Unau Duh Takte U:

Pathian leh mite hmangaihna chuan ‘kal a, hnam tina mi zirtîrahte siam’ tûrin min chêttîr a. (Mt. 28:19, 20; Mk. 12:28-31) Mahni hmasialna tel lo hmangaihna chuan thil a tithei hle a. Chu chuan “chatuana nun duhna rilru dik tak neite” thinlung a khawih thei a ni.—Tirh. 13:48, NWT.

Tûn hma chuan, thusawi dânte by-heart a, mite hnênah thu leh hla chhuahte hnutchhiah chu kan tih dân ṭhin a ni a. Mahse, tûnah chuan mite kan tîtîpui huna kan thiamnate kan tihhmasâwn a ngai a ni. Mite chu an ngaihven zâwngte sawipuiin an chungah hmangaihna lantîr kan duh a. Chu chu keimahni lama a ṭûl anga insiamrem a, mi tinte ngaihven zâwng leh lungkhamnate ngun taka kan ngaihtuah tel a ngai tihna a ni. Engtin nge he brochure hian chutianga ti thei tûra min ṭanpui ang?

He brochure-ah hian mite hmangaih a, zirtîrahte siam tûra kan neih ngai miziate min zirtîrna zirlai 12 a tel a. Zirlai tin chuan Isua leh kum zabi khatnaa chanchin ṭha hriltute’n rawngbâwlnaa mize engemaw bîk tak an lantîr dân târlanna Bible thute a ṭanchhan a. Kan thiltum chu thusawi dânte by-heart ni lovin, mite chunga hmangaihna kan lantîr theih dân kawng zawn hi a ni. Mize tinte chu rawngbâwlna pêng hrang hranga lantîr ngai mah se, mize engemaw bîkte chu tîtî ṭanna kan neih hunah, tlawhkîr kan neih hunah, leh Bible zirna kan kaihhruai huna kan lantîr theih dânte sawiho a ni ang.

Zirlai tinte kan zir hunah, rawngbâwlna biala mite i biak huna i lantîr theih miziate chu ngun takin ngaihtuah la. Jehova leh mite i hmangaihna chu tinghet zual sauh vang che. Chu hmangaihna chuan tih dân phung engemaw takte aiin, mite zirtîra siam tûra i thiltum hlen tûrin a ṭanpui ang che.

In ruala rawngbâwl theihna chanvo hlu kan neih avângin kan lâwm tak zet a ni. (Zep. 3:9) Mite hmangaih a, zirtîrahte siam tûra in ṭan lâk zêlnaah Jehova’n malsâwm ṭheuh che u rawh se!