnah chuan in nunna vêngtu leh hotu hnênah chuan in kîr leh tâk hi,” tiin a ziak a ni.—1 Petera 2:25, NW.

Jehova hnêna kîr leh chu i thiltih theihte zînga ṭha ber a ni. Engvângin nge? Jehova thinlung i tihlâwm dâwn avângin. (Thufingte 27:11) I hriat tawh angin, Jehova chuan rilrua veina a nei a; chuvângin, kan thiltih chuan a chungah nghawng a nei a ni. Mahse, Jehova chuan amah hmangaih tûr leh a rawngbâwl tûrin min tilui lo. (Deuteronomy 30:19, 20) Bible lama mi thiam pakhat chuan: “Mihring thinlung pâwn lamah a hawnna tûr a invuah lo va. Chuvângin, a chhûng lam aṭanga hawn ngai a ni,” tia sawiin, tuman kan thinlung an hawng thei lo va, mahni ngeia hawn a ngaih thu a sawi a ni. Chu kawngkhâr chu thinlunga khat liam hmangaihna nêna Jehova chibai bûkin kan hawng thei a. Chutianga kan tih chuan, a hnênah thilpêk hlu tak—kan rinawmna—kan pe tihna a ni a, chu chuan a thinlung a tilâwm hle a ni. Ni e, a phû ang ngeia Jehova chibai bûkna aṭanga kan neih hlimna chu thil dang aṭanga kan neih hlimna nên khaikhin theih rual a ni lo.—Tirhkohte 20:35; Thu Puan 4:11.

Chu bâkah, Pathian biaknaa i inhman leh hian, thlarau lama i mamawh chu phuhrûk a ni ang. (Matthaia 5:3) Eng kawngin nge? Khawvêl puma mite chuan, ‘Engah nge kan pian?’ tih an ngaihtuah a. Nunin a tum hriat chu an châk hle a ni. A chhan chu Jehova’n chutiang hriat châkna neia min siam vâng a ni a. A rawngbâwlna aṭanga lungâwina nei tûrin min siam a ni. Jehova rawng kan bâwl chhan chu amah kan hmangaih vâng a ni tih hriat aia lungâwina nasa zâwk kan nei thei lo.—Sâm 63:1-5.

Pathian Jehova chuan a hnêna kîr leh tûrin a duh che tih hria ang che. Engtin nge i hriat chian theih? Hei hi ngaihtuah rawh: Ṭawngṭaina tam tak hlânin, he brochure hi ngun taka buatsaih a ni a. Kohhran upa emaw, unau dang emawin a pe che a ni. Chutah, a thute chhiar tûr leh chhâng lêt tûra chêttîrin i awm ta. Hêng zawng zawng hi, Jehova chuan a la theihnghilh lo che tih finfiahna a ni a. Theihnghilh ahnêkin, dîmdawi takin a lamah a hîp zâwk che a ni.—Johana 6:44.

Jehova chuan a berâm bote a theihnghilh ngai lo tih hriatna aṭangin thlamuanna i hmu thei a. Chu chu unaunu Donna-i chuan a rawn hre thiam a ni. Ani chuan: “Thutak ata ka tawlh bo va; mahse, Sâm 139:23, 24 thu: ‘Aw Pathian, ngun takin mi en chhuak la, ka thinlung hi hria ang che: mi fiah la, ka ngaihtuahnate hi hria ang che: tin, keimahah hian suahsualna kawng rêng rêng a awm nge awm lo, en la, chatuan kawngah chuan mi hruai ang che,’ tih hi ka ngaihtuah fo ṭhîn. Khawvêla mi ka ni lo tih ka hria, khawvêlah chuan ka leng thei tak tak ngai lo; Jehova inawpna pâwl hi ka awmna tûr a ni tih ka hria. Jehova chuan min kalsan ngai lo tih ka hre ta a; ka mamawh awmchhun chu a hnêna kîr lehna kawng zawn hmuh chauh a ni. Chutianga ka kîr leh tâk avângin ka va lâwm tak êm!” tiin a sawi a ni.

“LALPA chunga lâwmna” i neih leh theih nân tih tak zetin kan ṭawngṭaisak a che. (Nehemia 8:10) Jehova hnêna i kîr leh chuan i inchhîr ngai lo vang.