INTHIAM LOHNA chu phur rit tak a ni thei a. “Ka khawlohnate chuan ka lû hi a chîm pil a, phur rit tak ang, ka zawh rual loh hi a ni,” tiin Lal Davida chuan a ziak a. (Sâm 38:4) Kristian ṭhenkhat chuan Jehova ngaihdamna dawng thei tawh lo tûra an inngaih tlat avângin, lungngaihna nasa tak an nei a ni. (2 Korinth 2:7) Chutianga inngaihna neih chu a dik em? Sual pawi tak i ti a nih pawhin, a ngaihdamna dawng thei tawh lo tûr khawpin Jehova chu i hlat em? Hlat lo ve!

Jehova chuan inchhîrna nei thil sual titute chu a kalsan lo. A va pan zâwk mah a! Fapa tlânbo tehkhin thu-ah, Isua chuan Jehova chu a chhûngkua chhuahsan a, khaw lo taka nung fapa neitu hmangaihna nei tak pa ber nên a khaikhin a. A hnuah, a fapa chuan ina kîr leh zai a rêl ta a. “[A fapa chu] hla taka a la awm laiin a pain a lo hmu a, a khawngaih êm êm a, a tlân a, a ir a chuktuah a, a fâwp ngawih ngawih a.” (Luka 15:11-20) Jehova hnaih lehzual chu duh mah la, a hnên ata ‘hla taka la awm’ angin i inhria em? Isua tehkhin thua pa ber angin, Jehova chuan a khawngaih che a. Lo lawm che chu a châk hle a ni.

Mahse, i sualte chu Jehova ngaihdam theih loh khawpa nasa leh tam niin hre ta la, engtin nge ni ang? Isaia 1:18-a Jehova sâwmna hi ngaihtuah rawh: “Hawh teh u, i ngaihtuah tlâng teh ang u! In sualte chu sen lâr angin awm tawh mah sela, vûr angin a vâr ang,” tih chu. Ni e, kawr vâr chunga rawng sen lâr tak kai tihreh theih loh tûr anga langte pawh Jehova chuan a tireh theiin, a ngaidam thei a ni.

Jehova chuan mahni inthiam lohna i neih reng chu a duh lo. Chuti chu, engtin nge Pathian ngaihdamna leh chhia leh ṭha hriatna thiang tak neihna aṭanga lo awm rilru hahdamna chu i neih theih ang? Lal Davida thiltih pahnih hi ngaihtuah rawh. A hmasain: “Ka bawhchhiatna chu LALPA hnênah thupha ka chawi tawh ang,” a ti a. (Sâm 32:5) Jehova chuan ṭawngṭaia amah pan a, “ngaihtuah tlâng” tûrin a sâwm tawh che tih hre reng ang che. Chu sâwmna chu pawm rawh. I sual chu Jehova hnênah puangin, i rilru hahnate chu hrilh rawh. Davida chu: “Ka sual hi mi tlenfaisak ang che. . . . Aw Pathian, thinlung lungchhia leh inchhîr ngawih ngawih hi i hmusit lo vang,” tiin a thiltawn aṭangin rin tlatna nên a ṭawngṭai thei a ni.—Sâm 51:2, 17.

A pahnihnaah, Davida chuan Pathian ruat a mi hman, zâwlnei Nathana ṭanpuina a dawng a ni. (2 Samuela 12:13) Tûn laiah, Jehova chuan thil sual ti inlamlêtte hnênah kohhran upate a pe a; anni chuan Pathian nêna in inlaichînna siam ṭha  tûra ṭanpui tûr chein zirtîrna an dawng a ni. Upate i va pan chuan, anni chuan i thinlung hliam tihdam nân te, i inthiam lohna tiziaawm tûr leh paih bo tûr te, thlarau lama tidam tûr tein Pathian Lehkha Thu an hmang ang a, thinlung taka ṭawngṭaina an hlân ang.—Jakoba 5:14-16.

Pathian Jehova hnêna i thil sual tih inpuan leh upate pan chu i thiltih tûrte zînga a harsa ber pâwl a ni ngei ang. Davida pawhin harsa a ti hle niin a lang. A sualna chu hun engemawti chhûng a ‘ngawihpui reng’ a. (Sâm 32:3) Mahse, a hnuah chuan a sual puan leh a kawng zawh siam ṭhat a hlâwkna chu a têl ta a ni.

A hlâwkna lian tak pakhat chu Davida’n a hlimna a nei lêt leh hi a ni a. Heti hian a ziak a: “A bawhchhiatna ngaihdama awma, a sualna hliahkhuha awma chu, a eng a thâwl e,” tiin. (Sâm 32:1) Chu bâkah: “Aw Lalpa, nangin ka hmui hi hawng ang che; tichuan ka kâ hian i fakna chu a hriattîr dâwn nia,” tiin a ṭawngṭai bawk. (Sâm 51:15) Inthiam lohna a neih tawh lohna leh Pathian ngaihdamna chunga a lâwmna chuan Davida chu mi dangte hnêna Jehova chungchâng sawi tûrin a chêttîr a ni.

Jehova chuan chhia leh ṭha hriatna ṭha neihnain a chhâwk che chu a duh a. A chanchin leh a thiltumte chu, mi dangte hnêna mahni inthiam lohna nei reng chunga sawi lovin, tih tak zet leh hlim taka sawi tûrin a duh che a ni. (Sâm 65:1-4) ‘Jehova hnên ata harh hunte a lo thlen theih nâna i sualte thai bo’ tûra a sâwmna chu theihnghilh suh ang che.—Tirhkohte 3:19.

Chu tak chu a ni, Martha-i chunga thleng chu. “Ka fapa chuan Vênnainsâng leh Awake! magazine-te chu min thawn reng a. Zawi zawiin, Jehova nên kan inhmêlhriat leh ṭan a. Lo kîr lehna kawnga a harsa ber chu, ka thil sual tih zawng zawng atâna ngaihdam dîl hi a ni. Mahse a tâwpah chuan, Pathian hnênah ṭawngṭaiin ngaihdam ka dîl ta a. Jehova hnên ata ka vah bona kum 40 lai a tling chu rin harsa tak a ni. Ka thiltawn chuan kum tam tak a liam hnuah pawh Pathian rawngbâwl theihna hun remchâng neih leh theih a niin, a hmangaihnaah kîr leh theih a ni tih a târ lang chiang hle,” tiin a sawi.